Gitabangan Mi ni Jehova nga ‘Motubo Bisan asa Mi Gitanom’

Si Mats ug Ann-Catrin mieskuwela sa Gilead niadtong 1979 ug sulod sa daghang tuig, sila “gitanom,” o giasayn, nga mag-alagad sa lainlaing lugar, sama sa Iran, Mauritius, Myanmar, Tanzania, Uganda, ug Zaire. Didto sa Gilead nila nadawat ang maong tambag gikan sa ilang instruktor nga si Jack Redford, ug nakatabang to nila tungod kay kadaghan sila “gitanom,” “giibot,” ug “gitanom ug balik.” Ato silang pasultihon kon sa unsang paagi nakatabang nila ang maong tambag.

Mats, sultihi una mi kon sa unsang paagi ninyo nakat-onan ang kamatuoran.

Mats: Si Papa nagpuyo sa Poland panahon sa Gubat sa Kalibotan II, ug nakita gyod niya nga grabe kaayo ang pagpakaaron-ingnon sa Katolikong Simbahan. Pero pirme pod siyang moingon, “Naa gyoy tinuod nga relihiyon.” Sa ngadtongadto, nakita nako nga sakto gyod si Papa. Daghan kog gipalit nga mga libro, ug ang usa niana mao ang blue nga libro nga nag-ulohang Ang Kamatuoran nga Motultol sa Kinabuhing Dayon. Nainteres kaayo ko sa maong ulohan, maong gibasa dayon nako ang tibuok libro sa gabii nga ako ning napalit. Pagkabuntag, kombinsido ko nga nakita na nako ang kamatuoran!

Sukad niadtong Abril 1972, daghan kog gibasa nga mga publikasyon sa mga Saksi ni Jehova, ug natubag niini ang akong mga pangutana bahin sa Bibliya. Gibati nako nga sama ko sa negosyante sa ilustrasyon ni Jesus, kinsa nagbaligya dayon sa tanan niyang kabtangan aron mapalit ang usa ka perlas nga maayo kaayog klase. Sama niya, ako pong “gibaligya” ang akong plano nga moeskuwela sa unibersidad ug mahimong doktor, aron akong mapalit ang “perlas” sa kamatuoran nga akong nakita. (Mat. 13:​45, 46) Nabawtismohan ko niadtong Disyembre 10, 1972.

Pagkasunod tuig, ang akong ginikanan ug ang akong manghod nga lalaki midawat pod sa kamatuoran ug nabawtismohan. Pagka-Hulyo 1973, nagregular payunir ko. Usa sa madasigong payunir diha sa among kongregasyon mao si Ann-Catrin. Guwapa siya ug hamtong sa espirituwal. Nagkahigugmaay mi ug nagminyo niadtong 1975. Human adto mipuyo mig upat ka tuig sa Strömsund, usa ka nindot nga lugar sa Sweden nga daghag interesado.

Ann-Catrin: Si Papa nakakat-on sa kamatuoran dihang nag-eskuwela siya sa usa ka unibersidad sa Stockholm. Tulo ka bulan pa lang ko niadtong panahona, pero iya na kong gidala sa mga tigom ug sa pagsangyaw. Wala malipay si Mama adto, maong naningkamot siya nga pamatud-an nga sayop ang mga Saksi. Pero wala siyay nakitang sayop sa atong pagtulon-an, maong sa ngadtongadto nagpabawtismo pod siya. Pag-edad nakog 13, nabawtismohan ko, ug pagka-16 nako, nagregular payunir ko. Mialagad ko sa Umeå, diin dakog panginahanglan sa mga magsasangyaw, ug wala madugay nahimo kong espesyal payunir.

Dayon nagminyo mi ni Mats, ug daghan mig natabangan nga makakat-on sa kamatuoran. Usa nila mao si Maivor, usa ka babaye nga tin-edyer nga miundang sa iyang career sa sports ug nahimong partner sa akong manghod nga babaye sa pagpayunir. Nag-Gilead sila niadtong 1984 ug nag-alagad karon ingong mga misyonaryo sa Ecuador.

Sa inyong lainlaing asaynment ingong misyonaryo, giunsa ninyo pagpadapat ang tambag nga ‘tubo bisan asa mo itanom’?

