Nganong Angay Tang Mangayog Tambag?

1. Unsay makatabang aron makahimo tag maalamong mga desisyon ug molampos ang atong mga plano? (Proverbio 13:10; 15:22)

KITANG tanan gustong mohimog maalamong mga desisyon. Gusto pod nato nga molampos ang atong mga plano. Ang Pulong sa Diyos makatabang aron ato nang mahimo.—Basaha ang Proverbio 13:10; 15:22.

2. Unsay gisaad ni Jehova nga iyang himoon para nato?

² Siyempre, ang makahatag natog pinakamaayong tambag mao ang atong Amahan, si Jehova, maong kinahanglan tang moampo niya nga hatagan tag kaalam. Siya misaad nga tabangan ta niya ug miingon: “Tambagan ka nako samtang nagatan-aw ko kanimo.” (Sal. 32:8) Kini nagpakita nga gawas nga mohatag si Jehova ug tambag, naa pod siyay personal nga interes kanato ug tabangan ta niya nga ipadapat ang iyang tambag.

3. Unsay atong konsiderahon niini nga artikulo?

³ Niini nga artikulo, atong konsiderahon ang Pulong sa Diyos sa pagtubag sa upat ka pangutana: (1) Unsa nga hiyas ang makatabang nako aron makabenepisyo sa maayong tambag? (2) Kinsay makahatag nakog maayong tambag? (3) Unsaon nako pagpakita nga tinuod gyod kong nangayog tambag? (4) Nganong dili maayo nga ang uban ang akong padesisyonon para nako?

UNSANG HIYAS ANG ANGAY NAKONG UGMARON?

4. Aron makabenepisyo sa maayong tambag, unsang hiyas ang angay natong ugmaron?

⁴ Kon gusto natong makabenepisyo sa maayong tambag, kinahanglan nga mapainubsanon ta. May mga situwasyon nga wala ta mahibalo kon unsay buhaton o wala tay eksperyensiya niana, maong gikinahanglan nato ang tabang sa uban aron makahimog maayong desisyon. Kon dili ta mapainubsanon, dili ta matabangan ni Jehova, maong ang bisan unsang tambag nga atong madawat gikan sa Pulong sa Diyos igo rang molapos sa atong pikas dunggan. (Miq. 6:8; 1 Ped. 5:5) Pero kon mapainubsanon ta, mas sayon para nato ang pagdawat sa binase sa Bibliya nga mga tambag ug ang pagpadapat niini.

5. Unsa nga mga kalamposan ang puwedeng makahimo kang Haring David nga mapahitas-on?

⁵ Konsiderahon nato kon unsay atong makat-onan sa ehemplo ni Haring David. Tungod sa iyang mga kalamposan, puwede unta siyang mahimong mapahitas-on. Sa wala pa siya mahimong hari, ilado na siya ingong maayong musikero. Gani, dihay higayon nga gihangyo siya nga magtugtog para sa hari. (1 Sam. 16:18, 19) Human siya dihogi ingong sunod nga hari, ang espiritu ni Jehova milihok diha kang David, ug tungod ana nakahimo siyag talagsaong mga buhat. (1 Sam. 16:11-13) Misikat siya tungod sa iyang pagpildi sa mga kaaway, apil na sa Filistehanong higante nga si Goliat. (1 Sam. 17:37, 50; 18:7) Kon mapahitas-on si David, puwede siyang maghunahuna nga wala siya magkinahanglag tambag sa uban tungod sa iyang mga napalampos. Pero dili ingon ana si David.

