Padayon sa Pagbantay Aron Masuklan ang Tentasyon

1-2. (a) Unsay pasidaan ni Jesus sa iyang mga tinun-an? (b) Nganong ang mga tinun-an nadaog sa ilang kahuyangan? (Tan-awa sab ang mga hulagway.)

“ANDAM ang espiritu, apan luya ang unod.”a (Mat. 26:41b) Kining mga pulonga nagpakita nga nasabtan ni Jesus ang atong pagkadili-hingpit. Pero iya pod ning giingon aron pasidan-an ta nga dili sobrang mosalig sa atong kaugalingon. Sayosayo nianang gabhiona, gisulti sa mga tinun-an ang ilang lig-ong determinasyon nga dili nila biyaan ang ilang Agalon. (Mat. 26:35) Gusto nilang himoon kon unsay maayo. Pero wala sila mahibalo nga dali ra diay mohuyang ang ilang determinasyon kon naa sila sa lisod nga situwasyon. Busa, gitambagan sila ni Jesus: “Padayon mo sa pagbantay ug sa pag-ampo aron dili mo madaog sa tentasyon.”—Mat. 26:41a.

² Pero unsay gihimo sa mga tinun-an dihang gidakop si Jesus? Miunong ba sila niya, o nagpadaog sila sa kahadlok ug mibiya? Makapaguol kay ang mga tinun-an wala makapadayon sa pagbantay. Ang dili nila gustong himoon mao hinuon ang ilang gihimo—ilang gibiyaan si Jesus.—Mat. 26:56.

3. (a) Nganong angay natong likayan ang sobrang pagsalig sa kaugalingon? (b) Unsay atong hisgotan niini nga artikulo?

³ Angay gyod tang mag-amping nga dili sobrang mosalig sa atong kaugalingon. Siyempre, determinado ta nga dili mohimog bisan unsa nga makapasuko kang Jehova. Pero dili ta hingpit ug puwede tang matental sa paghimog dili maayo. (Roma 5:12; 7:​21-23) Usahay makaatubang tag wala damhang mga situwasyon diin lisod kaayong suklan ang sayop nga mga tinguha. Busa aron makapabiling maunongon kang Jehova, kinahanglan natong sundon ang tambag ni Jesus nga padayong magbantay aron masuklan ang tentasyon sa paghimog sala. Kini nga artikulo motabang nato sa paghimo niana. Una, hisgotan nato kon unsa nga mga situwasyon nga ilabinang kinahanglan tang magbantay. Sunod, atong hisgotan kon sa unsang paagi maproteksiyonan nato ang atong kaugalingon sa tentasyon. Dayon, konsiderahon nato kon unsay atong himoon aron makapadayon ta sa pagbantay.

UNSANG MGA SITUWASYON NGA KINAHANGLANG PADAYON TANG MAGBANTAY?

4-5. Nganong importante nga padayon tang magbantay bisan sa ginagmayng sala?

⁴ Bisan ang ginagmayng sala puwedeng makapahuyang sa atong relasyon kang Jehova. Puwede pod ning moresulta sa paghimog mas seryosong sala.

⁵ Kitang tanan makaatubang ug tentasyon. Pero ang ubang tentasyon lisod kaayong suklan ilabina kon huyang ta nianang bahina. Pananglitan, malisdan tingali ang usa nga suklan ang tentasyon sa paghimog seksuwal nga imoralidad. Ang uban tingali malisdan pag-ayo nga suklan ang ilang tinguha sa paghimog hugaw nga mga buhat, sama sa masturbasyon o pagtan-awg pornograpiya. Ang uban pod daling mahadlok sa tawo, sobra ang pagsalig sa kaugalingon, o kaha daling masuko. Sama sa giingon ni Santiago, “ang matag usa masulayan dihang siya ginadani ug ginahaylo sa iyang kaugalingong tinguha.”—Sant. 1:14.

6. Sa unsa ta kinahanglang magmatinud-anon?

⁶ Unsa kaha nga mga situwasyon nga dali ra kaayo kang matental? Kon dili nato ilhon ang atong mga kahuyangan o kaha maghunahuna nga lig-on kaayo ta, gilimbongan nato ang atong kaugalingon. (1 Juan 1:8) Gani, si Pablo miingon nga bisan kadtong “hamtong nga mga Kristohanon” mahimong matental kon dili sila padayong magbantay. (Gal. 6:1) Maong kinahanglan tang magmatinud-anon sa atong kaugalingon ug ilhon kon asa ta huyang.—2 Cor. 13:5.

