Kaya Nimong Suklan ang Sayop nga mga Tinguha

1. Unsay gipaningkamotang suklan sa tanang dili hingpit nga mga tawo?

NAKASULAY na ba ka nga kusog kaayo ang imong tinguha nga buhaton ang butang nga gidumtan ni Jehova? Kon mao, ayawg hunahunaa nga ikaw ray nag-atubang ana. Ang Bibliya nag-ingon: “Walay tentasyon nga miabot kaninyo gawas nianang sagad sa mga tawo.” (1 Cor. 10:13)a Kini nagpasabot nga bisag unsa pay imong giatubang, giatubang pod na sa uban. Wala ka mag-inusara, ug pinaagi sa tabang ni Jehova, kaya gyod nimong suklan ang sayop nga mga tinguha.

2. Unsa nga mga tentasyon ang tingali giatubang sa ubang igsoon ug mga Bible study? (Tan-awa sab ang mga hulagway.)

² Ang Bibliya nag-ingon: “Ang matag usa masulayan dihang siya ginadani ug ginahaylo sa iyang kaugalingong tinguha.” (Sant. 1:14) Lahilahi ang atong mga kahuyangan, maong lahilahi pod ang puwedeng makadani nato. Pananglitan, ang uban madani tingali nga makigsekso sa dili nila kapikas. Ang uban pod madani nga makigsekso sa kaparehas nila nga lalaki ug babaye. Kadtong mihunong na sa pagtan-aw ug pornograpiya basin mobati na pod ug kusog nga tinguha nga mobalik sa ilang daotang buhat. Mao pod tingali nay bation niadtong mga tawo nga naay bisyo kaniadto, sama sa paghuboghubog ug pag-drugs. Pipila lang ni sa gipaningkamotang suklan sa ubang igsoon ug mga Bible study. Maong mobati pod ta usahay sa gibati ni apostol Pablo, kinsa misulat: “Dihang gusto nakong buhaton ang matarong, ang daotan ania kanako.”—Roma 7:21.

3. Unsa kahay bation sa usa kon magsigeg balikbalik sa iya ang sayop nga tinguha?

³ Kon magbalikbalik ang sayop nga tinguha, basin mobati ka nga wala nay mahimo, nga mora bag dili nimo kayang suklan ang maong tentasyon. Basin mobati pod ka nga wala nay paglaom, nga mora bag dili na ka dalawaton kang Jehova tungod kay naa kay ingon ana nga tinguha. Pero makaseguro ka nga kini nga mga pagbati dili gyod tinuod. Niini nga artikulo, atong tubagon ang duha ka pangutana: (1) Nganong mobati ta usahay nga wala nay mahimo ug wala nay paglaom? (2) Unsay imong himoon aron madaog ang imong sayop nga mga tinguha?

KON UNSAY GUSTO NI SATANAS NGA ATONG BATION

4. (a) Nganong gusto ni Satanas nga bation nato nga dili nato kayang suklan ang tentasyon? (b) Nganong makaseguro ta nga kaya natong suklan ang sayop nga mga tinguha?

⁴ Gusto ni Satanas nga bation nato nga dili nato kayang suklan ang tentasyon. Nahibalo gyod si Jesus nga si Satanas maningkamot sa pagtental nato, maong iya tang gitudloan sa pag-ampo: “Ayawg itugot nga madaog mi sa tentasyon, apan luwasa mi gikan sa usa nga daotan.” (Mat. 6:13) Si Satanas miingon nga kon makaatubang tag mga tentasyon, dili na ta mosunod kang Jehova. (Job 2:​4, 5) Pero ang tinuod, si Satanas ang wala magpabiling matinumanon kang Jehova kay nagpadala siya sa iyang kaugalingong tinguha. Nagtuo pa gyod siya nga parehas ta niya, nga biyaan dayon nato si Jehova kon makaatubang tag tentasyon. Nagtuo pa gani siya nga matental pod ang hingpit nga Anak sa Diyos. (Mat. 4:​8, 9) Pero hunahunaa ni: Wala ba gyod tay mahimo sa pagsukol sa sayop nga mga tinguha? Naa! Mouyon gyod ta sa giingon ni apostol Pablo: “Naa koy kusog sa pag-atubang sa tanang butang tungod kaniya nga naghatag nakog gahom.”—Filip. 4:13.