6. Giunsa nato pagkahibalo nga si David andam nga modawat ug mga tambag? (Tan-awa sab ang hulagway.)

⁶ Dihang nahimo nang hari si David, nakigsuod siya sa mga higala nga makahatag niyag tambag. (1 Cron. 27:32-34) Dili ni ikatingala. Gani sa wala pa siya mahimong hari, kanunay gyod siyang maminaw sa tambag sa uban. Modawat siyag tambag dili lang gikan sa mga lalaki kondili sa mga babaye pod, sama kang Abigail. Si Abigail asawa ni Nabal, usa ka tawo nga walay pagtahod, dili mapasalamaton, ug hambogiro. Mapainubsanong gidawat ni David ang maayong tambag ni Abigail, ug tungod niana nalikayan niya ang paghimog daotan.—1 Sam. 25:2, 3, 21-25, 32-34.

7. Unsang mga leksiyon ang atong makat-onan gikan sa ehemplo ni David? (Ecclesiastes 4:13) (Tan-awa sab ang mga hulagway.)

⁷ Naa tay makat-onan nga mga leksiyon gikan kang David. Pananglitan, tingali daghan tag talento o naa tay awtoridad. Pero dili ta angayng maghunahuna nga nahibalo ta sa tanan ug wala ta magkinahanglag tambag. Ug sama kang David, kinahanglang andam tang maminaw sa maayong tambag bisag kinsa pay mohatag niini. (Basaha ang Ecclesiastes 4:13.) Kon ato nang buhaton, lagmit malikayan nato nga makahimog seryosong mga sayop nga makapaguol nato ug sa uban.

KINSAY MAKAHATAG NAKOG MAAYONG TAMBAG?

8. Nganong kuwalipikado si Jonatan nga mohatag ug tambag kang David?

⁸ Hisgotan nato ang usa pa ka leksiyon nga atong makat-onan gikan sa ehemplo ni David. Naminaw siya sa tambag sa mga tawo nga dunay maayong relasyon kang Jehova ug nakasabot kaayo sa iyang kahimtang. Pananglitan, dihay higayon nga gustong mahibaloan ni David kon posible bang mabalik ang iyang maayong relasyon kang Haring Saul. Unsay iyang gihimo? Naminaw siya sa tambag ni Jonatan, nga anak ni Saul. Nganong nakahatag man si Jonatan ug maayong tambag? Tungod kay naa siyay maayong relasyon kang Jehova ug nakaila pag-ayo kang Saul. (1 Sam. 20:9-13) Unsaon nato pagpadapat kana nga leksiyon?

9. Kinsay makahatag natog maayong tambag? Ipatin-aw. (Proverbio 13:20)

⁹ Kon magkinahanglan tag tambag, mas maayo nga moduol ta sa usa nga dunay maayong relasyon kang Jehova ug mas nakasabot sa atong kahimtang.a (Basaha ang Proverbio 13:20.) Pananglitan, ibutang ta nga naay ulitawong brader nga nangitag potensiyal nga maminyoan. Kinsay makahatag niyag maayong tambag? Basin makatabang ang usa ka dili minyo nga higala kon ibase niya sa mga prinsipyo sa Bibliya ang iyang tambag. Pero lagmit makadawat ang maong brader ug mas espesipiko ug praktikal nga mga tambag kon moduol siya sa usa ka hamtong nga magtiayon nga nakaila pag-ayo niya ug malipayon sa ilang kaminyoon.

10. Unsay atong hisgotan karon?

¹⁰ Nahisgotan na nato ang hiyas nga angay natong batonan ug kon kinsay makahatag natog maayong tambag. Karon, atong hisgotan kon unsaon nato pagpakita nga tinuod gyod tang nangayog tambag ug kon angay ba natong hangyoon ang uban nga maoy magdesisyon para nato.

UNSAON NAKO PAGPAKITA NGA TINUOD GYOD KONG NANGAYOG TAMBAG?

11-12. (a) Unsay angay natong likayan? (b) Unsay gihimo ni Haring Rehoboam dihang kinahanglan siyang mohimog importanteng desisyon?

¹¹ Usahay, basin ang usa ka tawo mangayog tambag sa uban, pero ang tinuod nakahimo na diay siyag desisyon ug nangita lang siyag mouyon niya. Nagpakita na nga dili gyod siya tinud-anay o sinserong nangitag tambag. Angay niyang hinumdoman ang nahitabo kang Haring Rehoboam.