7. Sa unsa ta angay nga mas magbantay? Paghatag ug pananglitan.

⁷ Sa dihang mailhan na nato kon asa ta huyang ug dali rang matental, unsay angay natong himoon? Palig-onon nato ang atong depensa! Pananglitan, sa panahon sa Bibliya, ang pinakadaling atakehon nga bahin sa paril sa siyudad mao ang mga ganghaan o gate. Busa daghan kaayong guwardiya ang gibutang diha sa ganghaan aron maproteksiyonan ang siyudad. Sa samang paagi, angay nga mas magbantay ta sa mga situwasyon diin huyang ta o mas daling matental.—1 Cor. 9:27.

KON UNSAON NGA MAPROTEKSIYONAN NATO ANG ATONG KAUGALINGON SA TENTASYON

8-9. Unsay angay untang gihimo sa batan-ong lalaki nga gihisgotan sa Proverbio kapitulo 7 aron dili siya makahimog seryosong sala? (Proverbio 7:​8, 9, 13, 14, 21)

⁸ Unsay atong himoon aron dili ta matental sa paghimog sala? Konsideraha ang nahitabo sa batan-ong lalaki nga gihisgotan sa Proverbio kapitulo 7. Nakahimo siyag seksuwal nga imoralidad uban sa imoral nga babaye. Ang bersikulo 22 nag-ingon nga “dihadiha” ang batan-ong lalaki misunod kaniya. Pero gipakita sa miaging mga bersikulo nga naa na siyay mga gihimo una pa niana, nga anam-anam nga miresulta sa pagpakasala.

⁹ Unsay iyang gihimo? Una, sa pagkagabii, “miagi siya sa eskina duol sa balay sa [imoral nga] babaye.” Dayon, mas mipaduol pa gyod siya sa balay sa babaye. (Basaha ang Proverbio 7:​8, 9.) Sunod, dihang nakita niya ang babaye, wala siya mopalayo. Hinuon, misugot siya nga halokan siya sa babaye. Naminaw pod ang batan-on samtang nagsulti ang babaye bahin sa mga halad sa panag-ambit nga iyang gitanyag, tingali aron maghunahuna ang batan-on nga dili siya daotan nga babaye. (Basaha ang Proverbio 7:​13, 14, 21.) Kon gilikayan pa sa batan-on ang maong mga kapeligrohan, naproteksiyonan unta niya ang iyang kaugalingon sa maong tentasyon ug dili unta siya makasala.

10. Sa unsang paagi ang usa ka Kristohanon karon makahimog sayop sama sa batan-ong lalaki?

¹⁰ Naay giingon si Solomon nga puwede pong mahitabo sa usa ka alagad ni Jehova. Tingali makahimo siyag seryosong sala ug maghunahuna nga ang tanan nahitabo “dihadiha.” Moingon tingali siya, “Kalit ra tong nahitabo.” Pero dihang iyang hunahunaon kon unsa gyoy nahitabo, iya tingaling maamgohan nga nakahimo na siyag dili maalamong mga desisyon una pa siya nakahimog seryosong sala. Apil tingali ani ang pagpakig-uban sa mga tawo nga wala mahigugma kang Jehova, pagpilig dili maayong mga kalingawan, o pagsigeg adto sa kuwestiyonableng website o lugar. Wala na pod tingali siya nagaampo, nagabasag Bibliya, nagatambong sa mga tigom, o nagasangyaw. Sama sa batan-ong lalaki nga gihisgotan sa Proverbio, ang iyang nahimong sala dili tingali “dihadiha” nahitabo.

11. Unsay angay natong himoon aron malikayan ang paghimog sala?

¹¹ Unsang leksiyon ang atong makat-onan? Gawas nga likayan nato ang paghimog sala, kinahanglang likayan pod nato ang mga butang nga moresulta sa pagpakasala. Mao gyod nay giingon ni Solomon human niya hisgoti ang nahitabo sa batan-ong lalaki ug sa imoral nga babaye. Bahin sa babaye, si Solomon nagtambag: “Ayawg adto sa iyang mga agianan.” (Prov. 7:25) Siya miingon pod:“Palayo niya; ayawg duol sa entrada sa iyang balay.” (Prov. 5:​3, 8) Oo, maproteksiyonan nato ang atong kaugalingon kon mopalayo ta sa mga situwasyon nga moresulta sa paghimog sala.b Apil ani ang paglikay sa mga situwasyon o kalihokan nga dili ra tingali sayop para sa mga Kristohanon pero puwedeng moresulta sa paghimog dili maayo.—Mat. 5:​29, 30.

