Asa Nagdepende ang Imong Kaugmaon?
Daghan ang nagtuo nga dunay dili makitang puwersa nga nagkontrol sa ilang kaugmaon. Tungod niini, naa silay mga rituwal o pamaagi nga gibati nila nga makahatag nilag suwerte o maayong kaugmaon.
ANG GITUOHAN SA DAGHAN
ASTROLOHIYA: Gituohan sa uban nga ang ilang kaugmaon nagdepende sa posisyon sa mga bituon dihang sila gipanganak. Maong mobasa silag mga horoscope aron mahibalo kon unsay mahitabo nila, dayon molikay sa mga kapeligrohan o mangitag paagi nga molampos.
FENG SHUI: Para sa uban, ang sekreto sa malamposong kinabuhi mao ang pag-decorate sa ilang palibot o balay nga nahiuyon sa mga puwersa sa kinaiyahan. Si Lo Wing,a nga taga-Hong Kong, miingon, “Giingnan ko sa usa ka feng shui master nga aron mas mokita kog dako, magbutang kog espesyal nga crystal sa usa ka espesipikong lokasyon sulod sa tindahan.”
PAGSIMBA SA KATIGULANGAN: Gituohan sa uban nga angay nilang simbahon ang ilang namatay nga mga katigulangan o lainlaing diyos aron protektahan sila ug panalanginan. Si Van, nga taga-Vietnam, miingon, “Nagpakita kog debosyon sa akong mga katigulangan kay nagtuo ko nga moresulta nig maayong kinabuhi karon ug seguradong kaugmaon para nako ug sa akong mga anak.”
REINKARNASYON: Daghan ang nagtuo nga dihang mamatay ang usa ka tawo, siya ipanganak pag-usab ug balikbalik kining mahitabo. Nagtuo sila nga ang ilang naeksperyensiyahan karon, maayo man o daotan, maoy resulta sa ilang nahimo sa nangagi nilang kinabuhi.
Bisag daghan ang moingon nga dili tinuod ang maong mga patuotuo, sila magpahimalad gihapon, mobasag mga horoscope, mogamit ug mga Ouija® board, tarot card, ug uban pa. Para nila, basin pag makatabang ni nga mahibalo sila sa ilang kaugmaon.
UNSAY RESULTA?
Kadto bang misalig sa mga patuotuo ug mga rituwal nakabaton ug maayong kinabuhi ug seguradong kaugmaon?
Matikdi ang eksperyensiya ni Hào, nga taga-Vietnam. Aron magiyahan siya, iyang gisunod ang horoscope, feng shui, ug pagsimba sa katigulangan. Milampos ba siya? Si Hào miingon, “Nalugi ang akong negosyo, nagkautang-utang ko, nagkaproblema sa pamilya, ug na-depress.”
Si Qiuming, nga gikan sa Taiwan, nagtuo sab sa astrolohiya, reinkarnasyon, kapalaran, feng shui, ug pagsimba sa katigulangan. Pero dihang gitun-an niya kini pag-ayo, siya miingon: “Akong naamgohan nga wala magkauyon ang maong mga pagtulon-an ug mga kostumbre, ug makalibog kini. Sagad, sayop sab ang prediksiyon sa astrolohiya. Kon bahin sa reinkarnasyon, kon wala kay mahinumdoman sa imong nangaging kinabuhi, unsaon man nimo paghimog mga kausaban aron mas maayo ang sunod nimong kinabuhi?”
“Akong naamgohan nga wala magkauyon ang maong mga pagtulon-an ug mga kostumbre, ug makalibog kini.”—QIUMING, TAIWAN
Sama sa naamgohan ni Hào, Qiuming, ug sa daghang tawo, ang atong kaugmaon wala magdepende sa kapalaran, bituon, namatay nga mga katigulangan, o reinkarnasyon. Nagpasabot ba ni nga wala na gyod tay mahimo para sa atong kaugmaon?
Daghan ang mibati nga kinahanglan silang mokuhag taas nga edukasyon ug mahimong dato aron segurado ang ilang kaugmaon. Unsay nahitabo dihang gihimo kini sa uban?
a Niini nga artikulo ug sa mosunod pa, ang ubang ngalan giilisan.
b Mabasa kini sa Balaang Bibliya sa Galacia 6:7. Ang maong ideya parehas sa usa ka popular nga panultihon sa sidlakang bahin sa Asia nga Kon magtanom kag melon, moani kag melon; kon magtanom kag beans, moani kag beans.