Tabangi ang Imong Bible Study nga Lig-ong Makabarog sa Kamatuoran

1-2. (a) Nganong ang ubang Bible study nagduhaduha nga mobarog sa kamatuoran? (b) Unsay atong hisgotan niini nga artikulo?

NAA bay nakapugong nimo kaniadto sa pagkahimong Saksi ni Jehova? Tingali nahadlok ka nga basin masuko ang imong mga kauban sa trabaho, higala, o pamilya. O tingali nabalaka ka nga basin dili nimo masunod ang mga sukdanan sa Diyos. Kana pod ang gibati sa ubang Bible study nga naglisod ug desisyon kon mobarog ba sila sa kamatuoran.

² Nahibalo si Jesus nga kana nga mga pagbati makababag sa espirituwal nga pag-uswag. (Mat. 13:20-22) Pero padayon niyang gitabangan kadtong mga nagduhaduha sa pagsunod niya. Gani, gitabangan niya ang iyang mga tinun-an nga (1) makita kon unsay nakababag sa ilang pag-uswag, (2) molalom ang ilang gugma kang Jehova, (3) ma-adjust ang ilang mga prayoridad, ug (4) mahimong andam sa mga pagsupak. Unsaon nato pagpadapat ang giingon ni Jesus sa iyang mga tinun-an sa pagtabang sa atong Bible study nga mobarog sa kamatuoran gamit ang Mabuhi Ka Hangtod sa Hangtod! nga libro?

TABANGI ANG IMONG BIBLE STUDY NGA MAKITA KON UNSAY NAKABABAG SA IYANG PAG-USWAG

3. Unsay lagmit nakababag kang Nicodemo nga mahimong tinun-an ni Jesus?

³ Si Nicodemo, nga usa ka prominenteng opisyal sa mga Hudiyo, nalisdan nga mahimong sumusunod ni Jesus. Mga unom ka bulan pa lang sukad gisugdan ni Jesus ang iyang ministeryo, mituo na si Nicodemo nga si Jesus mao ang Mesiyas. (Juan 3:1, 2) Pero gipili niya nga sekretong makig-estorya kang Jesus kay “nahadlok [siya] sa mga Hudiyo.” (Juan 7:13; 12:42) Tingali nahadlok si Nicodemo nga daghan ang mawala sa iyaha kon mahimo siyang tinun-an ni Jesus.a

4. Sa unsang paagi gitabangan ni Jesus si Nicodemo nga masabtan kon unsay gusto sa Diyos nga iyang buhaton?

⁴ Pamilyar si Nicodemo sa Balaod, pero nagkinahanglan siyag tabang aron iyang masabtan kon unsay gusto ni Jehova nga iyang buhaton. Giunsa siya pagtabang ni Jesus? Migahin ug panahon si Jesus para kang Nicodemo, ug gani iyang giduaw si Nicodemo bisag gabii na. Klarong gisulti ni Jesus kang Nicodemo kon unsay angay niyang buhaton aron mahimong tinun-an: maghinulsol sa iyang mga sala, magpabawtismo diha sa tubig, ug magpakitag pagtuo sa Anak sa Diyos.—Juan 3:5, 14-21.

5. Sa unsang paagi matabangan nimo ang imong Bible study nga makita kon unsay nakababag sa iyang pag-uswag?

⁵ Bisan pag ang imong Bible study daghan nag nahibaloan sa Bibliya, tingali kinahanglan gihapon nimo siyang tabangan nga makita kon unsay nakapugong niya sa pag-alagad kang Jehova. Pananglitan, basin nahurot ang iyang panahon sa sekular nga trabaho, o basin supak ang iyang pamilya nga mahimo siyang Saksi ni Jehova. Busa paggahin ug panahon uban sa imong Bible study. Puwede nimo siyang imbitahon aron magmeryenda o kaha maglakawlakaw. Kay mas relaks man mo, basin mas ganahan siyang mosulti sa iyang gibati ug mga problema. Tabangi siya nga himoon ang gikinahanglang mga kausaban, dili para mapalipay ka, kondili aron ipakita ang iyang gugma kang Jehova.