12. Unsay determinasyon ni Job, ug sa unsang paagi ni nakatabang niya nga malikayan ang tentasyon? (Job 31:1)

¹² Aron malikayan ang mga situwasyon nga moresulta sa paghimog sala, kinahanglang palig-onon nato ang atong determinasyon. Mao nay gihimo ni Job. Siya ‘nakigsaad sa iyang mga mata’ nga dili gyod motan-aw nga may kaibog sa ubang babaye. (Basaha ang Job 31:1.) Kay lig-on kaayo ang iyang determinasyon ug iya gyod ning gisunod, nalikayan niya ang mga situwasyon nga puwedeng moresultag pagpanapaw. Kon naa pod ta niana nga determinasyon, malikayan nato ang bisan unsa nga posibleng makatental nato.

13. Nganong kinahanglan natong bantayan ang atong hunahuna? (Tan-awa sab ang mga hulagway.)

¹³ Kinahanglan pod natong bantayan ang atong hunahuna. (Ex. 20:17) Nagtuo ang uban nga dili ra sayop kon mag-imagine sila sa ilang kaugalingon nga naghimog dili maayo, basta wala lang ni nila aktuwal nga gibuhat. Sayop gyod na nga panghunahuna. Kon ang usa magsigeg hunahuna ug dili maayong mga butang, mas modako ang iyang tinguha nga himoon na. Tungod niana, samag gibutang niya ang iyang kaugalingon sa makapatental nga situwasyon, ug maglisod na hinuon siya sa pagsukol niana. Tinuod, motungha usahay sa atong hunahuna ang sayop nga mga tinguha. Kon mahitabo na, importante nga ato dayon ning isalikway ug pulihan ug maayong mga butang. Kon ato ning himoon, malikayan nato nga mosamot ang sayop nga tinguha nga lisod na hinuong suklan, nga puwedeng moresulta sa paghimog seryosong sala.—Filip. 4:8; Col. 3:2; Sant. 1:​13-15.

14. Unsa pay laing makatabang aron masuklan nato ang tentasyon?

¹⁴ Unsa pay atong mahimo aron masuklan ang tentasyon? Kinahanglang kombinsido ta nga ang pagsunod kanunay sa mga balaod ni Jehova makahatag natog kaayohan. Usahay malisdan tingali ta nga ipahiuyon ang atong mga hunahuna ug tinguha sa mga sukdanan ni Jehova. Pero kon maningkamot ta sa paghimo niini, magmalipayon gyod ta.

15. Sa unsang paagi ang pag-ugmad ug hustong mga tinguha makatabang nato nga masuklan ang tentasyon?

¹⁵ Kinahanglan natong ugmaron ang hustong mga tinguha. Kon makakat-on ta nga ‘dumtan ang daotan ug higugmaon ang maayo,’ mas molig-on ang atong determinasyon nga himoon kon unsay husto ug malikayan nato ang mga situwasyon nga moresulta sa paghimog sala. (Amos 5:15) Ang hustong mga tinguha motabang pod nato nga makapabiling lig-on dihang makaatubang tag makapatental nga situwasyon nga dili nato malikayan o wala nato dahoma.

16. Sa unsang paagi ang espirituwal nga mga kalihokan motabang nato nga makapadayon sa pagbantay? (Tan-awa sab ang mga hulagway.)

¹⁶ Unsaon nato pag-ugmad ang hustong mga tinguha? Kinahanglan tang makigbahin sa espirituwal nga mga kalihokan kutob sa atong maarangan. Kon motambong ta sa mga tigom o mosangyaw, mas molig-on ang atong tinguha nga mapalipay si Jehova ug dili ta daling matental sa paghimog dili maayo. (Mat. 28:​19, 20; Heb. 10:​24, 25) Kon atong basahon ug tun-an ang Pulong sa Diyos ug mamalandong niana, mas molig-on ang atong determinasyon nga higugmaon kon unsay maayo ug dumtan kon unsay daotan. (Jos. 1:8; Sal. 1:​2, 3; 119:​97, 101) Hinumdomi, giingnan ni Jesus ang iyang mga tinun-an: “Padayon . . . sa pag-ampo aron dili mo madaog sa tentasyon.” (Mat. 26:41) Busa dihang mogahin tag panahon sa pag-ampo sa atong langitnong Amahan, atong gipakita nga nangayo ta sa iyang tabang ug makapalig-on ni sa atong determinasyon nga lipayon si Jehova.—Sant. 4:8.