Mats: Kadaghan ming nakadawat ug lainlaing asaynment, maong pirme ming “itanom ug balik.” Pero naningkamot mi nga magpabiling “nakagamot pag-ayo” diha kang Jesus pinaagi sa pagsundog sa iyang mga hiyas, ilabina ang iyang pagkamapainubsanon. (Col. 2:​6, 7) Pananglitan, imbes magdahom nga ang mga igsoon maoy mo-adjust para namo, naningkamot mi nga masabtan ang ilang panghunahuna, kultura, ug mga pamaagi. Samag kahoy nga “gitanom sa daplin sa kasapaan,” ang among pagsundog kang Jesus nakatabang namo nga padayong motubo ug molambo bisan asa mi iasayn.—Sal. 1:​2, 3.

Ann-Catrin: Aron motubo ang usa ka kahoy human kini itanom ug balik, nagkinahanglan pod nig kahayag ug kainit sa adlaw. Ug si Jehova nagsilbi gyong “among adlaw.” (Sal. 84:11) Tungod niya, gibati namo ang init nga gugma sa mga igsoon. Pananglitan, sa among gamayng kongregasyon sa Tehran, Iran, ang mga igsoon didto maabiabihon kaayo, ug nagpahinumdom ni namo sa pagkamaabiabihon sa mga alagad ni Jehova sa kapanahonan sa Bibliya. Ganahan unta ming magpabilin sa Iran, pero niadtong Hulyo 1980, ang mga Saksi ni Jehova opisyal na nga gidili didto ug gipahibalo mi nga kinahanglan ming mobiya sulod sa 48 ka oras. Busa gibalhin mi sa Zaire (nga karon Congo) sa Africa.

Pagkahibalo nako nga mareasayn mi sa Africa, nakahilak ko. Nahadlok ko sa akong nadungog bahin sa mga bitin ug mga sakit didto sa Africa. Pero giingnan mi sa suod namo nga magtiayon nga nakaalagad didto sulod sa daghang tuig: “Nahadlok mo kay wala pa man mo makaadto didto. Sulayi lang, ug seguradong mag-enjoy gyod mo sa Africa!” Ug sakto gyod ang ilang giingon. Ang mga igsoon didto buotan ug mahigugmaon. Gani dihang kinahanglan ming mobiya sa Zaire unom ka tuig sa ulahi tungod sa pagdili, nahimuot ko kay nag-ampo na ko kang Jehova nga unta magpabilin mi sa Africa.

Unsang nindot nga mga eksperyensiya sa pag-alagad ang nakapadasig ninyo?

Mats: Tungod sa among asaynment, daghan mig nasuod nga mga misyonaryo gikan sa lainlaing nasod ug kultura. Dako pod namong kalipay nga makadumalag daghang mga Bible study. Usahay kami ni Ann-Catrin makadumalag tig-20 ka Bible study! Di pod nako malimtan ang gugma ug pagkamaabiabihon nga gipakita sa mga igsoon sa Africa. Panahon sa among pagbisita sa mga kongregasyon sa Tanzania, among iparking ang among Volkswagen Kombi duol sa balay sa mga igsoon. Adto mi matulog sa among sakyanan, ug ang mga igsoon naningkamot nga matagan-an ang among mga panginahanglan bisag pobre kaayo sila. (2 Cor. 8:3) Inigkahuman sa matag adlaw, ganahan kaayo mi ni Ann-Catrin nga mag-estoryahanay bahin sa nahitabo sa tibuok adlaw, ug dayon among pasalamatan si Jehova.

Ann-Catrin: Sa akong bahin, nalipay kaayo ko nga makauban ang mga igsoon sa lainlaing lugar. Nakakat-on mig bag-ong pinulongan sama sa Farsi, French, Luganda, ug Swahili, ug naeksperyensiyahan pod namo ang lainlaing kultura. Nalipay mi sa pagbansay sa mga bag-ohan, nasuod sa mga igsoon, ug ‘nagkahiusa sa pag-alagad’ kang Jehova uban nila.—Sof. 3:9.

Daghan pod mig nakita nga nindot nga mga kalalangan ni Jehova. Matag higayon nga makadawat mig bag-ong asaynment, eksayted mi kay nahibalo mi nga kauban namo si Jehova ingong among Tiggiya. Daghan siyag gitudlo namo nga dili gyod namo makat-onan kon wala ang iyang tabang.

Unsang mga kalisdanan ang inyong naatubang, ug giunsa na ninyo paglahutay?

