Salig nga Gimahal Ka Pag-ayo ni Jehova

1. Nganong midesisyon ka nga alagaran si Jehova? (Tan-awa sab ang hulagway.)

NAHINUMDOM pa ba ka niadtong midesisyon ka nga moalagad kang Jehova? Imo nang gihimo kay nakaila na ka niya ug imo siyang gihigugma. Nanaad ka nga imong unahon sa imong kinabuhi ang pagbuhat sa iyang kabubut-on, ug nga padayon nimo siyang higugmaon sa tibuok nimong kasingkasing, kalag, hunahuna, ug kusog. (Mar. 12:30) Sukad niadtong panahona, mas milalom pa ang imong gugma kang Jehova. Busa, unsa may imong itubag kon naay mangutana nimo, “Gimahal ba gyod nimo si Jehova?” Seguradong dili ka magduhaduha nga moingon, “Gimahal nako siya labaw pa kang bisan kinsa.”

2-3. Unsay gusto ni Jehova nga atong tuohan, ug unsay atong hisgotan niining artikuloha? (Jeremias 31:3)

² Pero komosta kon naay mangutana nimo, “Segurado ba gyod ka nga gimahal ka ni Jehova?” Unsay imong itubag? Magduhaduha ba ka kay naghunahuna ka nga dili ka angayng higugmaon ni Jehova? Ang usa ka sister nga wala magdako sa mahigugmaong pamilya miingon: “Segurado ko nga gimahal nako si Jehova. Ang problema kay magduhaduha ko pirme kon gimahal ba gyod ko niya.” Pero unsa man gyoy gibati ni Jehova para nimo?

³ Gusto ni Jehova nga motuo ka nga gimahal ka niya. (Basaha ang Jeremias 31:3.) Ang tinuod si Jehova mismo ang nagkabig nimo. Ug dihang nanaad ka nga moalagad niya ug nagpabawtismo, nadawat nimo ang usa ka espesyal kaayo nga regalo—ang iyang maunongong gugma. Gimahal ka niya pag-ayo ug dili gyod ka niya biyaan. Tungod sa iyang maunongong gugma, iyang giisip ang iyang matinumanong mga alagad—apil ka—ingong iyang “bililhon nga katigayonan.” (Mal. 3:​17, footnote) Gusto ni Jehova nga makombinsir ka nga gimahal ka niya, sama nga kombinsido kaayo si apostol Pablo nga gimahal siya ni Jehova. Gani, si Pablo misulat: “Kombinsido ko nga ang kamatayon o kinabuhi o mga anghel o mga gobyerno o mga butang nga nia karon o mga butang nga moabot o mga gahom o gihabogon o giladmon o bisan unsang ubang linalang dili makabulag nato gikan sa gugma sa Diyos.” (Roma 8:​38, 39) Niining artikuloha, atong hisgotan kon nganong kinahanglan tang motuo nga gimahal ta ni Jehova ug kon unsay atong himoon aron makombinsir ta niana.

KON NGANONG KINAHANGLAN TANG MOTUO NGA GIMAHAL TA NI JEHOVA

4. Sa unsang paagi masuklan nato ang usa sa mga lit-ag ni Satanas?

⁴ Kon motuo ta nga gimahal ta ni Jehova, masuklan nato ang usa sa “mga lit-ag” ni Satanas. (Efe. 6:11) Si Satanas naningkamot pag-ayo kutob sa iyang mahimo nga pahunongon ta sa pag-alagad kang Jehova. Ang usa sa mga paagi nga iya nang ginahimo mao nga patuohon ta niya nga wala ta higugmaa ni Jehova. Hinumdomi nga si Satanas nag-obserbar nato. Sama siyag leyon nga naghulat ug saktong panahon sa pagtukob sa iyang biktima. Sagad atakehon ta niya panahon nga luya ta. Pananglitan kon naguol ta tungod sa atong dili maayong mga kaagi, sa atong presenteng mga problema, ug sa atong mga gikabalak-an bahin sa umaabot. (Prov. 24:10) Pahimuslan niya ang panahon nga luya ta aron pahunongon ta sa pag-alagad. Pero kon padayon natong palig-onon ang atong pagsalig nga gimahal ta ni Jehova, mas ‘makabarog ta batok’ kang Satanas ug sa iyang malimbongong mga lit-ag.—1 Ped. 5:​8, 9; Sant. 4:7.

