Kon Unsaon Paghatag ug Maayong Tambag

1. Kinsay kinahanglang mohatag ug tambag, ug ngano?

GANAHAN ba kang mohatag ug tambag? Naay mga tawo nga ganahang motambag, pero ang uban mahadlok o magduhaduha. Ganahan man ta o dili, kitang tanan kinahanglan gyong mohatag ug tambag. Si Jesus miingon nga ang iyang tinuod nga mga sumusunod mailhan tungod sa ilang gugma sa usag usa. (Juan 13:35) Ug ang usa ka paagi nga mapakita nato nga gihigugma gyod nato ang mga igsoon mao ang paghatag nilag tambag kon gikinahanglan. Ang Pulong sa Diyos nag-ingon nga ang tinuod nga higala andam mohatag ug “sinsero nga tambag.”—Prov. 27:9.

2. Unsay kinahanglang himoon sa mga ansiyano, ug ngano? (Tan-awa sab ang kahong “Paghatag ug Tambag Panahon sa Midweek nga Tigom.”)

² Ang mga ansiyano ilabinang kinahanglang mahibalo kon unsaon paghatag ug epektibong tambag. Pinaagi kang Jesus, gitudlo ni Jehova kini nga mga brader ingong magbalantay sa kongregasyon. (1 Ped. 5:2, 3) Ang usa ka paagi nga gihimo kana sa mga ansiyano mao ang pagtaganag binase sa Bibliya nga mga tambag dihang mohatag silag mga pakigpulong diha sa kongregasyon. Makig-estorya pod sila sa mga igsoon nga nanginahanglag tambag, apil na niadtong mga napahilayo sa kongregasyon. Sa unsang paagi ang mga ansiyano ug kitang tanan makahatag ug maayong tambag?

3. (a) Unsay makatabang aron makahatag tag maayong tambag? (Isaias 9:6; tan-awa sab ang kahong “Sundoga si Jesus Dihang Mohatag ug Tambag.”) (b) Unsay atong hisgotan niini nga artikulo?

³ Aron mahimo tang epektibo sa paghatag ug tambag, makatabang nato ang pagtuon sa ehemplo sa mga alagad ni Jehova nga narekord sa Bibliya, ilabina sa ehemplo ni Jesus. Si Jesus gitawag nga “Kahibulongang Magtatambag.” (Basaha ang Isaias 9:6.) Niini nga artikulo, atong hisgotan kon unsay atong himoon kon gihangyo ta sa paghatag ug tambag, ug kon unsa poy atong himoon kon kinahanglan tang motambag pero wala ta hangyoa. Hisgotan pod nato kon nganong importante nga mohatag ta ug tambag sa hustong panahon ug sa hustong paagi.

KON GIHANGYO TA NGA MOHATAG UG TAMBAG

4-5. Kon naay mangayo natog tambag, unsay una natong ipangutana sa atong kaugalingon? Paghatag ug pananglitan.

⁴ Kon naay mangayo natog tambag, unsay atong reaksiyon? Tingali malipay ta kay naa siyay pagsalig nato, maong gusto tingali dayon natong motabang. Pero angay una natong pangutan-on ang atong kaugalingon, ‘Kuwalipikado ba gyod ko nga mohatag ug tambag bahin niini?’ Usahay, mas makatabang ta kon dili ta mohatag ug tambag. Hinuon, dasigon nato siya nga moduol sa usa nga makahatag niyag mas maayong tambag bahin sa iyang situwasyon.

⁵ Konsideraha ni nga pananglitan. Ibutang ta nga nahibaloan sa imong suod nga higala nga naa siyay seryosong sakit. Iya kang giingnan nga nag-research na siya bahin sa lainlaing paagi sa pagtambal, ug iya kang gipangutana kon unsa kahay pinakamaayo nga paagi. Tingali naa gyod kay opinyon bahin nianang butanga, pero dili ka doktor o nurse ug wala kay igong kahibalo kon unsaon pagtambal ang maong sakit. Busa ang pinakamaayo nga imong mahimo para sa imong higala mao ang pagtabang niya nga makakitag maayong doktor.

6. Nganong maayo usahay nga dili dayon ta mohatag ug tambag?

⁶ Bisan pag gibati nato nga kuwalipikado ta nga mohatag ug tambag bahin sa situwasyon, tingali modesisyon ta nga palabyon una ang mubo nga panahon sa dili pa mohatag sa atong opinyon. Ngano? Kay ang Proverbio 15:28 nag-ingon nga ang “matarong mamalandong sa dili pa motubag.” Komosta kon gibati nato nga nahibalo gyod ta sa tubag? Mas maayo gihapon nga mogahin tag panahon sa pag-research, pag-ampo, ug pagpamalandong. Pinaagi ana, mas makaseguro ta nga ang atong tubag nahiuyon sa panghunahuna ni Jehova. Matikdi ang pananglitan ni propetang Natan.

