Mga Pangutana Gikan sa mga Magbabasa

Unsay gipasabot ni apostol Pablo dihang siya miingon: “Pinaagi sa balaod ako namatay sa balaod”?—Gal. 2:19.

Si Pablo misulat: “Pinaagi sa balaod ako namatay sa balaod, aron mabuhi ko para sa Diyos.”—Gal. 2:19.

Ang gisulat ni Pablo konektado sa pangunang punto nga iyang gipasiugda sa mga kongregasyon sa Romanhong probinsiya sa Galacia. Ang pipila ka Kristohanon didto naimpluwensiyahan sa bakak nga mga magtutudlo. Ang maong mga tawo nagtudlo nga aron maluwas, ang usa kinahanglang mosunod sa Moisesnong Balaod, ilabina ang bahin sa pagtuli. Pero nahibalo si Pablo nga ang Diyos wala na magsugo nga tulion ang iyang mga alagad. Sa makapakombinsir nga paagi, iyang gipamatud-an nga bakak ang maong mga pagtulon-an ug gipalig-on ang pagtuo sa mga igsoon sa halad lukat ni Jesu-Kristo.—Gal. 2:4; 5:2.

Ang Bibliya klarong nag-ingon nga sa dihang ang usa ka tawo mamatay, siya wala nay nahibaloan o dili na maapektohan sa bisan unsa. (Eccl. 9:5) Sa dihang si Pablo miingon: “Ako namatay sa balaod,” iyang gipasabot nga wala na siya mailalom sa Moisesnong Balaod. Hinunoa, segurado si Pablo nga pinaagi sa iyang pagtuo sa halad lukat, siya nahimong ‘buhi para sa Diyos.’

Ang maong kausaban sa kahimtang ni Pablo nahitabo “pinaagi sa balaod.” Sa unsang paagi? Bag-o lang niyang gipatin-aw nga “ang tawo ipahayag nga matarong, dili pinaagi sa pagtuman sa balaod, kondili pinaagi lamang sa pagtuo kang Jesu-Kristo.” (Gal. 2:16) Tinuod, ang Balaod dunay importanteng nalampos. Si Pablo mipatin-aw sa mga taga-Galacia: “Gidugang kini aron madayag ang mga kalapasan, hangtod moabot ang kaliwat nga gisaaran.” (Gal. 3:19) Oo, gipadayag sa Balaod nga ang makasasalang mga tawo dili makasunod sa Balaod sa hingpit nga paagi ug nagkinahanglan silag pangataposan, hingpit nga halad. Busa ang Balaod nagtultol sa mga tawo ngadto sa “kaliwat,” ang Kristo. Pinaagi sa pagpakitag pagtuo kang Jesu-Kristo, ang usa mahimong ipahayag sa Diyos ingong matarong nga tawo. (Gal. 3:24) Si Pablo gipahayag nga matarong tungod kay pinaagi sa Balaod, iyang gidawat si Jesus ug siya nagpakitag pagtuo kaniya. Busa, si Pablo “namatay sa balaod” ug nahimong ‘buhi para sa Diyos.’ Wala na siya mailalom sa Balaod, kondili nailalom na sa Diyos.

Susama niana ang giingon ni Pablo sa iyang sulat sa mga taga-Roma. “Mga igsoon, kamo sab patay na sa Balaod pinaagi sa lawas sa Kristo . . . Kita nahigawas na sa Balaod kay kini wala na magpugong nato.” (Roma 7:4, 6) Kini nga teksto ug ang Galacia 2:19 nagpakita nga si Pablo wala maghisgot bahin sa pagkamatay ingong hinukmang makasasala ubos sa Balaod. Hinunoa, siya naghisgot bahin sa pagkahimong napahigawas. Siya ug ang uban nga sama niya wala na mailalom sa Balaod. Napahigawas sila tungod sa ilang pagtuo sa lukat sa Kristo.