5. Nganong importante nga bation nato nga gimahal ug gipabilhan ta pag-ayo ni Jehova?

⁵ Kon motuo ta nga gimahal ta ni Jehova, mas masuod ta niya. Nganong makaingon ta ana? Kay dihang gilalang ta ni Jehova, gibutang niya sa atong kasingkasing ang tinguha nga mahigugma ug higugmaon sa uban. Kon naay magpakita natog gugma, mapalihok pod ta sa pagpakita nilag gugma. Maong kon bation nato nga gimahal ug gipabilhan ta ni Jehova, mapalihok ta nga higugmaon siya. (1 Juan 4:19) Ug kon mas molalom ang atong gugma kang Jehova, mas molalom pod ang iyang gugma para nato. Ang Bibliya nag-ingon: “Duol sa Diyos, ug siya moduol kaninyo.” (Sant. 4:8) Pero unsay atong buhaton aron mas makombinsir ta nga gimahal ta ni Jehova?

KON UNSAY MAKATABANG NATO ARON MOTUO TA NGA GIMAHAL TA NI JEHOVA

6. Kon dili ta segurado nga gimahal ta ni Jehova, unsay puwede natong iampo?

⁶ Magmaespesipiko ug ayawg hunong sa pag-ampo. (Luc. 18:1; Roma 12:12) Puwede nimong balikbalikon ug hangyo si Jehova kada adlaw nga tabangan ka nga lantawon ang imong kaugalingon sama sa iyang panglantaw kanimo. Usahay, hukman tingali ka sa imong kasingkasing maong lisod para nimo nga motuo nga gimahal ka ni Jehova. Pero hinumdomi nga si Jehova mas labaw kay sa imong kasingkasing. (1 Juan 3:​19, 20) Mas nakaila siya nimo kay sa imong pagkaila sa imong kaugalingon. Naa siyay nakita nimo nga wala tingali nimo makita. (1 Sam. 16:7; 2 Cron. 6:30) Maong ayaw pagduhaduha nga “ibubo” kaniya ang tanan nimong gibati, ug hangyoa siya nga tabangan ka nga motuo nga gihigugma ka niya. (Sal. 62:8) Dayon lihok uyon sa imong mga pag-ampo pinaagi sa pagpadapat sa mosunod nga mga sugyot.

7-8. Sa unsang paagi gipakita sa mga Salmo nga gimahal gyod ka ni Jehova?

⁷ Salig sa giingon ni Jehova. Ang mga magsusulat sa Bibliya gigiyahan sa pagsulat bahin kang Jehova aron mailhan nimo kon unsa gyod siyang klaseha sa Diyos. Konsideraha ang makapatandog nga mga pulong ni salmistang David bahin kang Jehova. Siya miingon: “Si Jehova duol niadtong mga dugmok ug kasingkasing; iyang luwason kadtong mga naluya ang buot.” (Sal. 34:18) Dihang maguol ka pag-ayo, mobati tingali kang nag-inusara. Pero si Jehova nagsaad nga dihang dugmok ang imong kasingkasing, duol siya nimo kay nahibalo siya nga nianang panahona mas gikinahanglan nimo ang iyang tabang. Sa laing Salmo, si David misulat: “Tigoma ang akong mga luha sa imong panit nga sudlanan.” (Sal. 56:8) Nakita ni Jehova ang imong mga kasakit ug kaguol ug nakasabot siya kon unsa ni ka lisod para nimo. Dili gyod niya balewalaon ang imong mga luha. Gani, iya ning gitigom kay importante ni para niya, sama nga importante kaayo para sa usa nga nagbiyahe ang tubig nga iyang gidala. Sa Salmo 139:​3, atong mabasa: “Sinati ka [Jehova] sa tanan nakong dalan.” Nakita ni Jehova ang tanan nimong ginahimo, pero nagpokus lang siya sa maayong mga butang nga imong gihimo. (Heb. 6:10) Ngano? Kay gipabilhan niya ang tanan nimong paningkamot nga mapalipay siya.a