¹² Si Rehoboam mao ang mipuli kang Solomon ingong hari sa Israel. Sa pagsugod ni Rehoboam sa paghari, ang nasod sa Israel dato, pero gibati sa mga tawo nga sobra ra ang gipangayo ug gipabuhat ni Solomon kanila. Ang mga tawo miadto kang Rehoboam ug ila siyang gihangyo nga pagaanon gamay ang ilang trabaho. Giingnan sila ni Rehoboam nga iya una kining hunahunaon. Sa primero, maayo ang iyang gihimo kay nangayo siyag tambag sa mga ansiyano nga mialagad kaniadto kang Solomon. (1 Hari 12:2-7) Pero wala niya dawata ang tambag sa maong mga ansiyano. Ngano? Posible kaha nga naa na siyay nahimo nga desisyon ug nangita lang siyag mouyon niya? Pero kay lahi man ang tambag sa mga ansiyano, miduol siya sa iyang mga higala nga kaedad ra niya, ug giganahan siya sa ilang tambag. (1 Hari 12:8-14) Gisunod ni Rehoboam ang tambag sa iyang mga higala. Tungod niana, nabahin ang nasod sa Israel, ug kanunay nga naay problema ang iyang pagmando.—1 Hari 12:16-19.

13. Unsaon nato pagkahibalo kon sinsero ba gyod ta sa atong pagpangayog tambag?

¹³ Unsay atong makat-onan sa nahitabo kang Rehoboam? Kon magpatambag ta, kinahanglang sinsero ta. Unsaon nato pagkahibalo kon sinsero ta? Mahimo natong pangutan-on ang atong kaugalingon, ‘Dihang mangayo kog tambag, isalikway ba dayon nako ni tungod lang kay dili ni mao ang gusto nakong madunggan?’ Maghisgot tag pananglitan niini.

14. Kon makadawat tag tambag gikan sa uban, unsay angay natong hinumdoman? Paghatag ug pananglitan. (Tan-awa sab ang hulagway.)

¹⁴ Ibutang ta nga naay nag-offer sa usa ka brader ug maayong trabaho nga dakog suweldo. Sa wala pa niya kini dawata, miduol siya sa usa ka ansiyano aron magpatambag. Ang brader miingon nga kon iyang dawaton ang maong trabaho, naay mga higayon nga dili niya makauban ang iyang pamilya sa taastaas nga panahon. Gipahinumdoman siya sa ansiyano sa prinsipyo sa Bibliya nga ang pangunang responsibilidad niya mao ang pagtagana sa espirituwal nga panginahanglan sa iyang pamilya. (Efe. 6:4; 1 Tim. 5:8) Pero wala malipay ang brader sa tambag sa ansiyano, maong nagpatambag siya sa ubang mga igsoon. Padayon na niyang gihimo hangtod nga naay nagtambag niya nga okey ra nga dawaton ang maong trabaho. Nalipay siya kay mao toy gusto niyang madunggan. Niini nga kahimtang, makaingon ba ta nga tinuod gyod siyang nangayog tambag, o nakadesisyon na siyang daan ug nangita lang siyag mouyon niya? Angay natong hinumdoman nga malimbongon ang atong kasingkasing. (Jer. 17:9) Usahay, ang tambag nga dili nato gustong madunggan mao diay ang tambag nga ato gyong gikinahanglan.

ANGAY BA NAKONG HANGYOON ANG UBAN SA PAGHIMOG DESISYON PARA NAKO?

