Ang Pagpakitag Personal nga Interes Moresultag Daghang mga Panalangin

Si Papa ansiyano sa United Church of Canada, maong kada semana paapilon ko niya ug ang akong igsoon sa Sunday school. Human ana, mokuyog mi niyag simba pagkaalas 11 sa buntag. Inigkahapon, mouban mi kang Mama sa Kingdom Hall. Nakita gyod namo ang kalainan niining duha ka relihiyon.

Gi-share ni Mama ang iyang bag-ong tinuohan ngadto sa iyang dugay nang mga higala nga si Bob ug Marion Hutcheson, nga midawat pod sa kamatuoran. Niadtong 1958, gidala ko sa magtiayong Hutcheson uban sa ilang tulo ka anak sa Divine Will Internasyonal nga Asembliya, nga gipahigayon sulod sa walo ka adlaw didto sa New York City. Dihang mahinumdom ko adto, makaingon ko nga dili diay to sayon nga gikuyog ko nila. Pero naapresyar nako ang ilang gihimo kay kadto nga asembliya ang usa sa dili nako malimtan sa akong kinabuhi.

ANG PERSONAL NGA INTERES SA MGA IGSOON NAKATABANG NAKO

Niadtong batan-on pa ko, ang among pamilya nagbuhig mga hayop. Tungod ana, gusto kaayo kong mahimong veterinarian. Gisultihan ni Mama ang usa ka ansiyano bahin ani. Mahigugmaon kong gipahinumdoman sa ansiyano nga nagpuyo na ta sa “kataposang mga adlaw” ug iya kong gipangutana kon unsa kahay epekto sa akong relasyon kang Jehova kon moeskuwela ko sa unibersidad ug pipila ka tuig. (2 Tim. 3:1) Maong midesisyon ko nga dili na moeskuwela sa unibersidad.

Naghunahuna gihapon ko kon unsay akong buhaton human ko maka-graduate sa high school. Bisag mosangyaw ko kada Sabado ug Dominggo, wala ko mag-enjoy sa ministeryo ug dili nako ma-imagine ang akong kaugalingon nga magpayunir. Gikombinsir ko sa akong dili Saksi nga papa ug uyoan nga motrabahog full-time sa dako nga insurance company sa Toronto. Taas ug posisyon didto ang akong uyoan maong gidawat nako ang trabaho.

Sa Toronto, pirme kong mag-overtime sa trabaho ug makig-uban sa mga dili Saksi, maong dili na ko regular sa pagtambong sa tigom ug pagsangyaw. Sa primero, mipuyo ko uban sa akong dili Saksi nga lolo, pero pagkamatay niya, kinahanglan kong mangitag bag-ong kapuy-an.

Ang magtiayong Hutcheson, nga nagdala nako sa 1958 nga kombensiyon, mora nag akong mga ginikanan. Ila kong gipapuyo sa ilang balay ug gitabangan nga mouswag sa espirituwal. Pagka-1960, ako ug ang ilang anak nga si John nabawtismohan. Nagpayunir si John, maong nadasig ko nga mas magkugi sa pagsangyaw. Nakita sa mga igsoon ang akong pag-uswag ug sa ngadtongadto, natudlo ko ingong alagad sa Teokratikanhong Tunghaan sa Ministeryo.a

NAKAKITAG MAAYO KAAYONG PARTNER UG NAGPAYUNIR

Pagka-1966, nagminyo mi ni Randi Berge, dasig nga payunir nga gusto kaayong mag-alagad sa lugar nga mas dakog panginahanglan. Ang among nagapanawng tigdumala nagpakitag personal nga interes namo, ug iya ming gidasig nga motabang sa kongregasyon sa Orillia, Ontario. Maong nag-empake mi ug mibalhin.