6. Sa unsang paagi imong matabangan ang imong Bible study nga makabatog kaisog sa pagbarog sa kamatuoran? (1 Corinto 16:13)

⁶ Kon ang imong Bible study nahibalo nga tabangan siya ni Jehova nga masunod ang mga sukdanan sa Bibliya, makabaton siyag kaisog sa pagpadapat sa iyang mga nakat-onan. (Basaha ang 1 Corinto 16:13.) Ang imong responsibilidad gipakasama sa papel sa titser sa eskuwelahan. Niadtong nag-eskuwela pa ka, unsang klase sa titser ang imong ganahan? Tingali kadtong titser nga mitabang nimo aron makabaton kag pagsalig sa kaugalingon ug sa imong mga katakos. Sa samang paagi, ang epektibong magtutudlo sa Bibliya dili lang magtudlo sa iyang Bible study kon unsay gusto sa Diyos nga iyang himoon, kondili magpasalig pod sa iyang study nga kaya niyang mohimog mga kausaban sa iyang kinabuhi sa tabang ni Jehova. Unsaon nimo na paghimo?

TABANGI ANG IMONG BIBLE STUDY NGA MOLALOM ANG IYANG GUGMA KANG JEHOVA

7. Giunsa pagtabang ni Jesus ang mga tawo aron molalom ang ilang gugma kang Jehova?

⁷ Nahibalo si Jesus nga mas mapadapat sa iyang mga tinun-an ang ilang mga nakat-onan kon naa silay gugma sa Diyos. Maong dihang iya silang tudloan, kanunay siyang maghisgot bahin sa mga butang nga makatabang aron mas molalom pa ang ilang gugma sa ilang langitnong Amahan. Pananglitan, gipakasama niya si Jehova sa usa ka amahan nga naghatag ug maayong mga butang sa iyang mga anak. (Mat. 7:9-11) Tingali ang uban sa mga naminaw kang Jesus adunay dili mahigugmaong amahan. Imadyina ang ilang gibati dihang si Jesus naghatag ug ilustrasyon bahin sa usa ka mahigugmaong amahan nga nagdawat gihapon sa iyang anak bisan pag daghan nig gihimo nga daotan. Pinaagi niini, nakita sa mga tawo kon unsa sila ka mahal ni Jehova.—Luc. 15:20-24.

8. Sa unsang paagi matabangan nimo ang imong Bible study nga molalom ang iyang gugma kang Jehova?

⁸ Matabangan nimo ang imong Bible study nga molalom ang iyang gugma kang Jehova kon kanunay nimong ipasiugda ang mga hiyas sa Diyos. Sa matag pagtuon ninyo, tabangi siya nga masabtan nga ang inyong ginahisgotan nagpakita nga mahigugmaon gyod si Jehova. Pananglitan, dihang maghisgot mo bahin sa lukat, ipasiugda nga gitagana kini ni Jehova kay Iya siyang gimahal. (Roma 5:8; 1 Juan 4:10) Lagmit mapalihok ang imong Bible study nga higugmaon si Jehova kon iyang mapamalandong nga gimahal gyod siya ni Jehova ingong indibiduwal.—Gal. 2:20.

9. Unsay nakatabang kang Michael sa pagdesisyon nga moalagad kang Jehova?

⁹ Konsideraha ang eksperyensiya ni Michael, nga taga-Indonesia. Nakakat-on siya sa kamatuoran niadtong bata pa siya, pero wala siya magpabawtismo. Pagka-18 anyos niya, mi-abroad siya ug nagtrabaho ingong drayber sa truck. Sa ulahi, mibalik siya sa Indonesia aron magminyo, pero iyang gibiyaan ang iyang pamilya aron ipadayon ang iyang trabaho sa laing nasod. Paglabay sa panahon, ang iyang asawa ug anak nga babaye nagtuon sa Bibliya ug ilang gipadapat ang ilang nakat-onan. Human mamatay ang iyang inahan, si Michael mipauli aron atimanon ang iyang amahan ug misugot siya nga magpa-Bible study. Dihang ilang gihisgotan ang seksiyon nga “Tun-ig Dugang,” sa leksiyon 27 sa Mabuhi Ka Hangtod sa Hangtod! nga libro, natandog pag-ayo si Michael. Samtang iyang gipamalandong kon unsa ka sakit para kang Jehova nga makita ang iyang anak nga nag-antos, nakahilak si Michael. Tungod ana, mas milalom pa ang iyang apresasyon sa lukat mao nga midesisyon siya nga alagaron si Jehova ug magpabawtismo.