15. Unsay dili nato angayng buhaton, ug ngano?

¹⁵ Responsibilidad sa matag usa nato ang paghimog desisyon para sa atong kaugalingon. (Gal. 6:4, 5) Sa ato nang nahisgotan, ang usa ka maalamong tawo mangitag tambag gikan sa Pulong sa Diyos ug sa hamtong nga mga Kristohanon sa dili pa maghimog desisyon. Pero dili nato angayng hangyoon ang uban sa pagdesisyon para nato. Tingali ang uban mangutana sa usa nga ilang gitahod pag-ayo, “Unsay imong himoon kon ikaw ang naa sa akong situwasyon?” Naa poy mga tawo nga igo rang mosundog sa desisyon nga gihimo sa uban imbes hunahunaon kini pag-ayo.

16. Unsang situwasyon ang mitungha sa Corinto bahin sa karne nga gihalad ngadto sa mga idolo, ug kinsay angayng modesisyon kon ang usa ka Kristohanon mokaon ba sa karne o dili? (1 Corinto 8:7; 10:25, 26)

¹⁶ Konsideraha ang situwasyon nga mitungha sa unang siglong kongregasyon sa Corinto bahin sa karne nga posibleng gihalad ngadto sa mga idolo. Gisulatan sila ni Pablo: “Nahibalo ta nga ang idolo walay bili sa kalibotan ug nga walay laing Diyos gawas sa usa lang.” (1 Cor. 8:4) Tungod niana, ang pipila diha sa kongregasyon midesisyon nga okey ra nila nga mokaon ug karne nga posibleng gihalad ngadto sa mga idolo, dayon gibaligya sa merkado. Pero dili kaya sa konsensiya sa ubang Kristohanon nga mokaon sa maong karne. (Basaha ang 1 Corinto 8:7; 10:25, 26.) Personal ni nga desisyon. Wala gyod tambagi ni Pablo ang mga taga-Corinto nga mohimog desisyon para sa uban o mosundog sa desisyon sa uban. ‘Ang matag usa nila manubag sa Diyos.’—Roma 14:10-12.

17. Unsay posibleng mahitabo kon igo ra tang mosundog sa gihimo sa uban? Paghatag ug pananglitan. (Tan-awa sab ang mga hulagway.)

¹⁷ Naa pod kahay parehas niana nga kahimtang karon? Konsideraha ang bahin sa blood fractions o mga tipik sa dugo. Ang matag Kristohanon kinahanglang modesisyon kon dawaton ba niya kining mga tipik sa dugo o dili.b Dili tingali ni sayon sabton nga topiko, pero kinahanglan tang mohimog desisyon bahin ani kay ato ning responsibilidad. (Roma 14:4) Kon igo ra tang mosundog sa desisyon sa uban, posibleng mohuyang ang atong konsensiya. Mabansay lang ang atong konsensiya kon ato ning gamiton. (Heb. 5:14) Busa kanus-a man ta mangayog tambag sa usa ka hamtong nga Kristohanon? Himoon lang nato na kon naka-research na ta pero naglibog gihapon ta kon unsaon pagpadapat ang mga prinsipyo sa Bibliya sa atong situwasyon.

PADAYON SA PAGPANGAYOG TAMBAG

18. Unsay gihimo ni Jehova para nato?

¹⁸ Dako kaayog pagsalig si Jehova nato, maong iya tang gitugotan nga mohimog kaugalingong mga desisyon. Iyang gitagana nato ang iyang Pulong, ang Bibliya. Gihatagan ta niya ug maalamong mga higala nga motabang nato sa pagpadapat sa mga prinsipyo sa Bibliya. Gituman ni Jehova ang iyang responsibilidad ingong atong Amahan. (Prov. 3:21-23) Unsaon nato pagpakita nga mapasalamaton ta niya?

19. Unsay atong himoon aron padayon natong mapalipay si Jehova?

¹⁹ Konsideraha ni: Malipay gyod ang mga ginikanan kon makita nila ang ilang mga anak nga mohamtong ug mahimong buotan, maalamon, ug matinabangong alagad ni Jehova. Sa susama, malipay pod si Jehova kon makita ta niya nga padayong mohamtong sa espirituwal, mangayog tambag, ug mohimog mga desisyon nga makapalipay niya.