Ang Gugma sa Diyos Dili Gyod Molubad

1-2. Unsay giatubang sa daghang Kristohanon karon?

IMADYINA ang usa ka gamayng barko panahon sa kusog kaayo nga bagyo. Gikusokuso ni sa hangin ug gihapak sa dagkong mga balod. Posible kaayo nga maanod ni sa mga balod, gawas lang kon gamitan nig angkla. Ang angkla makatabang sa barko nga dili mapadpad palayo.

² Dihang makaatubang kag mga kalisdanan, mobati tingali ka nga mora kag barko nga gikusokuso sa bagyo. Mag-usab-usab ang imong emosyon. Tingali kombinsido ka karon nga gimahal ug gitabangan ka ni Jehova, pero pagkaugma basig magduhaduha na ka kon nakita ba gyod ni Jehova ang imong kahimtang. (Sal. 10:1; 13:1) Tingali gihupay ka sa imong higala, ug miarang-arang ang imong gibati. (Prov. 17:17; 25:11) Pero human ana, basin magduhaduha na pod ka. Tingali maghunahuna pa gani ka nga gipasagdan na ka ni Jehova. Unsay makatabang aron dili ka maanod palayo, nga mora bag gigamitan kag angkla? Sa ato pa, unsay makatabang nimo nga padayong mosalig sa gugma ug tabang ni Jehova?

3. Unsay gipasabot sa “maunongong gugma” nga gihisgotan sa Salmo 31:7 ug 136:​1, ug nganong makaingon ta nga si Jehova ang kinalabwan nga nagpakita niini nga hiyas? (Tan-awa sab ang hulagway.)

³ Ang usa ka paagi aron dili ta maanod palayo panahon sa kalisdanan mao ang paghinumdom sa maunongong gugma ni Jehova. (Basaha ang Salmo 31:7; 136:1.) Ang terminong “maunongong gugma” nagpasabot ug lawom nga pagbati nga mopalihok sa usa nga mounong pag-ayo. Si Jehova ang kinalabwan nga nagpakita niini nga klase sa gugma. Gani ang Bibliya nag-ingon nga siya “dagaya sa maunongong gugma.” (Ex. 34:6, 7) Ang Bibliya nag-ingon pod nga si Jehova ‘dagaya sa maunongong gugma alang niadtong tanan nga nagatawag kaniya.’ (Sal. 86:5) Unsay gipasabot niini nga mga teksto? Kini nagpakita nga dili gyod biyaan ni Jehova ang iyang matinumanong mga alagad. Ang paghinumdom nga si Jehova maunongon makatabang nimo nga magpabiling lig-on dihang makaatubang kag mga kalisdanan.—Sal. 23:4.

HINUMDOMI NGA ANG GUGMA NI JEHOVA MAOY USA SA PANGUNANG MGA PAGTULON-AN SA BIBLIYA

4. Unsa ang pipila sa pangunang mga pagtulon-an sa Bibliya, ug nganong lig-on kaayo ang atong pagtuo niana?

⁴ Ang laing paagi aron makapabilin kang lig-on panahon sa mga kalisdanan mao ang paghinumdom nga ang gugma ni Jehova maoy usa sa pangunang mga pagtulon-an sa Bibliya. Unsay imong mahunahunaan dihang makadungog ka sa terminong “pangunang pagtulon-an sa Bibliya”? Tingali mahunahunaan nimo ang mga pagtulon-an nga imong nakat-onan gikan sa Pulong sa Diyos. Pananglitan, imong nakat-onan nga Jehova ang ngalan sa Diyos, nga si Jesus ang bugtong Anak sa Diyos, nga ang mga patay wala nay nahibaloan, ug nga ang yuta mahimong Paraiso ug ang mga tawo magpuyo dinhi hangtod sa hangtod. (Sal. 83:18; Eccl. 9:5; Juan 3:16; Pin. 21:​3, 4) Dihang nakombinsir na ka pag-ayo niini nga mga pagtulon-an, dili na ka daling motuo sa sayop nga mga doktrina. Ngano? Kay nasabtan nimo nga ang mga pagtulon-an nga imong nakat-onan gibase sa kamatuoran. Sa susama, ang paghinumdom nga ang gugma ni Jehova maoy usa sa pangunang mga pagtulon-an sa Bibliya makapalig-on sa imong pagsalig nga nakita gyod ni Jehova ang imong mga kalisdanan. Sa unsang paagi? Atong tan-awon.