TABANGI ANG IMONG BIBLE STUDY SA PAG-ADJUST SA IYANG MGA PRAYORIDAD

10. Giunsa pagtabang ni Jesus ang iyang mga tinun-an sa pag-adjust sa ilang mga prayoridad? (Lucas 5:5-11) (Tan-awa sab ang hulagway.)

¹⁰ Nasabtan dayon sa unang mga tinun-an ni Jesus nga siya mao ang gisaad nga Mesiyas, pero nagkinahanglan silag tabang aron mahimo nilang prayoridad ang ilang ministeryo. Taudtaod na pod nga nahimong tinun-an si Pedro ug Andres dihang gidapit sila ni Jesus nga mahimong iyang bug-os panahong mga sumusunod. (Mat. 4:18, 19) Mga mangingisda sila, kauban ni Santiago ug Juan, ug maayog dagan ang ilang negosyo sa pagpangisda. (Mar. 1:16-20) Dihang si Pedro ug Andres midesisyon nga ‘biyaan ang ilang mga pukot’ aron mosunod kang Jesus, lagmit naa na silay mga plano aron matagan-an ang panginahanglan sa ilang pamilya. Unsay nakatabang nila aron i-adjust ang ilang prayoridad? Ang asoy ni Lucas nag-ingon nga si Jesus mihimog usa ka milagro nga nagpalig-on sa ilang pagsalig nga itagana gyod ni Jehova ang ilang mga panginahanglan.—Basaha ang Lucas 5:5-11.

11. Sa unsang paagi magamit nato ang atong kaugalingong mga eksperyensiya aron palig-onon ang pagtuo sa atong Bible study?

¹¹ Dili ta makahimog mga milagro sama sa gihimo ni Jesus, pero puwede natong isulti sa atong Bible study kon giunsa ta pagtabang ni Jehova tungod kay giuna nato siya sa atong kinabuhi. Pananglitan, nahinumdom ka ba kon giunsa ka pagtabang ni Jehova dihang bag-o ka pa lang nagsugod ug tambong sa mga tigom? Tingali mihangyo ka sa imong boss nga dili ka puwedeng mag-overtime sa trabaho panahon sa tigom. Samtang imong isulti sa imong Bible study ang imong mga kasinatian, isaysay kon sa unsang paagi napalig-on ang imong pagtuo kay gipanalanginan gyod ni Jehova ang imong desisyon nga unahon siya sa imong kinabuhi.

12. (a) Nganong maayo nga iuban nato ang lainlaing mga igsoon panahon sa Bible study? (b) Unsa pay laing makatabang sa atong Bible study aron himoon niyang prayoridad ang pag-alagad kang Jehova? Paghatag ug pananglitan.

¹² Makabenepisyo pod ang imong Bible study sa mga eksperyensiya sa ubang igsoon nga gihimong prayoridad ang pag-alagad kang Jehova. Busa maayo nga imong iuban ang lainlaing igsoon sa inyong Bible study. Hangyoa sila nga isulti kon sa unsang paagi nahimo silang Saksi ug kon unsay ilang gihimo aron himoong prayoridad ang pag-alagad kang Jehova. Makatabang pod kon tan-awon nimo ug sa imong study ang mga video nga naa sa “Tun-ig Dugang” o “Susiha” nga seksiyon sa librong Mabuhi Ka Hangtod sa Hangtod! Pananglitan, dihang inyong hisgotan ang leksiyon 37, puwede nimong ipasiugda ang mga leksiyon sa video nga Si Jehova Motagana sa Atong mga Panginahanglan.

