Tabangi ang Uban nga Makalahutay sa Lisod nga mga Kahimtang

1. Kinsay sagad gamiton ni Jehova sa pagtubag sa pag-ampo sa iyang mga alagad?

NAHIBALO ba ka nga puwede kang gamiton ni Jehova aron tubagon ang kinasingkasing nga pag-ampo sa uban? Puwede ka niyang gamiton ansiyano man ka, ministeryal nga alagad, payunir, o magmamantala. Gamiton pod ka niya bata man ka o tigulang, brader man ka o sister. Dihang ang alagad ni Jehova mangayo niyag tabang, sagad gamiton sa atong Diyos ang mga ansiyano ug ubang matinumanong mga alagad sa ‘paghupay pag-ayo’ sa igsoon. (Col. 4:11) Pribilehiyo gyod nga makaalagad kang Jehova ug sa mga igsoon nianang paagiha! Makatabang ta dihang dunay sakit nga mokaylap, kalamidad, o paglutos.

TABANGI ANG UBAN DIHANG DUNAY MOKAYLAP NGA SAKIT

2. Nganong lisod tingali ang pagtabang sa uban dihang dunay mokaylap nga sakit?

² Malisdan tingali ta sa pagtabang sa uban dihang dunay mokaylap nga sakit. Pananglitan, gusto tingali tang mobisita sa atong mga higala, pero dili puwede kay delikado pa. Basin gusto natong imbitahog pangaon kadtong naglisod sa pinansiyal, pero dili pa ni posible. Gusto pod tingali natong tabangan ang uban, pero lisod nâ kon ang ato mismong pamilya nanginahanglag tabang. Bisan pa niana, maningkamot tang tabangan ang mga igsoon, ug malipay si Jehova kon himoon nato ang atong maarangan para nila. (Prov. 3:27; 19:17) Unsay atong mahimo?

3. Unsay atong makat-onan sa mga ansiyano sa kongregasyon nila Desi? (Jeremias 23:4)

³ Ang mahimo sa mga ansiyano. Kon ansiyano ka, ilha pag-ayo ang mga igsoon. (Basaha ang Jeremias 23:4.) Si Desi nga gihisgotan sa nag-unang artikulo miingon, “Ang mga ansiyano sa among grupo sa pagsangyaw kanunayng makig-uban namo sa ministeryo ug sa lingawlingaw.”b Tungod niana, nahimong mas sayon para sa maong mga ansiyano ang pagtabang kang Desi dihang nahitabo ang COVID-19 nga pandemic ug namatyan siyag mga membro sa ilang pamilya.

4. Nganong natabangan sa mga ansiyano si Desi, ug unsay gitudlo niini sa mga ansiyano?

⁴ Si Desi miingon, “Kay suod na ko daan sa mga ansiyano, wala ra ko maglisod nga sultihan sila sa akong gibati ug gikabalak-an.” Unsay makat-onan sa mga ansiyano? Atimana ang mga igsoon sa dili pa mahitabo ang lisod nga kahimtang. Pakigsuod nila. Kon dili nimo sila mabisita kay dunay mikaylap nga sakit, kontaka sila sa laing paagi. Si Desi miingon, “Usahay lainlaing ansiyano ang manawag o mo-text nako sa usa ka adlaw. Natandog ko sa mga teksto nga ilang gi-share nako, bisan pag pamilyar na kaayo ko adtong mga tekstoha.”

5. Unsay puwedeng himoon sa mga ansiyano aron mahibaloan ang panginahanglan sa mga igsoon ug makatabang nila?

⁵ Aron mahibaloan kon unsay panginahanglan sa mga igsoon, pangutan-a sila, pero sa paagi nga dili sila maulawan. (Prov. 20:5) Igo pa ba ang ilang pagkaon, tambal, ug ubang suplay? Nameligro ba sila nga mawad-ag trabaho o puy-anan? Nanginahanglan ba silag tabang sa pag-aplay para sa ayuda sa gobyerno? Si Desi nakadawat ug materyal nga tabang gikan sa mga igsoon. Pero ang nakatabang gyod niya nga makalahutay sa iyang mga pagsulay mao ang emosyonal ug espirituwal nga tabang sa mga ansiyano. Siya miingon, “Ang mga ansiyano nag-ampo uban nako. Di na kaayo ko kahinumdom sa ilang gisulti, pero kahinumdom gihapon ko sa akong gibati. Mora bag giingnan ko ni Jehova, ‘Wala ka mag-inusara.’”—Isa. 41:10, 13.