5. Sa unsang paagi masalikway nato ang sayop nga mga pagtulon-an?

⁵ Dihang nagsugod kag tuon sa Bibliya, unsay nakatabang nimo nga isalikway ang sayop nga mga pagtulon-an? Tingali imong gitandi ang gitudlo sa imong relihiyon ug ang gitudlo sa Bibliya. Pananglitan, ibutang ta nga kaniadto nagtuo ka nga si Jesus mao ang Labing Gamhanang Diyos. Pero dihang nagtuon na ka sa Bibliya, nakapangutana ka sa imong kaugalingon, ‘Tinuod ba kaha ning akong gituohan?’ Human nimo masusi kon unsay giingon sa Bibliya, nasabtan nimo nga sayop diay ang imong gituohan. Dayon ang maong sayop nga pagtulon-an imong giilisan sa kamatuoran nga gitudlo sa Bibliya, nga si Jesus mao “ang panganay sa tanang kalalangan” ug ang “bugtong nga Anak sa Diyos.” (Col. 1:15; Juan 3:18) Siyempre, ang sayop nga mga pagtulon-an posibleng nakagamot na pag-ayo kanato ug lisod biyaan. (2 Cor. 10:​4, 5) Pero dihang nakombinsir ka sa kamatuoran, imong gibiyaan ang maong sayop nga mga pagtulon-an ug wala na ka mobalik niana.—Filip. 3:13.

6. Nganong makasalig ka nga ang maunongong gugma ni Jehova “molungtad hangtod sa hangtod”?

⁶ Sama nga imong gisalikway ang sayop nga mga pagtulon-an ug gipulihan kinig mga kamatuoran nga naa sa Bibliya, mao pod nay angay nimong himoon sa imong mga pagduhaduha. Pananglitan, kon nag-atubang kag problema ug nagduhaduha ka kon gimahal ba ka ni Jehova, pangutan-a ang imong kaugalingon, ‘Sakto ba ning akong gihunahuna?’ Dayon pamalandonga kon unsay giingon sa Salmo 136:​1, nga maoy temang teksto niining artikuloha. Nganong gihisgotan sa teksto nga ‘maunongon’ ang gugma ni Jehova? Ug ngano kahang 26 ka beses gigamit sa maong salmo ang mga pulong nga “ang iyang maunongong gugma molungtad hangtod sa hangtod”? Sa ato nang nahisgotan, ang maunongong gugma ni Jehova sa iyang katawhan maoy usa sa pangunang mga pagtulon-an sa Bibliya, sama sa ubang mga pagtulon-an diha sa Bibliya nga imo nang gituohan. Dili gyod tinuod ang ideya nga wala kay bili ug wala ka higugmaa ni Jehova. Maong isalikway kana nga panghunahuna, sama nga imo gyong isalikway ang uban pang sayop nga mga pagtulon-an!

7. Unsa nga mga teksto sa Bibliya ang nagpasalig nga gihigugma gyod ta ni Jehova? Paghatag ug pananglitan.

⁷ Daghan pa tag mabasa nga mga pasalig diha sa Bibliya nga gihigugma gyod ta ni Jehova. Pananglitan, si Jesus miingon sa iyang mga tinun-an: “Mas labaw mog bili kay sa daghang goryon.” (Mat. 10:31) Ug si Jehova mismo miingon sa iyang katawhan: “Ako magpalig-on kanimo, oo, ako magtabang kanimo. Ako magahawid gayod kanimo sa akong tuong kamot sa pagkamatarong.” (Isa. 41:10) Matikdi kon unsa ni ka klaro nga mga pasalig. Si Jesus wala moingon nga ‘Tingali mas labaw mog bili,’ ug si Jehova wala moingon nga ‘Basig tabangan ti ka.’ Hinuon sila miingon: “Mas labaw mog bili” ug “Ako magtabang kanimo.” Maong kon makaatubang kag mga problema ug magduhaduha ka sa gugma ni Jehova, ang maong mga teksto dili lang makatabang nga mogaan ang imong gibati; makatabang pod ni nga makombinsir ka nga gihigugma gyod ka ni Jehova. Mao gyod ni ang tinuod. Kon iampo nimo kang Jehova ang imong mga pagduhaduha ug pamalandongon kini nga mga teksto, mahimong tinuod para nimo ang giingon sa 1 Juan 4:16: “Nahibaloan nato nga gihigugma ta sa Diyos ug mituo ta niini.”a

