Husto ug Sayop: Ang Bibliya—Kasaligang Giya

Dili ta makaseguro nga maayog resulta ang atong himoon nga mga desisyon kon ato lang ning ibase sa atong gibati o sa gibati sa uban. Gisulti sa Bibliya ang rason kon ngano, pero dili lang kana. Naa pod ni kasaligang giya bahin sa kon unsay husto ug sayop—nga makatabang aron tinuod gyod nga magmalipayon ang atong kinabuhi.

GIYA NGA ATONG GIKINAHANGLAN

Ang Bibliya nag-ingon nga gikinahanglan gyod sa mga tawo ang giya ni Jehovaa nga Diyos ug nga dili nato kayang giyahan ang atong kaugalingon. Ingon ana ta pagkadisenyo sa Diyos. (Jeremias 10:23) Kanay rason nga nagtagana siyag mga sukdanan kon unsay husto ug sayop diha sa Bibliya. Gimahal niya ang mga tawo ug dili niya gusto nga mag-antos ta sa pait nga resulta sa sayop nga mga desisyon. (Deuteronomio 5:29; 1 Juan 4:8) Labaw sa tanan, ingong atong Maglalalang, naa siyay kaalam ug kahibalo sa paghatag natog kinamaayohang giya sa kinabuhi. (Salmo 100:3; 104:24) Pero dili gyod pugson sa Diyos ang mga tawo sa pagsunod sa iyang mga sukdanan.

Gihatag ni Jehova sa unang lalaki ug babaye, si Adan ug Eva, ang tanan nilang gikinahanglan aron tinuod silang magmalipayon. (Genesis 1:28, 29; 2:8, 15) Iya pod silang gihatagan ug simpleng mga instruksiyon ug nagdahom siya nga ila tong sundon. Pero gitugotan niya sila sa pagdesisyon kon ila bang sundon ang maong mga instruksiyon o dili. (Genesis 2:9, 16, 17) Makapaguol kay si Adan ug Eva mipili nga sundon ang ilang kaugalingong sukdanan imbes ang sukdanan sa Diyos. (Genesis 3:6) Unsay resulta? Nagmalipayon ba ang mga tawo kay sila ang nagbuot kon unsay husto ug sayop? Wala gyod. Atong nakita nga sukad pa sa una, ang pagbalewala sa mga sukdanan sa Diyos dili gyod makahatag ug tinuod nga kalinaw ug kalipay.—Ecclesiastes 8:9.

Ang Bibliya naghatag ug giya nga atong gikinahanglan aron makahimo tag maalamong mga desisyon bisag unsa pay atong kagikan. (2 Timoteo 3:16, 17; tan-awa ang kahon nga “Basahon nga Para sa Tanan.”) Konsideraha kon nganong maalamon gyod ang giya sa Bibliya.

Sayra kon nganong ang Bibliya matawag gyod ug “pulong sa Diyos.”—1 Tesalonica 2:13. Tan-awa ang video nga Kinsa ang Awtor sa Bibliya? sa jw.org.

KON NGANONG ANG UBAN WALA MOSALIG SA BIBLIYA

Ang uban moingon nga dili kuno kasaligan ang giya sa Bibliya. Niay pipila ka pananglitan.

Moingon sila: “Wala magkauyon ang giingon sa mga basahon sa Bibliya.”

Ang tinuod: Makita nato nga dili sayop ang mga rekord sa Bibliya nga morag wala magkauyon kon atong konsiderahon ang katibuk-ang rekord, kanus-a ni gisulat, ang gihunahuna sa nagsulat niini, ug ang uban pang rason.

Para sa pipila ka pananglitan, basaha ang artikulo nga “May mga Teksto ba sa Bibliya nga Nagkasumpaki?” sa jw.org.

Moingon sila: “Ang mga tawo nga nangangkong nagsunod sa Bibliya dili maayo ug binuhatan, maong dili gyod tingali maayo nga giya ang Bibliya.”

Ang tinuod: Dili Bibliya ang mabasol sa daotang binuhatan sa mga tawo nga wala magsunod sa gitudlo niini. Nagtagna ni nga daghang tawo—apil na ang mga lider sa relihiyon—nga nangangkong nagsunod sa Bibliya ang wala gyod magsunod sa gitudlo niini. Tungod niana, ang mga gitudlo sa Bibliya napasipalahan.—2 Pedro 2:1, 2.