5. Nganong makaseguro ta nga naay pagsalig si Jehova nga kaya natong suklan ang sayop nga mga tinguha?

⁵ Dili sama kang Satanas, si Jehova may pagsalig nga kaya natong suklan ang sayop nga mga tinguha. Nganong nahibalo ta niana? Tungod kay si Jehova nagtagna nga naay dakong panon sa matinumanong mga alagad nga makalabang buhi sa dakong kasakitan. Makapadasig kaayo na. Si Jehova, kinsa dili mamakak, nag-ingon nga dili kay gamay ra ang makasulod sa bag-ong kalibotan, kondili daghan kaayo. Sila hinlo sa panan-aw ni Jehova, kay “ilang gilabhan ang ilang tag-as nga besti ug gipaputi kini sa dugo sa Kordero.” (Pin. 7:​9, 13, 14) Klaro nga si Jehova wala gyod maghunahuna nga wala tay mahimo sa pagsukol sa sayop nga mga tinguha.

6-7. Unsa pay gusto ni Satanas nga atong bation, ug ngano?

⁶ Gawas nga gusto ni Satanas nga mobati tang wala nay mahimo sa pagsukol sa sayop nga mga tinguha, gusto pod niya nga mobati tang wala nay paglaom, nga mora bag dili ta dalawaton kang Jehova tungod kay naa tay ingon ana nga mga tinguha. Pero nahibalo ta nga si Satanas ang walay paglaom, kay gihukman na siya ni Jehova nga dili angayng mabuhi hangtod sa hangtod. (Gen. 3:15; Pin. 20:10) Kay wala na may paglaom si Satanas, gusto pod niya nga bation nato nga wala tay paglaom—ilabina kay nahibalo siya nga puwede natong madawat ang panalangin nga imposible na niyang mabatonan. Pero dili ta parehas ug kahimtang ni Satanas. Gani, ang Bibliya nagpasalig nato nga wala ta hukmi ni Jehova. Hinuon, gusto siyang motabang nato “kay dili niya gusto nga naay malaglag kondili gusto niya nga ang tanan maghinulsol.”—2 Ped. 3:9.

⁷ Busa kon nagtuo ta nga wala tay mahimo o wala tay paglaom nga masuklan ang sayop nga mga tinguha, sa tinuod lang, atong gisundog ang panghunahuna ni Satanas. Kon klaro natong masabtan nga panghunahuna kini ni Satanas, mas molig-on ang atong determinasyon nga suklan siya.—1 Ped. 5:​8, 9

KON UNSAY ATONG BATION TUNGOD SA ATONG PAGKAMAKASASALA

8. Gawas pa sa daotang mga buhat, unsa pay gitumong sa sala? (Salmo 51:5) (Tan-awa sab ang “Termino Gipatin-aw.”)

⁸ Gawas pa kang Satanas, naa pay laing rason kon nganong mobati tingali ta nga wala nay mahimo ug wala nay paglaom nga masuklan ang sayop nga mga tinguha. Tungod kana sa atong makasasalang kahimtang, nga atong napanunod sa atong unang mga ginikanan, si Adan ug Eva.b—Job 14:4; basaha ang Salmo 51:5.

9-10. (a) Unsay epekto sa sala kang Adan ug Eva? (Tan-awa sab ang hulagway.) (b) Unsay epekto sa sala kanato?

⁹ Konsideraha kon unsay epekto sa sala kang Adan ug Eva. Human sila mosupak kang Jehova, nanago sila ug gitabonan nila ang ilang lawas. Bahin sa ilang gihimo, ang Pagtugkad sa Kasulatan nag-ingon: “Ang sala maoy nakaingon nga sila mibati sa pagkasad-an, kabalaka, pagkawalay-kasegurohan, kaulaw.” Kini nga mga pagbati gipakasamag mga kuwarto sa usa ka balay diin natanggong si Adan ug Eva. Igo ra silang makabalhinbalhin sa mga kuwarto, pero dili gyod sila makagawas sa balay. Dili gyod sila makalingkawas sa ilang makasasalang kahimtang.

