3 | Mga Ehemplo sa Bibliya

GIHISGOTAN SA BIBLIYA ANG . . . Matinumanong mga lalaki ug babaye nga “may pagbati nga sama kanato.”—SANTIAGO 5:17.

Kon Unsay Gipasabot Niana

Ang Bibliya dunay daghang tinuod nga estorya bahin sa mga lalaki ug babaye nga nakaeksperyensiyag lainlaing emosyon. Samtang basahon nato ang ilang mga eksperyensiya, makakita tingali tag karakter sa Bibliya nga may pagbati nga sama kanato.

Kon sa Unsang Paagi Kini Makatabang

Gusto natong tanan nga naay makasabot nato. Pero tinuod ni ilabina dihang naa tay problema sa mental health. Dihang magbasa tag Bibliya, makat-onan nato ang bahin sa mga tawo nga sama natog panghunahuna ug pagbati. Ingong resulta, makita nato nga ang uban nag-antos pod sama nato, ug dili ta mobating nag-inusara dihang mabalaka ta ug mag-atubang ug makapatugaw nga mga emosyon.

Mabasa sa Bibliya ang mga gisulti niadtong mibati nga wala na silay paglaom. Nakaingon na ba ka sukad, ‘Dili na nako kaya’? Mibati ana si Moises, Elias, ug David.—Numeros 11:14; 1 Hari 19:4; Salmo 55:4.
Ang Bibliya naghisgot bahin sa usa ka babaye nga ginganlag Ana nga “pait kaayo ang gibati” kay dili siya makaanak ug gibiaybiay siya pag-ayo sa iyang karibal nga asawa tungod niana.—1 Samuel 1:6, 10.
Ang Bibliya naghisgot bahin sa usa ka tawo nga ginganlag Job. Bisag lig-on siyag pagtuo kang Jehova, siya nag-antos sa grabeng emosyonal nga kasakit ug miingon: “Gikasilagan ko ang akong kinabuhi; dili na ko gustong mabuhi.”—Job 7:16.

Ang pagkahibalo kon sa unsang paagi malamposong naatubang niini nga mga karakter sa Bibliya ang negatibong panghunahuna makapalig-on nato ug makatabang nato sa paglahutay.

Ang Bibliya Nakatabang Kang Kevin

Kon Unsay Epekto sa Bipolar Disorder Kanako

“Nadayagnos ko nga naay bipolar disorder sa hapit na kong mag-50. Naay mga panahon nga mobati ko nga kaya nakong atubangon ang bisan unsang problema. Pero naa poy mga panahon nga mobati kong dili na nako kayang mabuhi pa.”

Kon sa Unsang Paagi Nakatabang Nako ang Bibliya

“Nakatabang nako ang karakter sa Bibliya nga si apostol Pedro. Nakahimo siyag mga sayop nga nakapabati niyang walay pulos. Pero imbes nga magsigeg hunahuna ana, nakig-uban si Pedro sa iyang mga higala nga nagmahal niya. Dihang mosugmat ang akong bipolar disorder, magsige kog hunahuna sa akong mga sayop ug mobati kong walay pulos. Sama kang Pedro, naningkamot ko nga kanunayng makig-uban sa akong mga higala nga gustong motabang nako.

“Ang laing karakter sa Bibliya nga nakatabang pag-ayo nako mao si Haring David. Pirme siyang maguol sa iyang situwasyon ug nagbasol siya sa iyang mga sayop. Makasabot ko niya kay naa koy masulti o mabuhat nga basolan nako sa ulahi. Mahupay ko sa giingon ni David sa Salmo 51. Sa bersikulo 3, si David miingon: ‘Nahibalo ko pag-ayo sa akong mga kalapasan, ug ang akong sala kanunayng anaa sa akong atubangan.’ Mao gyod ni ang akong bation dihang grabe ang akong depresyon, kay maglisod kog hunahuna ug positibo bahin sa akong kaugalingon. Pero nakasabot pod ko sa gihangyo ni David sa bersikulo 10: ‘Putlia ang akong kasingkasing, Oh Diyos, ug hatagi kog espiritu nga bag-o ug lig-on.’ Mao pod nay akong ihangyo sa Diyos aron matabangan ko nga mausab ang akong panghunahuna sa akong kaugalingon. Dayon ang bersikulo 17 makapahupay nako. Kini nag-ingon: ‘Ang kasingkasing nga gun-ob ug dugmok, Oh Diyos, dili nimo isalikway.’ Kini nga bersikulo nagpasalig nako nga gimahal ko sa Diyos.

“Kon magpokus ko sa mga ehemplo sa Bibliya ug sa kon unsay ginahimo sa Diyos para nako karon, molig-on ang akong paglaom sa umaabot. Mahimong mas tinuod nako ang mga saad sa Bibliya ug makatabang ni nako nga padayong molahutay.”