Para sa pananglitan kon sa unsang paagi ang daghang lider sa relihiyon wala magsunod sa kon unsa gyoy gitudlo sa Bibliya, basaha ang artikulo nga “Ang Relihiyon ba Usa ka Dakong Negosyo?” sa jw.org.

Moingon sila: “Ang mga tawo nga nagsunod sa Bibliya wala magtahod sa uban nga lahi nila.”

Ang tinuod: Ang Bibliya nagdasig nato nga magpakitag pagtahod sa tanan. Gani kini nagtudlo nga . . .

dili nato hunahunaon nga mas labaw ta sa uban.—Filipos 2:3.
tahoron nato ang mga tawo bisag lahi silag opinyon o gituohan.—1 Pedro 2:17.
dili nato ipamugos ang atong kaugalingong mga opinyon.—Mateo 10:14.

Ang Bibliya nagpakita nga ang Diyos kanunayng buotan ug patas sa tanang tawo, ug nga gusto niya nga mao pod nay atong himoon.—Roma 9:14.

Para sa dugang impormasyon, basaha ang artikulo nga “Pagtahod sa Kalainan sa Matag Tawo—Sa Unsang Paagi Makatabang ang Bibliya?” sa jw.org.

NAA SA BIBLIYA ANG GIYA SA DIYOS

Gihisgotan sa Bibliya kon giunsa pagtratar ni Jehova ang mga tawo sukad pa sa una. Makatabang ni nato nga masabtan kon unsay giisip sa Diyos nga husto ug sayop, o kon unsay makaayo ug makadaot. (Salmo 19:7, 11) Makakat-on pod tag mga leksiyon nga kanunayng makatabang nato sa paghimog maalamong mga desisyon.

Pananglitan, ang tambag sa Proverbio 13:20 nag-ingon: “Ang naglakaw uban sa mga maalamon mahimong maalamon, apan ang makig-uban sa mga buangbuang masugamak sa kadaot.” Tinuod gyod ni kaniadto ug bisan sa atong panahon karon. Ang Bibliya napuno ug ingon ana ka praktikal nga mga tambag ug leksiyon.—Tan-awa ang kahon nga “Ang Walay Paglubad nga Kaalam sa Bibliya.”

Pero makapangutana tingali ka, ‘Unsaon nako pagseguro nga ang giya sa Bibliya makatabang nako karon?’ Hisgotan sa sunod nga artikulo ang pipila ka eksperyensiya nga magpamatuod nga kasaligan gyod ang giya sa Bibliya.

a Jehova ang personal nga ngalan sa Diyos.—Salmo 83:18.

ANG WALAY PAGLUBAD NGA KAALAM SA BIBLIYA

Bisag ang Bibliya gisulat halos 2,000 ka tuig na ang milabay, makatabang gihapon ni nato karon. Wala gihapon mausab ang gusto sa mga tawo nga makabatog makapatagbaw ug malipayong kinabuhi. (Ecclesiastes 1:9) Ang walay paglubad nga kaalam sa Bibliya makatabang nato nga makab-ot kana.

Pagkamatinud-anon

“Gusto namong magmatinud-anon sa tanang butang.”—Hebreohanon 13:18.
“Ang kawatan kinahanglang dili na mangawat; hinuon maghago siya.”—Efeso 4:28.

Pagtratar sa Uban

“Ang matag usa padayong magtinguha, dili sa iyang kaugalingong kaayohan, kondili nianang sa laing tawo.”—1 Corinto 10:24.
“Padayon sa pagpailob sa usag usa ug kinasingkasing nga magpinasayloay.”—Colosas 3:13.

Paghimog mga Desisyon

“Ang inosente motuo sa tanan niyang madunggan, apan ang maalamon mamalandong sa matag lakang.”—Proverbio 14:15.
“Ang tawong maalamon makakita sa kapeligrohan ug molikay niana, pero ang walay kasinatian moderetso ra ug mag-antos sa resulta.”—Proverbio 22:3.