PADAYON SA PAGBANTAY

17. Unsa nga kahuyangan ang padayong gisuklan ni Pedro?

¹⁷ Naay mga kahuyangan nga tingali bug-os na natong nadaog. Pero naa poy ubang kahuyangan nga tingali kinahanglan natong suklan sa taas nga panahon. Konsideraha ang kahimtang ni apostol Pedro. Nagpadala siya sa kahadlok sa tawo dihang iyang gilimod si Jesus sa tulo ka higayon. (Mat. 26:​69-75) Pero kini nga kahuyangan morag nadaog na ni Pedro kay sa ulahi, maisogon siyang nagsangyaw atubangan sa Sanhedrin. (Buh. 5:​27-29) Apan paglabay sa pipila ka tuig, kay ‘nahadlok sa tinuli’ nga mga Kristohanon, wala na siya makig-uban sa Hentil nga mga Kristohanon sa pagpangaon. (Gal. 2:​11, 12) Klaro nga mibalik ang kahuyangan ni Pedro. Tingali wala pa niya bug-os madaog ang iyang kahadlok sa tawo.

18. Unsay posibleng mahitabo sa uban natong mga kahuyangan?

¹⁸ Tingali parehas tag kahimtang ni Pedro. Naa seguro tay mga kahuyangan nga abi natog nadaog na nato. Pananglitan, ang usa ka brader miingon: “Nasuklan nako ang pagtan-awg pornograpiya sulod sa 10 ka tuig, ug nagtuo gyod ko nga nadaog na nako ang akong kahuyangan. Wala ko magdahom nga sama diay nig bangis nga hayop nga nagtago ra ug naghulat sa hustong panahon sa pag-atake.” Pero maayo kaayo ang gihimo sa brader kay wala gyod siya mosurender. Nakat-onan niya nga kinahanglan gyod siyang mohimog paningkamot kada adlaw aron masuklan ang iyang kahuyangan, ug tingali padayon niya kining himoon sa tibuok niyang kinabuhi niining sistemaha. Sa tabang sa iyang asawa ug sa mga ansiyano, mas mihimo pa gyod siyag mga paningkamot aron masuklan ang pagtan-awg pornograpiya.

19. Sa unsang paagi madaog nato ang atong balikbalik nga kahuyangan?

¹⁹ Unsay atong himoon aron madaog nato ang balikbalik nga kahuyangan ug dili magpadala niana? Kinahanglan natong sundon ang tambag ni Jesus: ‘Padayon sa pagbantay.’ Bisan sa mga panahon nga gibati nimo nga lig-on ka, padayong likayi ang mga situwasyon nga makapatental nimo. (1 Cor. 10:12) Padayong himoa ang mga paagi nga nakatabang na nimo nga masuklan ang imong kahuyangan. Ang Proverbio 28:14 nag-ingon: “Malipayon ang tawo nga kanunayng nagbantay.”—2 Ped. 3:14.

MGA PANALANGIN KON MAGPADAYON TA SA PAGBANTAY

20-21. (a) Unsang mga panalangin ang atong madawat kon padayon natong suklan ang mga tentasyon? (b) Kon himoon nato ang atong bahin sa pagsukol sa tentasyon, unsa poy himoon ni Jehova? (2 Corinto 4:7)

²⁰ Makaseguro ta nga kon padayon natong suklan ang tentasyon, dili gyod masayang ang atong mga paningkamot. Ang “temporaryong kalipay” sa pagpakasala layo ra kaayo kompara sa kalipay nga atong bation kon sundon nato ang mga sukdanan ni Jehova. (Heb. 11:25; Sal. 19:8) Tungod na kay gidisenyo ta niya nga magkinabuhi uyon sa iyang mga sukdanan. (Gen. 1:27) Busa kon sundon nato si Jehova, mabatonan nato ang hinlong konsensiya ug ang kahigayonan nga mabuhi hangtod sa hangtod.—1 Tim. 6:12; 2 Tim. 1:3; Jud. 20, 21.

²¹ Tinuod, “luya ang unod.” Pero wala ni magpasabot nga wala na tay mahimo sa atong mga kahuyangan. Si Jehova andam mohatag ug kusog nga atong gikinahanglan. (Basaha ang 2 Corinto 4:7.) Pero matikdi nga ang ihatag sa Diyos mao ang kusog o gahom nga labaw sa kasarangan. Sa ato pa, naa tay kinahanglang himoon sa atong bahin. Kinahanglan natong gamiton ang atong kasarangan nga gahom, o kaugalingong kusog, aron masuklan ang tentasyon. Ato ning responsibilidad adlaw-adlaw. Kon himoon nato na, makasalig ta nga tubagon ni Jehova ang atong mga pag-ampo para sa dugang kusog nga atong gikinahanglan. (1 Cor. 10:13) Oo, sa tabang ni Jehova, makapadayon ta sa pagbantay aron masuklan ang tentasyon.