¹⁰ Pero dili ta parehas ug kahimtang ni Adan ug Eva. Ngano? Kay dili sama kang Adan ug Eva, kita gilukat gikan sa atong mga sala. Tungod sa lukat, mahinloan ta gikan sa sala ug makabaton tag hinlong konsensiya. (1 Cor. 6:11) Bisan pa ana, napanunod gihapon nato ang ilang pagkamakasasala, maong normal lang nga mobati pod tag pagkasad-an, kabalaka, kawalay-kasegurohan, ug kaulaw. Gani ang Bibliya nag-ingon nga ang sala padayong naggapos sa katawhan, bisan niadtong wala makahimog sala nga “sama sa paglapas ni Adan.” (Roma 5:14) Bisan pag makapaguol ning hunahunaon, dili ni angayng mopabati nato nga wala nay mahimo ug wala nay paglaom. Kaya natong suklan kini nga mga pagbati. Sa unsang paagi?

11. Kon mobati ta nga dili nato kayang suklan ang sayop nga mga tinguha, unsay angay natong himoon ug ngano? (Roma 6:12)

¹¹ Tungod kay dili ta hingpit, usahay mobati tingali ta nga wala tay mahimo sa pagsukol sa sayop nga mga tinguha. Sama bag ang atong pagkamakasasala nagsigeg “sulti” nato nga dili nato ni kayang suklan. Pero dili ta angayng magpadala niana nga pagbati. Ngano? Kay ang Bibliya nag-ingon nga kaya natong suklan ang sala aron dili ni “padayong maghari” kanato. (Basaha ang Roma 6:12.) Nagpasabot ni nga kita ang naay kontrol sa atong kaugalingon ug makapili ta nga dili magpadala sa sayop nga mga tinguha. (Gal. 5:16) Dako kaayog pagsalig si Jehova nga madaog nato ang tentasyon, kay kon wala pa siyay pagsalig nato, dili unta ta niya ingnan nga suklan kini. (Deut. 30:​11-14; Roma 6:6; 1 Tes. 4:3) Klaro nga naa gyod tay mahimo aron suklan ang sayop nga mga tinguha.

12. Kon mobati ta nga wala na tay paglaom nga masuklan ang sayop nga mga tinguha, unsay atong buhaton ug ngano?

¹² Sa samang paagi, kon mobati ta nga wala na tay paglaom, nga mora bag dili na ta dalawaton kang Jehova tungod kay naa tay sayop nga mga tinguha, angay natong hinumdoman nga tungod lang ni sa atong pagkadili-hingpit ug dili ta angay nga magpadala niini. Ngano? Kay ang Bibliya nagtudlo nato nga si Jehova nakasabot sa atong makasasalang kahimtang. (Sal. 103:​13, 14) Siya “nahibalo sa tanang butang” bahin nato, apil na kon sa unsang paagi ang atong napanunod nga pagkadili-hingpit nakaimpluwensiya nato ug maoy hinungdan nga naa tay tendensiya sa paghimog dili maayo. (1 Juan 3:​19, 20) Kon atong suklan ang sayop nga mga tinguha ug dili magpadala niini, hinlo gihapon ta sa panan-aw ni Jehova. Nganong makaseguro ta niana?

13-14. Kon naa tay sayop nga mga tinguha, nagpasabot ba ni nga dili na ta uyonan ni Jehova? Ipatin-aw.

¹³ Dili kalikayan nga mosantop usahay sa atong hunahuna ang sayop nga mga tinguha. Pero gipakita sa Bibliya nga kaya natong kontrolahon ang atong kaugalingon aron dili nato kana mabuhat. Pananglitan, ang ubang mga Kristohanon sa Corinto niadtong unang siglo mga homoseksuwal kaniadto. Si Pablo misulat: “Ingon niana ang pipila kaninyo kaniadto.” Nagpasabot ba ni nga wala na gyod sila mobati ug bisan unsang tinguha nga mohimog homoseksuwal nga mga buhat? Dili ta makaingon niana, kay sagad kini nga mga tinguha lisod kaayong tangtangon. Pero kadtong mga Kristohanon nga nagpugong sa ilang kaugalingon ug wala magpadala sa ilang sayop nga mga tinguha dalawaton kang Jehova. Giisip niya sila nga “nahugasan na.” (1 Cor. 6:​9-11) Sama nila, puwede pod kang isipon ni Jehova nga nahinloan na basta dili ka magpadaog sa sayop nga mga tinguha.