6. Unsay mahimo sa mga igsoon sa pagtabang sa uban? (Tan-awa ang hulagway.)

⁶ Ang mahimo sa uban. Siyempre ang mga ansiyano maoy manguna sa pagtabang sa mga igsoon. Pero gusto ni Jehova nga kitang tanan modasig ug motabang sa uban. (Gal. 6:10) Bisag gamay ra nga tabang ang atong mahatag sa igsoon nga nasakit, dako nig epekto kaniya. Ang usa ka bata puwedeng magpadalag card o drowing aron dasigon ang usa ka brader. Ang usa ka batan-on puwedeng mamalit o mohimo sa uban pang gikinahanglan sa usa ka sister. Ang uban tingali maglutog pagkaon nga puwedeng ibilin sa gawas sa balay sa igsoon nga nasakit. Siyempre kon kaylap ang sakit, ang tanan sa kongregasyon nanginahanglag pagdasig. Tingali dili una ta mohawa human sa tigom aron maestorya nato ang mga igsoon, diha man sa Kingdom Hall o pinaagig videoconferencing. Ang mga ansiyano nanginahanglan pod ug pagdasig. Ang ubang igsoon nagpadalag card aron pasalamatan ang mga ansiyano, nga sagad mas busy pa gyod dihang dunay sakit nga mokaylap. Maayo gyod nga himoon nato ang atong maarangan aron ‘padayon tang magdinasigay ug maglig-onay’!—1 Tes. 5:11.

TABANGI ANG UBAN PANAHON SA KALAMIDAD

7. Nganong dili lalim nga makasinatig kalamidad?

⁷ Kalit nga mausab ang kinabuhi sa tawo tungod sa kalamidad. Ang uban mawad-an sa ilang kabtangan o balay, o mamatyan pa gani. Mahitabo pod ni sa mga igsoon. Unsaon nato sila pagtabang?

8. Unsay puwedeng himoon sa mga ansiyano ug sa mga ulo sa pamilya samtang wala pay kalamidad?

⁸ Ang mahimo sa mga ansiyano. Mga ansiyano, tabangi ang mga igsoon nga makapangandam sa kalamidad. Paneguroa nga ang tanan sa kongregasyon nahibalo kon unsay angay nilang himoon aron luwas sila ug kon unsaon nila pagkontak ang mga ansiyano. Si Margaret nga gihisgotan sa nag-unang artikulo miingon: “Ang among mga ansiyano mihatag ug bahin sa lokal nga panginahanglan, ug ila ming gipahinumdoman nga posible gihapong mahitabo ang wildfire. Miingon sila nga kon pabakweton mi sa mga awtoridad o kon delikado na ang situwasyon, kinahanglang mohawa dayon mi.” Nakatabang kaayo to nga pahinumdom kay paglabayg lima ka semana, nahitabo ang grabeng wildfire. Panahon sa pamilyahanong pagsimba, puwedeng hisgotan sa ulo sa pamilya kon unsay angayng himoon sa kada usa. Kon andam ang inyong pamilya, mas kalmado mo dihang moabot ang kalamidad.

9. Unsay himoon sa mga ansiyano sa dili pa ug human sa kalamidad aron maseguro nga organisado ang ilang mga paningkamot?

⁹ Kon ikaw ang tigdumala sa inyong grupo sa pagsangyaw, paneguroa nga samtang wala pay kalamidad, naa na kay saktong contact information sa tanan nimong kauban. Irekord ni ug paneguroa nga kinabag-ohan pirme ang contact information. Pinaagi niini, makontak nimo ang mga igsoon panahon sa kalamidad ug mahibaloan nimo ang ilang kahimtang. Pahibaloa dayon ang koordinetor sa mga ansiyano, nga maoy mokontak sa tigdumala sa sirkito. Ang inyong pagtinabangay dakog mahimo. Human sa wildfire, ang tigdumala sa sirkito nila Margaret 36 ka oras nga nagpulaw sa pag-organisar sa paningkamot sa mga ansiyano nga kontakon ug atimanon ang mga 450 ka igsoon nga namakwet. (2 Cor. 11:27) Busa naatiman ang tanan nga nagkinahanglag kapuy-an.