⁸ Pinaagi niining makapahupayng mga teksto nga iyang gipasulat diha sa Bibliya, samag miingon si Jehova: “Gusto kong mahibalo ka nga gimahal ti ka pag-ayo ug importante kaayo ka para nako.” Pero sa ato nang nahisgotan sa miaging mga parapo, gusto ni Satanas nga patuohon ka nga wala ka higugmaa ni Jehova. Maong kon naay mga higayon nga magduhaduha ka kon gimahal ba ka ni Jehova, pangutan-a ang imong kaugalingon, ‘Kinsa may akong tuohan—“ang amahan sa bakak” o “ang Diyos sa kamatuoran”?’—Juan 8:44; Sal. 31:5.

9. Unsay gipasalig ni Jehova para niadtong mga nahigugma niya? (Exodo 20:​5, 6)

⁹ Hunahunaa kon unsay pagbati ni Jehova niadtong mga nahigugma niya. Konsideraha kon unsay giingon ni Jehova kang Moises ug sa mga Israelinhon. (Basaha ang Exodo 20:​5, 6.) Si Jehova nagsaad nga padayon siyang magpakitag maunongong gugma sa mga nahigugma niya. Ang iyang giingon nagpasalig nato nga ang atong maunongong Diyos dili kay igo rang modawat ug gugma gikan sa iyang mga magsisimba, kondili pakitaan pod niya silag gugma ingong balos. (Neh. 1:5) Maong kon naay mga higayon nga nagduhaduha ka kon gimahal ba ka ni Jehova, pangutan-a ang imong kaugalingon, ‘Gimahal ba nako si Jehova?’ Dayon hunahunaa ni: Kon gimahal nimo si Jehova ug naningkamot ka nga mapalipay siya, makasalig ka nga gimahal ka niya pag-ayo. (Dan. 9:4; 1 Cor. 8:3) Sa ato pa, kon wala ka magduhaduha nga gimahal nimo si Jehova, wala pod kay rason nga magduhaduha nga gimahal ka niya. Makasalig gyod ka sa iyang gugma ug pagkamaunongon.

10-11. Unsay gusto ni Jehova nga imong hunahunaon bahin sa lukat? (Galacia 2:20)

¹⁰ Pamalandonga ang lukat. Ang halad lukat ni Jesu-Kristo mao ang kinadak-ang regalo ni Jehova para sa katawhan. (Juan 3:16) Pero regalo pod ba kini ni Jehova para nimo mismo? Oo! Konsideraha ang kasinatian ni apostol Pablo. Nakahimo siyag seryosong mga sala sa wala pa siya mahimong Kristohanon, ug kinahanglan siyang makigbisog sa iyang mga kahuyangan. (Roma 7:​24, 25; 1 Tim. 1:​12-14) Pero kombinsido siya nga ang lukat maoy personal nga regalo ni Jehova para niya. (Basaha ang Galacia 2:20.) Hinumdomi nga si Jehova ang nagpasulat niining mga pulonga kang Pablo, ug ang tanang nasulat diha sa Bibliya gisulat aron tudloan ta. (Roma 15:4) Busa ang gisulat ni Pablo nagpakita nga gusto ni Jehova nga isipon nimo ang lukat ingong Iyang personal nga regalo para nimo. Kon ingon ana ang imong pag-isip sa lukat, mas makombinsir ka nga personal gyod kang gimahal ni Jehova.