Pag-abot namo sa Orillia, nagregular payunir dayon ko. Natakdan ko sa kadasig ni Randi! Nagkugi ko sa pagpayunir ug nalipay kaayo ko sa paggamit sa Bibliya ug sa pagtabang sa mga tawo nga masabtan ang kamatuoran. Makapalipay gyod nga nakatabang mi sa usa ka buotang magtiayon sa Orillia nga mohimog mga kausaban ug moalagad kang Jehova.

NAGKAT-ON UG BAG-ONG PINULONGAN UG NAG-USAB SA AMONG PANGHUNAHUNA

Dihang mibisita mi sa Toronto, nakaila nako si Arnold MacNamara, usa sa mga brader nga nagdumala sa Bethel. Nangutana siya kon gusto ba ming mag-espesyal payunir. Mitubag dayon ko: “Siyempre! Bisag asa basta ayaw lang sa Quebec!” Negatibog panghunahuna ang mga taga-Canada nga English ug pinulongan ngadto sa mga tawo sa probinsiya sa Quebec nga French ug pinulongan, ug naimpluwensiyahan ko niini. Gubot kaayo niadtong panahona sa Quebec. Ang mga tawo didto nagprotesta kay gusto nilang ibulag ang Quebec sa Canada.

Si Arnold mitubag, “Sa pagkakaron, sa Quebec lang nagapadala ang sangang buhatan ug mga espesyal payunir.” Busa misugot dayon ko. Nahibalo ko nga gusto ni Randi nga mag-alagad didto. Sa ulahi, nakita nako nga kini ang usa sa pinakamaayong desisyon nga among nahimo!

Human sa among lima ka semana nga klase sa French nga pinulongan, kami ni Randi uban ang usa pa ka magtiayon miadto sa Rimouski, Quebec, nga mga 540 ka kilometro northeast sa Montreal. Daghan pa mig kinahanglang makat-onan, kay diha gani tigom nga nasipyat kog basa sa pahibalo. Miingon ko nga sa umaabot namo nga kombensiyon, daghan mig “ostrich nga mga delegado” imbes “Austrian nga mga delegado.”

Sa Rimouski, nakauban namong upat ang upat pa ka dasig nga tagsaanong sister ug ang magtiayong Huberdeaus uban sa ilang duha ka anak nga babaye. Ang pamilyang Huberdeaus nag-abang ug balay, ug kami nga mga payunir didto pod namuyo. Mag-amot-amot mi aron makatabang sa bayranan sa abang. Ang balay naay pito ka kuwarto, ug gitawag namo nig White House kay puti ang kolor niini. Kasagaran, mga 12 hangtod 14 ka tawo ang magsak-anan didto. Kay mga espesyal payunir mi ni Randi, mosangyaw mi sa buntag, hapon, ug gabii, maong nalipay mi kay naa mi makauban pirme sa pagsangyaw, bisan sa mga gabii nga tingtugnaw.

Nasuod kaayo mi sa maong matinumanong mga payunir ug mora na namo silag pamilya. Usahay, manglingkod mi palibot sa bonfire o maglutog pierogi, dumpling nga klaseklaseg palaman. Ang usa sa mga brader musikero, maong sagad magkantakanta ug manayaw mi inigka-Sabado sa gabii.

Daghan kaayo ang interesado sa kamatuoran didto sa Rimouski! Sulod sa lima ka tuig, makapalipay kaayo nga daghang Bible study ang nagpabawtismo. Ang among kongregasyon naa nay mga 35 ka magmamantala.

Sa Quebec, nabansay mi pag-ayo ingong mga magsasangyaw. Nakita namo kon giunsa mi pagtabang ni Jehova sa among ministeryo ug materyal nga panginahanglan. Nakat-onan sab namong higugmaon ang mga tawo didto, ang ilang pinulongan nga French, ug ang ilang kultura. Tungod ana, nakat-onan pod namong higugmaon ang ubang kultura.—2 Cor. 6:13.