7. Unsay imong makat-onan sa pananglitan ni propetang Natan?

⁷ Gisultihan ni Haring David si propetang Natan nga gusto niyang magtukod ug templo para kang Jehova. Giingnan dayon siya ni Natan nga buhaton kana. Pero angay untang mikonsulta una si Natan kang Jehova. Ngano? Kay dili gusto ni Jehova nga si David ang magtukod sa templo. (1 Cron. 17:1-4) Sama sa gipakita niini nga hitabo, kon naay mangayo natog tambag, angay nga “hinay [ta] sa pagsulti,” sa ato pa, dili ta magdalidali sa pagtambag.—Sant. 1:19.

8. Unsay laing rason kon nganong angay tang mag-amping sa paghatag ug tambag?

⁸ Konsideraha ang laing rason kon nganong angay tang mag-amping dihang mohatag ug tambag sa uban: Kon ang atong tambag moresultag dili maayo, basin apil ta sa mabasol. Maong kinahanglan gyod nga maghunahuna una ta pag-ayo sa dili pa mohatag ug tambag.

KON MOHATAG TA UG TAMBAG NGA WALA HANGYOA

9. Sa dili pa mohatag ug tambag ang mga ansiyano, unsay angay nilang seguroon? (Galacia 6:1)

⁹ Naay mga panahon nga ang mga ansiyano kinahanglang mohatag ug tambag sa usa ka igsoon nga nakahimog “sayop nga lakang.” (Basaha ang Galacia 6:1.) Ang study note niini nga bersikulo nag-ingon nga kini nga igsoon “nagpaingon sa sayop nga dalan, pero wala pa tingali siya makahimog seryosong sala.” Tumong sa mga ansiyano nga tabangan ang maong igsoon nga magpabilin diha sa dalan paingon sa kinabuhing walay kataposan. (Sant. 5:19, 20) Pero aron mahimong epektibo ang ilang tambag, kinahanglan una nilang seguroon kon ang maong igsoon nakahimo ba gyod ug sayop nga lakang. Angay nilang hinumdoman nga ang matag Kristohanon posibleng lahilahi ug desisyon base sa itugot sa ilang konsensiya. (Roma 14:1-4) Pero komosta kon ang igsoon nakahimo gyod ug sayop nga lakang, ug ang mga ansiyano midesisyon nga hatagan siyag tambag?

10-12. Unsay angayng himoon sa mga ansiyano kon kinahanglan silang mohatag ug tambag? Iilustrar. (Tan-awa sab ang mga hulagway.)

¹⁰ Dili sayon para sa mga ansiyano ang paghatag ug tambag. Ngano? Kay si apostol Pablo miingon nga ang igsoon nakahimog sayop nga lakang pero wala tingali siya mahibalo niini. Maong naa unay kinahanglang himoon ang mga ansiyano aron mahimong mas sayon para sa igsoon ang pagdawat sa ilang tambag.

¹¹ Ang paghatag ug tambag nga wala hangyoa puwedeng ipakasama sa pagtanom diha sa gahi nga yuta. Sa dili pa magtanom ang mag-uuma, iya unang tikaron ang yuta aron mohumok ni ug andam nang tamnan. Dayon iyang itanom ang liso. Iya pod ning bisbisan aron motubo. Sa samang paagi, sa dili pa mohatag ug tambag nga wala hangyoa, angay unang andamon sa ansiyano ang kasingkasing sa igsoon. Pananglitan, mopili siyag haom nga panahon aron makig-estorya sa igsoon ug iya kining pasaligan nga gusto siyang motabang niya. Kon ang ansiyano nailhan nga mahigugmaon ug buotan, mas sayon para sa uban nga dawaton ang iyang tambag.

¹² Dihang makig-estorya, padayong pahumokon sa ansiyano ang kasingkasing sa igsoon pinaagi sa pag-ingon nga kitang tanan dili hingpit ug usahay nagkinahanglag tambag. (Roma 3:23) Sa kalmado ug buotan nga paagi, gamiton sa ansiyano ang Kasulatan aron ipakita ngadto sa igsoon nga nakahimo siyag sayop nga lakang. Kon dawaton na sa igsoon nga nakahimo siyag sayop, ang ansiyano “magtanom sa liso” pinaagi sa pagsulti kaniya sa tin-aw nga paagi kon unsay angay niyang buhaton aron matul-id ang situwasyon. Dayon ang ansiyano “magbisbis” niini pinaagi sa paghatag kaniyag sinserong komendasyon ug pag-ampo uban niya.—Sant. 5:15.