TABANGI ANG IMONG BIBLE STUDY NGA MAHIMONG ANDAM SA MGA PAGSUPAK

13. Unsay gihimo ni Jesus aron maandam ang iyang mga tinun-an sa pagsupak?

¹³ Balikbalik nga gisultihan ni Jesus ang iyang mga tinun-an nga makaatubang silag mga pagsupak, bisan gani sa ilang kaugalingong pamilya. (Mat. 5:11; 10:22, 36) Sa dihang hapit nang matapos ang ministeryo ni Jesus, iyang gipasidan-an ang iyang mga tinun-an nga posibleng patyon sila tungod kay nag-alagad sila kang Jehova. (Mat. 24:9; Juan 15:20; 16:2) Iya silang gitambagan nga dili makiglalis sa mga magsusupak ug mag-amping sa ilang isulti o himoon aron makapadayon sila sa ilang pagsangyaw.

14. Unsay atong mahimo aron maandam ang atong Bible study sa mga pagsupak? (2 Timoteo 3:12)

¹⁴ Matabangan nato ang atong Bible study nga mahimong andam sa pagsupak kon atong isulti niya ang posibleng reaksiyon sa iyang mga kauban sa trabaho, mga higala, ug pamilya. (Basaha ang 2 Timoteo 3:12.) Basin bugalbugalan siya sa iyang mga kauban sa trabaho tungod kay iyang gipadapat ang iyang mga nakat-onan gikan sa Bibliya. Ang uban, apil na ang iyang pamilya, basin dili mouyon sa iyang mga nakat-onan sa Bibliya. Kon sa sinugdan pa lang ato nang sultihan ang atong Bible study kon unsay iyang himoon dihang supakon, mahimo siyang mas andam sa pag-atubang sa mga pagsupak.

15. Unsay makatabang sa imong Bible study dihang supakon siya sa iyang pamilya?

¹⁵ Kon ang imong Bible study gisupak sa iyang pamilya, tabangi siya nga pamalandongon ang posibleng hinungdan niana. Basin nagtuo sila nga giilad ra siya, o basin dili lang gyod sila ganahan sa mga Saksi. Gani, bisan si Jesus gisupak pod sa ubang membro sa iyang pamilya. (Mar. 3:21; Juan 7:5) Dasiga ang imong Bible study nga magmapailobon ug magmataktikanhon sa iyang pagpakiglabot sa uban, apil na sa iyang pamilya.

16. Sa unsang paagi matabangan nimo ang imong Bible study nga magmataktikanhon dihang iyang isulti sa uban ang iyang mga tinuohan?

¹⁶ Bisan pag nagpakitag interes ang pamilya sa imong Bible study, dili niya sila angayng paulanan ug daghang impormasyon. Kay kon iya ning himoon, basin mapul-an sila ug dili na ganahang makig-estorya niya pag-usab. Busa dasiga siya nga dili isulti ang tanan aron naa pa siyay kahigayonan nga makasangyaw sa sunod. (Col. 4:6) Puwede pod niyang dasigon ang iyang pamilya nga tan-awon ang jw.org. Makatabang ni aron makakat-on silag dugang bahin sa mga Saksi ni Jehova sa panahon nga gusto nila.

17. Unsaon nimo pagtabang ang imong Bible study kon naay mosultig sayop bahin sa mga Saksi ni Jehova? (Tan-awa sab ang hulagway.)

¹⁷ Puwede nimong gamiton ang serye nga “Komon nga mga Pangutana​” sa jw.org aron matabangan ang imong Bible study sa pagtubag sa mga pangutana nga posibleng isukna sa iyang mga paryente ug kauban sa trabaho. (2 Tim. 2:24, 25) Inigkahuman ninyo sa matag leksiyon sa librong Mabuhi Ka Hangtod sa Hangtod!, hisgoti ang seksiyon nga “Ang Uban Moingon.” Dasiga siya nga praktison kon unsaon niya kini pagsaysay. Hatagi siyag mga sugyot aron klaro niya kining mapatin-aw ngadto sa uban. Makatabang ni sa imong Bible study nga makabatog kaisog sa pagdepensa sa iyang pagtuo.