Sa wala damha, giingnan mi sa sangang buhatan nga mobalhin sa lungsod sa Tracadie, nga naa sa sidlakang baybayon sa New Brunswick. Naglisod mig desisyon kay bag-o pa lang mi mipirmag kontrata nga moabang mi sa usa ka apartment. Naa pod koy kontrata nga magtudlog part-time sa usa ka eskuwelahan. Dugang pa, ang uban namong Bible study bag-o lang nabawtismohan ug nagtukod pa pod mig Kingdom Hall.

Giampo namo ni pag-ayo pagka-Sabado ug Dominggo ug mibisita mi sa Tracadie, nga lahi kaayo sa Rimouski. Pero kay gusto man ni Jehova nga mobalhin mi didto, nakadesisyon ming moadto. Among gisulayan si Jehova ug nakita namo nga gitangtang niya ang tanang babag nga makapugong unta namo sa pagbalhin. (Mal. 3:10) Ug ang lig-ong espirituwalidad ni Randi, ang iyang pagkaandam mosakripisyo, ug sense of humor nakapasayon sa among pagbalhin.

Usa lang ang ansiyano sa among bag-ong kongregasyon, si Robert Ross. Nagpayunir siya didto uban sa iyang asawa nga si Linda, ug nagpadayon silag puyo didto human matawo ang ilang unang anak. Bisag busy sila sa pag-atiman sa ilang gamay pa nga anak, nadasig kaayo mi ni Randi sa ilang pagkamaabiabihon, determinasyon, ug kadasig sa ministeryo.

NALIPAYNG MAG-ALAGAD BISAG ASA NGA MAY PANGINAHANGLAN

Human mi magpayunir sa Tracadie sulod sa duha ka tuig, nakadawat na pod mig laing sorpresa—gidapit ko nga mag-alagad ingong tigdumala sa sirkito. Pito ka tuig ming nag-alagad sa English nga mga sirkito, dayon nareasayn mi sa French nga sirkito sa Quebec. Sa akong mga pakigpulong, komendahan ko sa among tigdumala sa distrito nga si Léonce Crépeault. Pero pirme siyang mangutana, “Unsaon kaha nimo ni paghimo nga mas praktikal?”b Ang iyang personal nga interes nakatabang nga mahimong mas espesipiko ug daling masabtan ang akong mga pakigpulong.

Ang usa sa mga asaynment nga dili gyod nako malimtan mao ang akong asaynment sa 1978 “Victorious Faith” Internasyonal nga Kombensiyon sa Montreal. Naasayn ko adto sa Food Service. Gibanabana namo nga 80,000 ang manambong, ug bag-o na ang kahikayan sa pagpakaon kanila. Nabag-o na ang tanan—ang equipment, menu, ug ang paagi sa pag-andam sa mga pagkaon. Naa mi mga 20 ka chiller nga container van, nga usahay dili mogana. Sa adlaw una pa ang kombensiyon, ang estadyum gigamit para sa usa ka sports event, maong tungang gabii na mi nakasulod aron magset-up. Ug kinahanglan namong painiton daan ang mga oven sa dili pa mohayag aron makaluto mig pamahaw! Gipangkapoy mi, pero daghan kog nakat-onan sa akong kaubang mga boluntaryo nga kugihan, hamtong, ug lingaw ikauban. Nagkasuod mi, ug amigo gihapon nako sila hangtod karon. Di gyod namo malimtan ang maong makapalipay nga kombensiyon sa Quebec, diin nahitabo ang grabe kaayong paglutos sa katuigan sa 1940 ug 1950!

Daghan kog nakat-onan sa akong kaubang mga tigdumala panahon sa dagkong kombensiyon sa Montreal. Dihay tuig nga si David Splane, nga karon membro na sa Nagamandong Lawas, ang convention overseer. Sa ulahi nga kombensiyon dihang ako nay giasayn sa maong asaynment, gisuportahan gyod ni David ang kahikayan.