10. Nganong importante para sa mga ansiyano ang pag-shepherding? (Juan 21:15)

¹⁰ Apil sa buluhaton sa mga ansiyano ang paghatag ug espirituwal ug emosyonal nga tabang. (1 Ped. 5:2) Panahon sa kalamidad, kinahanglang seguroon sa mga ansiyano nga ang kada igsoon luwas ug naay pagkaon, sinina, ug kapuy-an. Pero bisag pila ka bulan na ang molabay, ang mga igsoon magkinahanglan tingali gihapon ug espirituwal ug emosyonal nga tabang. (Basaha ang Juan 21:15.) “Nagkinahanglag panahon una mabalik sa normal ang ilang kinabuhi,” miingon si Harold, nga membro sa usa ka Komite sa Sangang Buhatan ug nakaestoryag daghang igsoon nga nakasinatig mga kalamidad. “Tingali OK na unta sila, pero mahinumdoman na pod nila ang ilang namatay nga minahal, ang butang nga naay sentimental value, o ang ilang eksperyensiya nga hapit silang mamatay. Tungod ani, tingali maguol na pod kaayo sila. Wala nâ magpasabot nga kulang silag pagtuo kay normal lang gyod nâ nga reaksiyon.”

11. Unsay gikinahanglan sa mga pamilya human sa kalamidad?

¹¹ Ang mga ansiyano nagpadapat gyod sa tambag nga ‘mohilak uban sa mga naghilak.’ (Roma 12:15) Ang mga igsoon nga nakasinatig kalamidad kinahanglan tingaling pasaligan nga wala gyod mawala ang gugma ni Jehova o sa mga igsoon kanila. Maningkamot ang mga ansiyano nga tabangan ang mga pamilya nga makapadayon sa ilang espirituwal nga rutina sama sa pag-ampo, pagtuon, pagtambong sa tigom, ug pagsangyaw. Dasigon sab sa mga ansiyano ang mga ginikanan nga tabangan ang ilang mga anak nga magpokus sa mga butang nga dili gyod madaot sa bisan unsang kalamidad. Mga ginikanan, pahinumdomi ang inyong mga anak nga si Jehova ilang Higala ug nga dili gyod niya sila pasagdan. Pasabta pod sila nga naa silay mga igsoon sa tibuok kalibotan nga andam motabang nila.​—1 Ped. 2:17.

12. Unsay mahimo sa uban aron tabangan ang mga igsoon nga naapektohan sa mga kalamidad? (Tan-awa ang hulagway.)

¹² Ang mahimo sa uban. Kon ang kalamidad nahitabo duol sa inyong lugar, pangutan-a ang mga ansiyano kon unsay imong ikatabang. Tingali puwede nimong papuy-on ang mga namakwet o ang mga construction volunteer. Puwede pod nimong hatdag pagkaon ug suplay ang mga igsoon nga nanginahanglan. Kon ang kalamidad nahitabo sa layolayo nga lugar, makatabang gihapon ka. Sa unsang paagi? Puwede nimong iampo ang mga igsoon. (2 Cor. 1:8-11) Makatabang pod ka sa paghatag ug hinabang pinaagi sa pag-donate para sa tibuok kalibotang buluhaton. (2 Cor. 8:2-5) Kon kaya nimong moadto aron motabang sa naapektohan nga lugar, sultihi ang mga ansiyano nga gusto kang moboluntaryo. Kon imbitahon ka sa pagboluntaryo, tingali makadawat kag dugang pagbansay aron magamit ka kon asa ug kon kanus-a ka mas gikinahanglan.

TABANGI ANG MGA IGSOON NGA MAKALAHUTAY SA PAGLUTOS

13. Unsang mga kalisdanan ang giatubang sa mga igsoon sa mga lugar nga gidili ang atong buluhaton?

¹³ Sa mga lugar nga gidili ang atong buluhaton, mas lisod ang kinabuhi tungod sa paglutos. Ang mga igsoon didto maglisod pod, masakit, o mamatyan. Pero tungod sa pagdili, ang mga ansiyano dili bastabasta makabisita o makakontak niadtong nagkinahanglag pagdasig. Mao nay kahimtang ni Andrei, nga gihisgotan sa miaging artikulo. Naay sister sa ilang grupo sa pagsangyaw nga naglisod sa pinansiyal. Unya naaksidente pa gyod ang sister. Daghang operasyon ang kinahanglang himoon maong dili siya makatrabaho. Nakita ni Jehova ang kahimtang sa sister ug iyang gipalihok ang mga igsoon nga tabangan siya bisan pa sa mga restriksiyon ug sa pandemic.