13. Unsay himoon sa mga ansiyano aron ilang mahibaloan kon nasabtan ba gyod sa igsoon ang tambag?

¹³ Usahay, ang gisulti sa nagtambag malahi ug sabot sa gitambagan. Unsay himoon sa mga ansiyano aron malikayan kini? Sa buotan ug matinahoron nga paagi, ang mga ansiyano puwedeng mangutana aron ilang mahibaloan kon nasabtan ba gyod sa igsoon ang tambag nga gihatag kaniya ug kon nahibalo ba siya kon unsaon ni pagpadapat.—Eccl. 12:11.

PAGHATAG UG TAMBAG SA HUSTONG PANAHON UG SA HUSTONG PAAGI

14. Angay ba tang mohatag ug tambag kon nasuko ta? Ipatin-aw.

¹⁴ Kitang tanan dili hingpit, maong usahay naa tay masulti o mahimo nga makapahiubos sa usag usa. (Col. 3:13) Gani, naay mga panahon nga ang uban basin makapasuko nato. (Efe. 4:26) Pero angay natong pugngan ang atong kaugalingon sa paghatag ug tambag kon naa ta sa kasuko. Ngano? Kay “ang kasuko sa tawo dili moresultag pagkamatarong nga iya sa Diyos.” (Sant. 1:20) Kon motambag ta nga nasuko, basin mosamot ra hinuon ang problema. Wala ni magpasabot nga dili ta puwedeng mosulti sa atong gibati niadtong nakapasuko nato. Pero mas maayong maghulat ta nga mokalma una ang atong gibati ayha ta makig-estorya niya. Matikdi ang ehemplo ni Elihu, nga naghatag ug maayong tambag kang Job.

15. Unsay atong makat-onan sa ehemplo ni Elihu? (Tan-awa sab ang hulagway.)

¹⁵ Pipila ka adlaw nang naminaw si Elihu kang Job nga nagdepensa sa iyang kaugalingon gikan sa sayop nga akusasyon sa iyang nagpakaaron-ingnong mga higala. Naluoy si Elihu kang Job. Pero kadugayan nasuko na siya kang Job kay nagpasagad na lang ug estorya si Job bahin kang Jehova ug nagpokus na pag-ayo sa iyang kaugalingon. Bisan pa ana, naghulat si Elihu ug hustong panahon sa pagsulti, ug dihang miestorya na siya, iyang gitambagan si Job sa buotan ug matinahoron kaayo nga paagi. (Job 32:2; 33:1-7) Ang ehemplo ni Elihu nagtudlo natog importanteng leksiyon: Ang tambag angayng ihatag sa hustong panahon ug sa hustong paagi—uban ang pagtahod ug gugma.—Eccl. 3:1, 7.

PADAYON SA PAGHATAG UG PAGDAWAT UG TAMBAG

16. Unsang leksiyon ang imong makat-onan sa Salmo 32:8?

¹⁶ Ang temang teksto niini nga artikulo nag-ingon nga ‘si Jehova nagatambag nato samtang nagatan-aw siya kanato.’ (Basaha ang Salmo 32:8.) Kini nagpakita nga padayon gyod siyang motabang nato. Gawas nga naghatag siya natog tambag, iya pod tang gitabangan sa pagpadapat niini. Maayo gyod siya nga ehemplo para nato. Busa kon mohatag tag tambag sa uban, masundog nato si Jehova kon himoon pod nato ang atong maarangan sa pagtabang nila nga makahimog maalamong desisyon.

17. Kon ang mga ansiyano mohatag ug espesipiko ug binase sa Bibliya nga tambag, unsay ilang gipamatud-an? Ipatin-aw. (Isaias 32:1, 2)

¹⁷ Importante kaayo ilabina karon nga mohatag ta ug modawat ta ug maayong mga tambag. (2 Tim. 3:1) Ang mga ansiyano nga mohatag ug espesipiko ug binase sa Bibliya nga mga tambag “mahisamag mga sapa diha sa yuta nga walay tubig.” (Basaha ang Isaias 32:1, 2.) Bililhon kaayo para nato ang mga higala nga nahibalo kon unsay gusto natong madungog, pero mosulti gihapon kon unsay kinahanglan natong madungog. Sama silag “bulawang mansanas sa sudlanan nga plata.” (Prov. 25:11) Hinaot kitang tanan padayong maningkamot nga makakat-on sa paghatag ug pagdawat ug maayong tambag.