8. Unsay imong himoon kon magduhaduha gihapon ka usahay kon gimahal ba gyod ka ni Jehova?

⁸ Pero unsay makatabang nimo kon mobati gihapon ka usahay nga wala ka mahala ni Jehova? Ikompara kon unsay imong gibati sa kon unsay nahibaloan nimo bahin kaniya. Ang atong mga pagbati dili kasaligan, pero makasalig ta sa giingon sa Bibliya nga gimahal gyod ta ni Jehova. Kon dili ta motuo nga gimahal ta ni Jehova, sama rag wala ta motuo nga ang gugma mao ang iyang kinalabwang hiyas.—1 Juan 4:8.

HINUMDOMI NGA SI JEHOVA ‘NAGMAHAL KANIMO’

9-10. Unsa ang konteksto sa giingon ni Jesus sa Juan 16:​26, 27 nga “ang Amahan nagmahal kaninyo”? (Tan-awa sab ang hulagway.)

⁹ Naa tay dugang makat-onan bahin sa gugma ni Jehova pinaagi sa pagsusi sa giingon ni Jesus sa iyang mga tinun-an: “Ang Amahan nagmahal kaninyo.” (Basaha ang Juan 16:​26, 27.) Wala ni gisulti ni Jesus ngadto sa iyang mga tinun-an aron lang malipay sila. Gani ang konteksto niini nagpakita nga wala siya maghisgot bahin sa ilang mga pagbati niadtong panahona. Hinuon naghisgot siya ug laing topiko—ang pag-ampo.

¹⁰ Bag-o lang gisultihan ni Jesus ang iyang mga tinun-an nga angay silang moampo pinaagi sa iyang ngalan, pero dili sila angayng moampo kaniya. (Juan 16:​23, 24) Kinahanglan ning masabtan sa mga tinun-an ni Jesus. Ngano? Kay human sa iyang pagkabanhaw, basin matental sila nga moampo kang Jesus, ilabina kay suod sila kaniya. Basin maghunahuna sila nga kay gimahal man sila ni Jesus, siya ang maminaw sa ilang mga pag-ampo ug siyay mohangyo sa iyang Amahan para nila. Pero gipasidan-an sila ni Jesus nga dili sila angayng maghunahuna niana. Ngano? Iya silang giingnan: “Ang Amahan nagmahal kaninyo.” Kana nga kamatuoran maoy usa sa pangunang mga pagtulon-an sa Bibliya bahin sa pag-ampo. Konsideraha kon unsay kahulogan niana para nimo: Pinaagi sa imong pagtuon sa Bibliya, imong nailhan si Jesus ug nakakat-on ka nga higugmaon siya. (Juan 14:21) Pero sama sa mga tinun-an sa unang siglo, masaligon kang makaampo kang Jehova kay nahibalo ka nga ‘ang Amahan nagmahal kanimo.’ Sa matag higayon nga moampo ka kang Jehova, imong gipakita nga kombinsido ka nga gimahal gyod ka niya.—1 Juan 5:14.

SAYRA KON UNSAY HINUNGDAN SA IMONG MGA PAGDUHADUHA

11. Nganong malipay si Satanas kon magduhaduha ta sa gugma ni Jehova?

¹¹ Ngano kahang magduhaduha ta usahay sa gugma ni Jehova? Tingali moingon ka nga tungod na kang Satanas, ug tinuod pod baya na. Gusto sa Yawa nga ‘tukbon’ ta, maong malipay gyod siya kon magduhaduha ta sa gugma ni Jehova. (1 Ped. 5:8) Tungod sa gugma ni Jehova, iyang gitagana ang lukat. Pero gusto ni Satanas nga mobati ta nga makasasala kaayo ta ug dili gyod takos nga makabenepisyo sa lukat. (Heb. 2:9) Maong kon magduhaduha ta sa gugma ni Jehova, kinsay malipay? Si Satanas. Ug kon moundang ta sa pag-alagad tungod sa mga problema, kinsay malipay? Si Satanas gihapon. Hunahunaa ra ni: Si Satanas ang wala na higugmaa ni Jehova, pero gusto ta niyang patuohon nga kita ang wala higugmaa ug wala uyoni ni Jehova. Kon masabtan nato nga usa ni sa “mga lit-ag sa Yawa,” mapalig-on ta nga suklan siya.—Efe. 6:11; Sant. 4:7.