¹⁴ Bisag unsa pang sayop nga mga tinguha ang imong ginasuklan, kaya gyod nimo nang madaog. Dili tingali nimo bug-os mawala ang sayop nga mga tinguha, pero puwede nimong pugngan ang imong kaugalingon ug dili ‘buhaton ang mga butang nga gipangandoy sa unod ug sa imong hunahuna.’ (Efe. 2:3) Unsay imong buhaton aron madaog nimo ang sayop nga mga tinguha?

KON UNSAON NGA MADAOG ANG SAYOP NGA MGA TINGUHA

15. Aron madaog nato ang sayop nga mga tinguha, nganong kinahanglang magmatinud-anon ta sa atong kaugalingon?

¹⁵ Aron madaog nimo ang sayop nga mga tinguha, kinahanglang magmatinud-anon ka sa imong kaugalingon bahin sa imong mga kahuyangan. Ayawg ilara ang imong kaugalingon pinaagi sa “bakak nga pangatarongan.” (Sant. 1:22) Ayawg pakamenosa ang problema pinaagi sa pag-ingon, ‘Aw, mas kusog pa man gani moinom nang uban!’ Ayaw pod basola ang uban tungod sa imong nahimo, sama anang moingon ka, ‘Dili man unta ko matental sa pagtan-awg pornograpiya kon buotan ug mahigugmaon lang unta ang akong asawa.’ Ngano? Kay kon imo nang himoon, mas dali kang madala sa tentasyon. Maong ayaw ipakamatarong ang imong sayop, bisan sa imong hunahuna. Hinuon, dawata ug angkona nga nasayop ka.—Gal. 6:7.

16. Unsay makatabang aron molig-on ang imong determinasyon nga himoon kon unsay husto?

¹⁶ Gawas nga kinahanglan kang magmatinud-anon bahin sa imong mga kahuyangan, kinahanglan pod nimong palig-onon ang imong determinasyon nga dili magpadaog niana. (1 Cor. 9:​26, 27; 1 Tes. 4:4; 1 Ped. 1:​15, 16) Obserbahi kon unsa nga klase sa tentasyon ang lisod kaayo para nimo nga suklan ug kon kanus-a pod ka sagad malisdan sa pagsukol niini. Pananglitan, mas malisdan ba ka nga suklan ang tentasyon kon gikapoy ka o kon gabii na kaayo? Hunahunaa daan kon unsa nga situwasyon ang imong maatubang ug kon unsa poy imong himoon aron masuklan kini. Angay nimo ning himoon sa dili pa motungha ang tentasyon.—Prov. 22:3.

17. Unsay atong makat-onan kang Jose? (Genesis 39:​7-9) (Tan-awa sab ang mga hulagway.)

¹⁷ Konsideraha kon unsay gihimo ni Jose dihang gitental siya sa asawa ni Potipar. Dihadiha siyang mibalibad ug wala gyod siya magpadaog sa tentasyon. (Basaha ang Genesis 39:​7-9.) Unsa may gipakita niini? Kini nagpakita nga sa wala pa siya tentala sa asawa ni Potipar, nahibalo na daan si Jose kon unsay iyang baroganan bahin sa pagpakigsekso sa asawa sa laing tawo. Sa samang paagi, sa dili pa motungha ang makapatental nga situwasyon, kinahanglang palig-onon na nimo ang imong determinasyon nga himoon kon unsay husto. Nianang paagiha, mas sayon nimong masuklan ang tentasyon kay nakadesisyon na man ka daan.