14. Sa unsang paagi ang mga ansiyano makapakitag maayong ehemplo sa pagsalig kang Jehova?

¹⁴ Ang mahimo sa mga ansiyano. Si Andrei nag-ampo ug gihimo niya kon unsay kaya niyang himoon. Giunsa pagtubag ni Jehova ang iyang pag-ampo? Migamit si Jehova ug mga igsoon nga mas makahimo sa pagtabang sa sister. Ang uban naghatod niya sa doktor ug ang uban naghatag niyag kuwarta. Gipalihok sila ni Jehova sa paghimo kon unsay kaya nilang himoon, ug iyang gipanalanginan ang ilang kaisog ug mga paningkamot. (Heb. 13:16) Mga ansiyano, kon ang buluhaton gidili, idelegar ang ubang himoonon. (Jer. 36:5, 6) Labaw sa tanan, salig kang Jehova. Tabangan ka niya sa pag-atiman sa panginahanglan sa mga igsoon.

15. Unsay atong himoon aron padayon tang magkahiusa bisan pa sa paglutos?

¹⁵ Ang mahimo sa uban. Kon idili ang atong buluhaton, basig pipila ra ka igsoon ang atong makauban. Maong kinahanglan gyod nga mentinahon nato ang maayong relasyon. Si Satanas ang imong kaaway, dili ang mga igsoon. Palabya ang ilang kasaypanan, ug kon naa may dili pagsinabtanay, paningkamoti nga magkauliay dayon mo. (Prov. 19:11; Efe. 4:26) Pangitag paagi nga makatabang ka sa uban. (Tito 3:14) Ang gihimo sa mga igsoon nga pagtabang sa sister nga nanginahanglan maayog epekto sa ilang grupo sa pagsangyaw. Nagkasuod sila, samag pamilya.​—Sal. 133:1.

16. Base sa Colosas 4:3, 18, unsaon nato pagtabang ang gilutos nga mga igsoon?

¹⁶ Daghan kaayong igsoon ang nag-alagad kang Jehova bisan pa sa mga restriksiyon sa gobyerno. Ang uban nila gipriso tungod sa ilang pagtuo. Makaampo ta para nila ug sa ilang mga pamilya. Puwede pod natong iampo kadtong nagpameligro sa ilang kagawasan aron dasigon ug itagana ang panginahanglan sa naprisong mga igsoon ug depensahan sila sa korte.c (Basaha ang Colosas 4:3, 18.) Hinumdomi nga ang imong mga pag-ampo dakog ikatabang nilang tanan.​—2 Tes. 3:1, 2; 1 Tim. 2:1, 2.

17. Unsaon nimo pagpangandam karon para sa paglutos?

¹⁷ Ikaw ug ang imong pamilya makapangandam na karon para sa paglutos. (Buh. 14:22) Dili kinahanglang imadyinon nimo ang tanang daotang butang nga posibleng mahitabo. Hinuon, palig-ona ang imong relasyon kang Jehova ug tabangi ang imong mga anak nga mosalig pod kaniya. Kon usahay mabalaka ka, ibubo ang imong kasingkasing sa Diyos. (Sal. 62:7, 8) Hisgoti uban sa imong pamilya ang tanang rason kon nganong makasalig mo kaniya.d Sama anang naay kalamidad, ang imong pagpangandam ug pagsalig kang Jehova makatabang aron ang imong mga anak magmalinawon ug dili mahadlok.

18. Unsay mahitabo sa umaabot?

¹⁸ Ang kalinaw nga gikan sa Diyos makapabati natong luwas. (Filip. 4:6, 7) Pinaagi niini, gitabangan ta ni Jehova nga mahimong kalmado bisan pag dunay sakit nga mokaylap o makaatubang tag kalamidad o paglutos. Iyang gigamit ang kugihang mga ansiyano aron atimanon ta. Ug kitang tanan gihatagan niyag kahigayonan nga makatabang sa uban. Ang kalinaw nga atong nasinatian karon mag-andam nato sa pag-atubang sa mas lisod nga mga pagsulay sa umaabot, apil na sa “dakong kasakitan.” (Mat. 24:21) Nianang panahona, kinahanglan natong mentinahon ang atong kalinaw ug tabangan ang uban nga mentinahon pod ang ilang kalinaw. Pero human sa dakong kasakitan, dili na ta makaatubang ug mga kalisdanan nga makapabalaka nato. Maeksperyensiyahan na gyod nato ang dugay nang gipangandoy ni Jehova para nato​—ang tinuod nga kalinaw nga molungtad hangtod sa hangtod.​—Isa. 26:3, 4.