¹¹ Mapasalamaton ta kang Jehova kay iyang gipadala si Jesus dinhi sa yuta aron mamatay para nato. Pero naa pay laing rason kon nganong mianhi si Jesus sa yuta. Gusto niyang isulti sa uban ang kamatuoran bahin kang Jehova nga Diyos, apil na kon unsay pagbati sa atong Amahan bahin nato nga iyang mga anak.—Juan 18:37.

KON GIUNSA TA PAGTABANG NI JESUS NGA MOSALIG SA GUGMA NI JEHOVA

12. Nganong makasalig ta sa giingon ni Jesus bahin kang Jehova?

¹² Sa dinhi pa si Jesus sa yuta, daghan siyag gisulti bahin kang Jehova ug sa Iyang personalidad. (Luc. 10:22) Daghan gyod tag rason nga mosalig sa giingon ni Jesus bahin kang Jehova. Ngano? Kay dugay na kaayo silang nag-uban didto sa langit sa wala pa moanhi si Jesus sa yuta. (Col. 1:15) Nakita ug naobserbahan mismo ni Jesus kon unsa ka dako ang gugma ni Jehova sa iyang matinumanong mga alagad dinhi sa yuta. Giunsa pagtabang ni Jesus ang uban nga mosalig sa gugma ni Jehova?

13. Unsay gusto ni Jesus nga atong isipon bahin kang Jehova?

¹³ Gusto ni Jesus nga isipon nato si Jehova ingong atong Amahan. Sa mga Ebanghelyo, kapig 160 ka beses nga gitawag ni Jesus si Jehova ingong “Amahan.” Ug dihang nakig-estorya siya sa iyang mga sumusunod, migamit siyag mga pulong sama sa “inyong Amahan” ug “inyong langitnong Amahan.” (Mat. 5:16; 6:26) Ang study note sa Mateo 5:16 nag-ingon: “Ang mga alagad sa Diyos kaniadto migamit ug daghang mga titulo nga nagpakita sa pagkahalangdon ni Jehova, sama sa ‘Labing Gamhanan,’ ‘ang Labing Hataas,’ ug ang ‘Dakong Maglalalang,’ pero si Jesus kanunayng migamit ug simple ug komon nga termino nga ‘Amahan’ aron ipakita nga gusto sa Diyos nga makigsuod sa iyang mga magsisimba.” Klaro nga gusto ni Jesus nga isipon nato si Jehova ingong mahigugmaong Amahan, kinsa nahigugma sa Iyang mga anak. Atong hisgotan ang duha ka pananglitan kon giunsa paggamit ni Jesus ang pulong “Amahan.”

14. Giunsa pagpakita ni Jesus nga ang matag usa nato bililhon sa atong langitnong Amahan? (Mateo 10:​29-31) (Tan-awa sab ang hulagway.)

¹⁴ Una, konsideraha ang giingon ni Jesus diha sa Mateo 10:​29-31. (Basaha.) Ang mga goryon maoy gagmayng langgam nga dili gyod makahimo sa paghigugma o pagsimba kang Jehova. Pero ang matag goryon bililhon sa atong Amahan. Gani mahibaloan niya kon naay usa niini nga mahulog sa yuta. Kon gipabilhan ni Jehova kini nga mga langgam, labaw na gyod nga gimahal ug gipabilhan niya ang matag usa sa iyang matinumanong mga magsisimba nga nag-alagad niya tungod sa gugma! “Nahibalo pa gani siya sa gidaghanon sa buhok sa [atong] ulo.” Bahin niini, ang study note sa bersikulo 30 nag-ingon: “Kay nahibalo kaayo si Jehova bisan niining ginagmayng mga detalye, nagpakita ni nga interesado kaayo siya sa matag usa sa mga sumusunod sa Kristo.” Klaro nga gusto ni Jesus nga motuo ta nga bililhon ta sa atong langitnong Amahan.