12-13. Nganong ang atong pagkamakasasala makapaduhaduha tingali nato sa gugma ni Jehova?

¹² Naa pay laing hinungdan kon nganong magduhaduha tingali ta usahay sa gugma ni Jehova. Unsa kana? Ang atong napanunod nga makasasalang kahimtang. (Sal. 51:5; Roma 5:12) Tungod sa sala, naputol ang maayong relasyon sa tawo gikan sa iyang Maglalalang. Nadaot pod niini ang iyang hunahuna, kasingkasing, ug panglawas.

¹³ Tungod pod sa sala, mobati tag pagkasad-an, kabalaka, kawalay-kasegurohan, ug kaulaw. Sagad bation nato ni dihang makahimo tag dili maayo, pero puwede pod ning motungha nga mga pagbati tungod kay nahibalo ta pag-ayo nga makasasala ta—nga naa tay sayop nga mga tendensiya nga sukwahi sa pagkadisenyo ni Jehova kanato. (Roma 8:​20, 21) Samag sakyanan nga dili bug-os maka-function kay hiyos ug ligid, dili pod nato bug-os mahimo o masunod kon unsay gusto ni Jehova para nato kay dili man ta hingpit. Tungod ana, usahay maglisod tag kombinsir sa atong kaugalingon nga gimahal ta ni Jehova. Kon mao nay atong bation, angay natong hinumdoman nga si Jehova “ang gamhanan ug kahibulongang Diyos nga . . . nagapakitag maunongong gugma niadtong nahigugma kaniya ug nagatuman sa iyang mga sugo.”—Neh. 1:5.

14. Sa unsang paagi ang pagpamalandong sa lukat makatabang nato nga masuklan ang panghunahuna nga wala ta higugmaa ni Jehova? (Roma 5:8) (Tan-awa sab ang kahong “Sukli ang ‘Malimbongong Gahom sa Sala.’”)

¹⁴ Usahay mobati tingali ta nga dili ta takos sa gugma ni Jehova. Ug tinuod pod baya na, kay bisag unsa pay atong himoon, dili gyod ta makapangangkon nga angayan tang modawat sa iyang gugma. Bisan pa ana, gitagana ni Jehova ang lukat tungod kay iya tang gimahal ug aron mapasaylo ang atong mga sala. (1 Juan 4:10) Mao nay rason kon nganong talagsaon kaayo ang gugma ni Jehova. Hinumdomi pod nga si Jesus mianhi sa yuta aron luwason ang mga makasasala, dili ang hingpit nga mga tawo. (Basaha ang Roma 5:8.) Kitang tanan dili hingpit, ug nahibalo gyod si Jehova nga masayop ta. Kon masabtan nato nga ang atong makasasalang kahimtang maoy hinungdan kon nganong magduhaduha ta usahay sa gugma ni Jehova, mas mahimo tang determinado nga suklan ang atong mga pagduhaduha.—Roma 7:​24, 25.

MAGMAUNONGON

15-16. Kon magmaunongon ta kang Jehova, sa unsa ta makasalig, ug ngano? (2 Samuel 22:26)

¹⁵ Gusto ni Jehova nga mohimo tag hustong desisyon pinaagi sa “pag-unong kaniya.” (Deut. 30:​19, 20) Kon ato nang himoon, makaseguro gyod ta nga padayon siyang magmaunongon kanato. (Basaha ang 2 Samuel 22:26.) Kon magmaunongon ta kang Jehova, makasalig gyod ta nga iya tang tabangan nga makalahutay sa bisan unsang situwasyon.

¹⁶ Sa ato nang nahisgotan, daghan tag rason nga magpabiling lig-on dihang makaatubang ug mga kalisdanan. Kombinsido ta nga gihigugma gyod ta ni Jehova ug iya gyod tang tabangan. Kana ang gitudlo sa Bibliya. Maong kon naay mga panahon nga magduhaduha ta sa iyang gugma, dili ta magpokus sa atong gibati. Hinuon, magpokus ta sa kon unsay atong nahibaloan bahin sa gugma ni Jehova. Hinaot nga padayon tang mosalig sa giingon sa Bibliya nga ang maunongong gugma ni Jehova molungtad hangtod sa hangtod.