“PADAYONG SULAYI”

18. Unsay imong himoon aron madaog ang imong sayop nga mga tinguha? (2 Corinto 13:5)

¹⁸ Aron masuklan ang sayop nga mga tinguha, kinahanglan nimong ‘padayong sulayan’ ang imong kaugalingon—sa ato pa, padayon nimong susihon kon unsa na ka ka lig-on sa pag-atubang sa mga tentasyon. (Basaha ang 2 Corinto 13:5.) Maayo nga hunahunaon nimo kon unsay imong gibati ug reaksiyon dihang nakaatubang kag tentasyon, ug kon unsa pang mga kausaban ang puwede nimong himoon. Pananglitan, bisan pag nasuklan nimo ang tentasyon, pangutan-a ang imong kaugalingon: ‘Unsa ka dugay man kong nakabalibad?’ Kon nakita nimo nga taudtaod ka una nakabalibad, ayawg kaluya. Hinuon, paningkamoti nga mas molig-on pa ang imong depensa. Pangutan-a ang imong kaugalingon: ‘Kon makahunahuna kog dili maayo, unsay akong himoon aron mawala dayon ni sa akong hunahuna? Nalisdan ba ko sa pagsukol sa mga tentasyon tungod sa akong mga ginatan-aw, ginabasa, o ginapaminawan? Kon makakita kog imoral nga mga hulagway o video, ilikay ba dayon nako ang akong mga mata sa pagtan-aw ini? Nasabtan ba nako nga ang mga sukdanan ni Jehova makahatag gyod nakog mga kaayohan bisag kinahanglan nakong pugngan ang akong kaugalingon?’—Sal. 101:3.

19. Sa unsang paagi ang atong mga desisyon bahin sa ginagmayng mga butang makaapektar sa atong pagsukol sa sayop nga mga tinguha? Ipatin-aw.

¹⁹ Dihang susihon nimo ang imong kaugalingon, likayi nga ipakamatarong ang imong gihimo. Ang Bibliya nag-ingon: “Ang kasingkasing labaw nga malimbongon kay sa bisan unsang butang, ug kini desperado.” (Jer. 17:9) Si Jesus miingon nga “naggikan sa kasingkasing ang daotang mga pangatarongan.” (Mat. 15:19) Pananglitan, ang usa ka tawo nga mihunong na sa pagtan-awg pornograpiya basin sa ngadtongadto maghunahuna nga “okey ra” nga motan-aw ug mga hulagway nga makapukaw sa gana sa sekso kay dili man ni aktuwal nga pornograpiya. O kaha basin moingon siya, ‘Wa may sayop nga maghunahuna ko ining mga butanga basta di lang nako ni buhaton.’ Kon kanay iyang himoon, ang iyang malimbongong kasingkasing ‘nagplano para sa mga tinguha sa unod.’ (Roma 13:14) Unsay imong himoon aron malikayan na? Ayawg kompiyansa, ug likayi ang paghimog dili maayong mga desisyon bahin sa ginagmayng mga butang. Ang paghimog ginagmayng mga sayop puwedeng moresultag mas dagkong mga sayop, sama sa paghimog daotang mga buhat.c Wad-a sab ang bisan unsang panghunahuna, o “daotang mga pangatarongan,” nga nagpakamatarong sa sayop nga mga binuhatan.

20. Unsang panalangin ang puwede natong madawat sa umaabot, ug unsang tabang ang gihatag ni Jehova kanato karon?

²⁰ Atong nakat-onan nga sa tabang ni Jehova, kaya natong suklan ang mga tentasyon. Nakat-onan pod nato nga tungod sa iyang kaluoy, gihatagan ta niyag paglaom nga mabuhi hangtod sa hangtod sa bag-ong kalibotan. Imadyina kon unsa ka nindot ang pag-alagad kang Jehova kon wala na gyoy mosulod nga bisan unsang daotang butang diha sa atong hunahuna ug kasingkasing. Pero sa pagkakaron nga naghulat pa ta sa bag-ong kalibotan, makaseguro ta nga kaya gyod natong suklan ang atong sayop nga mga tinguha. Panalanginan ni Jehova ang atong mga paningkamot, ug modaog gyod ta!