15. Unsay imong makat-onan sa giingon ni Jesus sa Juan 6:44 bahin sa imong langitnong Amahan?

¹⁵ Matikdi ang laing higayon nga gigamit ni Jesus ang pulong “Amahan.” (Basaha ang Juan 6:44.) Ang imong langitnong Amahan mismo ang nagkabig o mahigugmaong nagdala nimo sa kamatuoran. Nganong gikabig ka niya? Kay naa siyay nakitang maayo diha sa imong kasingkasing. (Buh. 13:48) Ang study note sa Juan 6:44 nag-ingon nga posibleng naa sa hunahuna ni Jesus ang giingon ni Jeremias diha sa atong temang teksto: “Tungod sa akong maunongong gugma ikaw akong gikabig nganhi kanako [o sa footnote, mao nga padayon kong nagpakitag maunongong gugma kanimo].” (Jer. 31:3; itandi ang Oseas 11:4.) Hunahunaa lang kon unsay gipasabot niana. Ang atong mahigugmaong langitnong Amahan kanunayng nagtan-aw sa atong maayong mga hiyas, nga tingali wala nato makita sa atong kaugalingon.

16. (a) Unsay gustong itudlo ni Jesus kanato, ug nganong angay tang motuo niya? (b) Sa unsang paagi mas makombinsir ka nga si Jehova ang Amahan nga imong gikinahanglan? (Tan-awa ang kahong “Ang Amahan nga Gikinahanglan Natong Tanan.”)

¹⁶ Pinaagi sa pagtawag kang Jehova ingong atong Amahan, samag miingon si Jesus: “Si Jehova dili lang kay akong Amahan, imo pod siyang Amahan. Ug segurado ko nga gimahal ug gipabilhan ka niya pag-ayo.” Maong kon naay mga panahon nga magduhaduha ka kon gimahal ba ka ni Jehova, pangutan-a ang imong kaugalingon, ‘Dili ba angay lang nga mosalig ko sa giingon ni Jesus kinsa nakaila pag-ayo sa Amahan ug kanunayng nagsulti sa tinuod?’—1 Ped. 2:22.

PADAYONG PALIG-ONA ANG IMONG PAGSALIG NGA GIMAHAL KA NI JEHOVA

17. Nganong kinahanglan natong palig-onon ang atong pagsalig nga gimahal ta ni Jehova?

¹⁷ Kinahanglang padayon natong palig-onon ang atong pagsalig nga gimahal ta ni Jehova. Sa ato nang nakat-onan, ang atong kaaway nga si Satanas naningkamot pag-ayo nga pahunongon ta sa pag-alagad kang Jehova. Dili gyod siya mohunong sa iyang paningkamot nga patuohon ta nga wala ta higugmaa ni Jehova. Pero di gyod ta magpadaog kang Satanas!—Job 27:5.

18. Sa unsang paagi mapalig-on nimo ang imong pagsalig nga gimahal ka ni Jehova?

¹⁸ Aron molig-on ang imong pagsalig nga gimahal ka ni Jehova, padayon siyang hangyoa nga tabangan ka nga lantawon ang imong kaugalingon sama sa iyang paglantaw kanimo. Konsideraha kon unsay giingon sa mga magsusulat sa Bibliya bahin sa gugma ni Jehova. Hunahunaa kon unsay iyang pagbati niadtong mga nahigugma niya—nga dili kay igo ra siyang modawat ug gugma, kondili magpakita pod siyag gugma ingong balos. Pamalandonga kon nganong angay nimong isipon ang lukat ingong personal nga regalo para nimo. Ug salig sa giingon ni Jesus nga si Jehova ang imong langitnong Amahan. Makatabang na aron nga kon naay mangutana nimo, “Segurado ba gyod ka nga gimahal ka ni Jehova?” dili na ka magduhaduha sa pagtubag, “Oo, gimahal ko niya! Ug naningkamot ko nga ipakita ang akong gugma kaniya kada adlaw!”