Pagka-2011, human sa 36 ka tuig nga malipayon nakong pag-alagad ingong tigdumala sa sirkito uban ni Randi, giasayn ko nga mahimong instruktor sa School for Congregation Elders. Sulod sa duha ka tuig, 75 ka lainlaing balay ang among nasak-an, pero wala gyod masayang ang tanan namong sakripisyo. Inigkahuman sa usa ka semana nga klase, mapasalamaton kaayo ang mga ansiyano kay nakita nila nga naghunahuna gyod ang Nagamandong Lawas sa espirituwalidad sa mga ansiyano.

Sa ulahi, nahimo kong instruktor sa School for Kingdom Evangelizers. Sagad ang mga estudyante mabug-atan sa busy kaayo nga eskedyul: mga pito ka oras silang maglingkod sa klase kada adlaw, tulo ka oras maghimog homework kada gabii, ug naa pa gyod silay upat o lima ka asaynment kada semana. Ginasultihan nako ug sa akong kaubang instruktor ang mga estudyante nga dili na nila mahimo kon wala ang tabang ni Jehova. Dili gyod nako malimtan ang kalipay sa mga estudyante dihang makita nila nga tungod sa ilang pagsalig kang Jehova, nahimo nila ang mga butang nga abi nilag dili nila kayang himoon.

ANG PAGPAKITAG PERSONAL NGA INTERES MORESULTAG DAGHANG PANALANGIN

Ang personal nga interes nga gipakita ni Mama sa uban nakatabang sa iyang mga Bible study nga mouswag ug nakatabang pa gani nga mausab ang panglantaw ni Papa sa kamatuoran. Tulo ka adlaw human mamatay si Mama, nakurat mi kay mitambong si Papa sa pakigpulong publiko sa Kingdom Hall, ug padayon siyang mitambong sa mga tigom sa misunod nga 26 ka tuig. Bisag wala gyod mabawtismohi si Papa, giingnan ko sa mga ansiyano nga siya ang pirmeng unang moabot sa mga tigom kada semana.

Si Mama maayo pod nga ehemplo para namong magsoon. Ang tulo nako ka igsoon ug ang ilang mga bana matinumanong nag-alagad kang Jehova. Duha sa akong mga igsoon ang nag-alagad sa Bethel—ang usa sa Portugal ug ang usa sa Haiti.

Karon, kami ni Randi nag-alagad ingong espesyal payunir sa Hamilton, Ontario. Niadtong naa pa mi sa sirkitong buluhaton, nalipay mi nga mouban sa mga igsoon sa ilang mga balikduaw ug Bible study. Pero karon, nalipay ming makita ang amo mismong mga Bible study nga miuswag sa espirituwal. Samtang nasuod mi sa mga igsoon sa among bag-ong kongregasyon, nadasig mi nga makita kon giunsa sila pagtabang ni Jehova sa maayo ug lisod nga mga panahon.

Dihang mahinumdom mi sa among mga naeksperyensiyahan, maapresyar gyod namo ang personal nga interes nga gipakita sa daghang igsoon kanamo. Maong naningkamot pod mi nga magpakitag personal nga interes sa uban ug dasigon sila nga ihatag ang ilang pinakamaayo sa pag-alagad kang Jehova. (2 Cor. 7:6, 7) Pananglitan, dihay pamilya nga regular payunir ang asawa ug duha ka anak. Gipangutana nako ang bana kon nakahunahuna ba siya nga magpayunir. Mitubag siya nga tulo ka payunir ang iyang gisuportahan. Busa gipangutana nako siya, “Sa imong hunahuna, kinsa kahay mas makasuportar nila, ikaw o si Jehova?” Gidasig nako siya nga sulayan ang pagpayunir aron maeksperyensiyahan niya ang kalipay nga gibati sa iyang pamilya. Paglabayg unom ka bulan, payunir na siya.

Gusto namo ni Randi nga padayong ‘sultihan ang sunod nga kaliwatan’ bahin sa “katingalahang mga buhat” ni Jehova, ug nanghinaot mi nga magmalipayon pod sila sa pag-alagad kang Jehova sama namo.—Sal. 71:17, 18.