18. Unsaon nimo pagdasig ang imong Bible study nga mahimong dili bawtismadong magmamantala? (Mateo 10:27)

¹⁸ Giawhag ni Jesus ang iyang mga tinun-an nga isangyaw ang maayong balita ngadto sa mga tawo. (Basaha ang Mateo 10:27.) Dihang ang imong Bible study mosangyaw na uban sa mga igsoon, makakat-on siya nga mas mosalig pa kang Jehova. Unsaon nimo siya pagtabang aron mahimo ni niyang tumong? Pananglitan, dihang ipahibalo sa inyong kongregasyon ang bahin sa preaching campaign, dasiga siya nga pamalandongon ang mga kuwalipikasyon sa pagkahimong dili bawtismadong magmamantala. Sultihi siya nga daghang igsoon ang mas sayonan mosangyaw panahon sa maong mga campaign. Sultihi pod siya nga mas mabansay siya sa pagsangyaw kon mahatagan siyag bahin panahon sa midweek nga mga tigom. Makatabang ni aron mahimo siyang mas epektibo sa pagsangyaw sa uban.

IPAKITA SA IMONG BIBLE STUDY NGA MISALIG KA NIYA

19. Giunsa pagpakita ni Jesus nga misalig siya sa iyang mga tinun-an, ug unsaon nato siya pagsundog?

¹⁹ Sa wala pa mobalik si Jesus sa langit, iyang giingnan ang iyang mga tinun-an nga makauban niya sila pag-usab. Ang gipasabot ni Jesus mao nga makauban niya sila sa langit, pero wala na nila masabti. Bisan pa niana, wala magpokus si Jesus sa ilang kakulang ug kahibalo. Nagpokus siya sa ilang pagkamaunongon. (Juan 14:1-5, 8) Nahibalo siya nga nagkinahanglan ug panahon aron ilang masabtan ang ubang butang, sama sa ilang langitnong paglaom. (Juan 16:12) Sama kang Jesus, angay pod natong ipakita sa atong Bible study nga misalig ta niya—nga gusto niyang mapalipay si Jehova.

20. Giunsa pagpakita sa usa ka sister sa Malawi nga misalig siya sa iyang Bible study?

²⁰ Padayon tang mosalig nga ang atong Bible study gustong mohimo kon unsay husto. Konsideraha ang eksperyensiya ni Chifundo, sister nga taga-Malawi. Nag-Bible study siya sa usa ka Katolikong babaye nga si Alinafe, gamit ang librong Mabuhi Ka Hangtod sa Hangtod! Human nilag hisgot sa leksiyon 14, gipangutana siya ni Chifundo kon unsay iyang hunahuna bahin sa paggamit ug mga imahen sa pagsimba. Nasuko si Alinafe ug miingon, “Walay magbuot nako kon mogamit kog mga imahen.” Nakahunahuna si Chifundo nga basin mao na to ang kataposan nilang Bible study. Pero nagpakitag pailob si Chifundo ug padayon silang nag-study. Malaomon siya nga sa ulahi masabtan ra ni Alinafe nga sayop ang paggamit ug mga imahen. Paglabay sa pipila ka bulan, gisukna ni Chifundo kang Alinafe ang pangutana sa leksiyon 34: “Unsay nakuha nimong mga kaayohan sa pagtuon sa Bibliya ug sa pagtuon bahin sa matuod nga Diyos, si Jehova?” Si Chifundo miingon, “Si Alinafe naghisgot ug daghang maayong mga punto, ug siya miingon nga ang mga Saksi wala gyod magbuhat ug mga butang nga gidili sa Bibliya.” Wala madugay human niana, si Alinafe wala na mogamit ug mga imahen ug siya nabawtismohan.

21. Sa unsang paagi matabangan nato ang atong Bible study nga makabarog sa kamatuoran?

²¹ Bisag si Jehova “maoy nagpatubo niini,” naa pod tay mahimo sa pagtabang sa atong Bible study nga mouswag. (1 Cor. 3:7) Gawas nga tudloan nato siya kon unsay gusto sa Diyos nga iyang himoon, ato pod siyang tabangan nga makaugmad ug lawom nga gugma kang Jehova. Tabangan nato siya nga mapakita ang iyang gugma pinaagi sa pag-adjust sa iyang mga prayoridad. Ug tudloan nato siya nga mosalig kang Jehova dihang makaatubang ug mga pagsupak. Kon ipakita nato nga misalig ta sa atong Bible study, mahimo siyang mas determinado nga magkinabuhi sumala sa mga sukdanan ni Jehova ug lig-ong mobarog sa kamatuoran.