Andam Ka ba Kon Mahitabo ang Kinaiyanhong Katalagman?
1. Nganong maalamon ang pagpangandam alang sa mga katalagman?
1 Kada tuig, milyonmilyong tawo sa tibuok kalibotan, apil na ang atong mga kaigsoonan, ang naapektohan sa mga linog, mga tsunami, mga bagyo, ug mga baha. Sanglit ang kinaiyanhong mga katalagman moabot man nga wala damha ug mahimong makaapektar kanato, maalamon ang pagpangandam.—Prov. 21:5.
2. Nganong angay natong pahibaloon ang mga ansiyano sa atong kinabag-ohang adres ug mga numero sa telepono?
2 Antes sa Katalagman: Usahay ang mga awtoridad makapasidaan sa nagsingabot nga mga katalagman. Hinungdanon gayod ang pagpatalinghog niining mga pasidaana. (Prov. 22:3) Sa maong mga kahimtang, maningkamot ang mga ansiyano sa pagkontak sa tanang membro sa kongregasyon aron sa pagtabang kanila sa paghimog gikinahanglang mga pagpangandam. Human sa katalagman, ang mga ansiyano maningkamot usab sa pagkontak sa tanang sakop sa kongregasyon aron sa pagsusi kon luwas ba sila ug aron mahibaloan kon unsang tabang ang ilang gikinahanglan. Mahimong mausik ang bililhong panahon kon ang mga ansiyano walay gihuptang kinaulahiang impormasyon sa pagkontak kanila. Busa makaayo alang sa mga magmamantala nga ipahibalo sa sekretaryo ug sa ilang magtatan-aw sa pagtuon sa libro ang ilang kinabag-ohang adres ug mga numero sa telepono.
3. Sa unsang paagi makakooperar kita sa mga ansiyano kon kita nagpuyo sa dapit nga kanunayng maapektohan ug katalagman?
3 Kon ang kongregasyon anaa sa dapit nga kanunayng maapektohan ug katalagman, mahimong hangyoon sa mga ansiyano ang mga magmamantala sa paghatag sa ngalan ug numero sa telepono sa usa ka paryente o higala nga wala magpuyo sa maong dapit nga mahimong kontakon engkasog dunay emerhensiya. Kini magpaarang sa mga ansiyano sa pagpangita niadtong mibakwet. Ang mga ansiyano mahimong magplano usab kon unsay himoon sa kongregasyon panahon sa emerhensiya nga naglakip sa paghimog listahan sa kinahanglanong mga suplay panahon sa emerhensiya nga huptan sa matag usa, mga kahikayan sa pagbakwet, ug mga plano kon sa unsang paagi tabangan kadtong may linaing mga panginahanglan. Hinungdanon gayod ang pagkooperar niining mahigugmaong mga kahikayan.—Heb. 13:17.
4. Unsay angay natong himoon kon modangat ang katalagman sa atong dapit?
4 Human sa Katalagman: Unsay angayng himoon kon modangat ang katalagman sa imong dapit? Paneguroa nga matagan-an ang dinaliang mga panginahanglan sa imong pamilya. Kon makaarang ka, tabangi usab ang ubang naapektohan. Paningkamoting makontak dayon ang imong magtatan-aw sa pagtuon sa libro o ang laing ansiyano. Angay kining himoon bisan pag luwas ka ra ug wala manginahanglag tabang. Kon nanginahanglan kag tabang, magmasaligon nga ang imong mga igsoon naningkamot gayod sa pagtabang kanimo. (1 Cor. 13:4, 7) Hinumdomi nga nahibalo si Jehova sa imong kahimtang; salig kaniya sa pagpalig-on kanimo. (Sal. 37:39; 62:8) Magmaalisto sa mga kahigayonan sa paghatag ug espirituwal ug emosyonal nga pagpaluyo sa uban. (2 Cor. 1:3, 4) Himoa dayon ang imong teokratikanhong mga kalihokan.—Mat. 6:33.
5. Sa unsang paagi kitang mga Kristohanon maapektohan sa katalagman?
5 Bisan pag ang katalagman makapabalaka gayod kanato, kita makalantaw sa umaabot nga may pagsalig. Sa dili madugay mahanaw na ang tanang katalagman. (Pin. 21:4) Sa pagkakaron, kita makahimog makataronganong mga lakang sa pagpangandam panahon sa kalisdanan samtang atong huptan ang atong kadasig sa pagmantala sa maayong balita ngadto sa uban.