Naa bay Kasaligang Giya Para sa Maayong Kaugmaon?

Gihisgotan sa miaging mga artikulo nga ang mga tawo misalig sa kapalaran, edukasyon, kuwarta, ug naghimog maayo aron makabaton ug maayong kaugmaon. Pero sama kinig paggamit ug sayop nga mapa aron makaabot sa destinasyon. Nagpasabot ba ni nga walay kasaligang giya para sa maayong kaugmaon? Wala.

GIYA GIKAN SA PINAKALABAW NGA PERSONA

Dihang mohimog desisyon, sagad mokonsulta ta sa mas edaran ug mas maalamon kay kanato. Sa samang paagi, makita nato ang kasaligang giya para sa atong kaugmaon gikan sa Usa nga mas dugay nang naglungtad ug mas maalamon sa tanan. Ang iyang tambag mabasa nato sa Bibliya, nga gisugdan pagsulat mga 3,500 ka tuig sa miagi.

Nganong makasalig ka sa Bibliya? Kay ang Awtor niini mao ang pinakamaalamong Persona sa uniberso, ug dugay na kaayo siyang naglungtad. Siya gitawag nga “Karaan sa mga Adlaw” ug siya “gikan sa walay sinugdanan hangtod sa walay kataposan.” (Daniel 7:9; Salmo 90:2) Siya “ang Maglalalang sa kalangitan, ang matuod nga Diyos, ang Usa nga nag-umol sa yuta.” (Isaias 45:18) Iyang gipaila ang iyang ngalan nga Jehova.—Salmo 83:18.

Kay ang Bibliya gikan sa Diyos nga nagbuhat sa tanang tawo, ang Bibliya walay gidapigan nga rasa o kultura. Ang mga tambag niini mapadapat gihapon karon ug nakatabang sa mga tawo sa lainlaing nasod. Mabatonan kini sa mas daghang pinulongan ug mas kaylap nga gipanagtag kay sa bisan unsang libro.a Busa, dali kining mabasa sa mga tawo ug magiyahan sila niini. Kining tanan nagpamatuod sa giingon sa Bibliya:

“Ang Diyos dili mapihigon, apan sa matag nasod ang tawo nga may kahadlok kaniya ug mobuhat kon unsay matarong dalawaton kaniya.”—BUHAT 10:34, 35.

Sama sa mahigugmaong ginikanan nga naghatag ug giya sa iyang mga anak, si Jehova nga Diyos maoy mahigugmaong Amahan nga nagatabang kanato pinaagi sa iyang Pulong, ang Bibliya. (2 Timoteo 3:16) Makasalig ka sa iyang Pulong, kay siya ang naghimo kanato ug nahibalo siya kon unsay pinakamaayo para nato.

KASALIGANG GIYA

Makasalig ta sa Bibliya ingong kasaligang giya sa atong kaugmaon tungod kay mga 2,000 ka tuig sa miagi, kini tukmang nagtagna sa mga hitabo sa kalibotan ug sa mga kinaiya sa mga tawo nga atong nakita karon.

MGA HITABO

“Ang nasod makiggubat batok sa nasod, ug ang gingharian batok sa gingharian. Duna unyay dagkong linog, mga kanihit sa pagkaon, ug kamatay sa lainlaing dapit.”—LUCAS 21:10, 11.

MGA KINAIYA

“Sa kataposang mga adlaw moabot ang kuyaw nga mga panahong lisod sagubangon. Kay ang mga tawo unya mahigugmaon sa kaugalingon, mahigugmaon sa kuwarta, hambogiro, mapahitas-on, magsultig daotan batok sa Diyos ug sa isigkatawo, dili masinugtanon sa ginikanan, dili mapasalamaton, dili maunongon, walay pagmahal sa isigkatawo, dili ikasabot, tigbutangbutang, walay pagpugong sa kaugalingon, bayolente, walay gugma sa pagkamaayo, traydor, gahig ulo, garboso kaayo, mahigugmaon sa kalipayan imbes mahigugmaon sa Diyos.”—2 TIMOTEO 3:1-4.

Unsay imong ikasulti dihang imong nakita nga ang mga hitabo karon dugay na diay nga gitagna sa Bibliya? Seguradong mouyon ka sa giingon ni Leung, nga gikan sa Hong Kong: “Dugay nang gisulat ang mga tagna sa Bibliya. Walay tawo nga tukmang makatagna niana. Ang Bibliya gikan gyod sa usa nga mas labaw kanato.”

Gatosan na ka tagna sa Bibliya ang nangatuman.b Pamatuod kini nga ang Bibliya Pulong gyod sa Diyos. “Ako ang Diyos, ug walay sama kanako,” miingon si Jehova. “Sukad sa sinugdan gitagna na nako ang mahitabo.” (Isaias 46:9, 10) Busa makasalig gyod ka sa giingon sa Bibliya bahin sa umaabot.

GIYA NGA MAKAHATAG NIMOG KAAYOHAN KARON UG SA WALAY KATAPOSAN

Makabenepisyo ka kon imong sundon ang giya sa Balaang Kasulatan. Niay pipila ka pananglitan.

BALANSENG PANGLANTAW SA KUWARTA UG TRABAHO

“Mas maayo pa ang usa ka hakop nga pahulay kay sa duha ka hakop nga kahago ug paggukod sa hangin.”—ECCLESIASTES 4:6.

MALIPAYONG PAMILYA

“Kinahanglang higugmaon sa matag usa ang iyang asawa sama sa iyang kaugalingon; sa laing bahin, ang asawa angay nga dunay dakong pagtahod sa iyang bana.”—EFESO 5:33.

MAAYONG RELASYON SA UBAN

“Isalikway ang kasuko ug biyai ang kapungot; ayawg kalagot ug ayaw paghimog daotan.”—SALMO 37:8.

Kon imong sundon ang tambag sa Bibliya, makabenepisyo ka karon ug makabaton sab ug maayong kaugmaon. Mabasa nato sa Bibliya ang maayong kaugmaon nga gisaad sa Diyos nga naglakip niini:

KALINAW UG KASEGUROHAN

“Mabatonan nila ang tumang kalipay tungod sa dagayang pakigdait.”—SALMO 37:11.

TANAN DUNAY BALAY UG PAGKAON

“Magtukod silag mga balay ug magpuyo niini, ug magtanom silag mga ubasan ug magkaon sa bunga niini.”—ISAIAS 65:21.

WALA NAY SAKIT O KAMATAYON

“Ang kamatayon mawala na, ug wala na unyay pagbangotan, pagtiyabaw, ug kasakit.”—PINADAYAG 21:4.

Unsay kinahanglan nimong himoon aron mabatonan ang maong kaugmaon? Basaha ang sunod nga artikulo.

a Para sa dugang impormasyon bahin sa paghubad ug pagpanagtag sa Bibliya, ablihi ang www.jw.org/ceb ug tan-awa ang GITUDLO SA BIBLIYA > KASAYSAYAN UG ANG BIBLIYA.

b Para sa dugang detalye, tan-awa ang kapitulo 9 sa librong Ang Bibliya—Pulong sa Diyos o sa Tawo? nga gipatik sa mga Saksi ni Jehova ug naa sa www.jw.org/ceb. Tan-awa ang LIBRARYA > LIBRO UG BROSYUR.