Mats: Tungod sa klima didto, kadaghan ming nataptan ug sakit, sama sa malaria. Diha poy mga higayon nga si Ann-Catrin naoperahan. Nabalaka pod mi sa among tigulang na nga mga ginikanan, pero mapasalamaton mi sa among mga manghod nga maoy nag-atiman nila. Gibuhat nila ni uban ang pailob, kalipay, ug gugma. (1 Tim. 5:4) Pero naay mga higayon nga maguol mi, tungod kay gusto unta namo nga makaatiman pod mi sa among mga ginikanan.

Ann-Catrin: Niadtong 1983, samtang nag-alagad mi sa Zaire, nasakit ko ug kolera. Grabe kaayo ang akong gibati tungod adto, maong giingnan sa doktor si Mats, “Dad-a dayon siya sa laing nasod.” Pagkasunod adlaw, miadto mi sa Sweden sakay sa cargo plane, kay mao ra to ang eroplano nga nagbiyahe niadtong adlawa.

Mats: Nakahilak mi kay abi namog maundang na mi sa among pag-alagad ingong misyonaryo. Miingon ang doktor nga dili na maulian si Ann-Catrin, pero naulian siya. Ug human sa usa ka tuig, nakabalik mi sa Zaire ug giasayn sa gamayng kongregasyon sa Lubumbashi, nga nagsultig Swahili.

Ann-Catrin: Sa didto mi sa Lubumbashi, namabdos ko, pero namatay ang among anak sa wala pa siya matawo. Bisag wala mi magplano nga manganak, sakit kaayo to para nako. Niadtong panahona nga grabe kaayo ang akong kaguol, nakadawat mig wala damha nga panalangin gikan kang Jehova. Nakasugod mig mas daghang Bible study kay sukad masukad. Wala pay usa ka tuig, ang among kongregasyon miuswag. Ang 35 ra ka magmamantala nahimong 70, ug ang among attendance nga 40 nahimong 220. Nagkugi mi pag-ayo sa ministeryo, ug ang panalangin ni Jehova nakahupay gyod nako. Pero kanunay gihapon namong mahinumdoman ug maestoryahan ang among namatay nga anak. Eksayted mi sa panahon dihang bug-os nang ayohon ni Jehova ang kasakit nga among gibati.

Mats: Miabot ang panahon nga si Ann-Catrin mibatig grabeng kaluya ug kakapoy. Nadayagnos pod ko nga naay stage-four colon cancer ug kinahanglang operahan. Pero karon miarang-arang na ang akong kahimtang, ug si Ann-Catrin naningkamot nga himoon ang iyang maarangan sa pag-alagad.

Naamgohan namo nga dili lang kami ang nakaeksperyensiyag mga kalisdanan. Human sa genocide (pagpuo sa rasa) sa Rwanda niadtong 1994, among gibisita ang mga igsoon sa mga refugee camp. Nakita namo ang ilang pagtuo, paglahutay, ug ang ilang pagkamaabiabihon bisan sa lisod nga mga situwasyon. Nagtudlo to namo nga naa gyoy gahom si Jehova sa pagtabang sa iyang mga alagad nga makalahutay sa bisan unsang mga kalisdanan.—Sal. 55:22.

Ann-Catrin: Ang laing kalisdanan nga among naeksperyensiyahan nahitabo human sa branch dedication sa Uganda niadtong 2007. Human sa programa, mibiyahe mi uban sa mga misyonaryo ug mga Bethelite paingon sa Nairobi, Kenya. Mga 25 mi tanan. Sa wala pa mi makaabot sa border sa Kenya, naa mi nakasugat nga trak nga mikawat sa among linya ug mibangga namo. Ang among drayber ug ang lima ka igsoon namatay dihadiha, ug ang usa pa ka sister namatay didto sa ospital. Naghinamhinam gyod mi nga makita pag-usab ang among mga higala.—Job 14:​13-15.

Sa ngadtongadto, naulian ra ko sa akong mga injury. Pero kami ni Mats ug ang ubang mga igsoon nga kauban namo nakasinatig post-traumatic stress disorder. Moatake ni nako inigkagabii; makamata ko kay mora kog atakehon sa kasingkasing. Abi nakog mamatay na ko adto. Pero ang kinasingkasing nga pag-ampo kang Jehova ug ang pagbasa sa among paboritong mga teksto nakapahupay ug nakatabang gyod namo. Dako pog tabang namo ang pag-adto sa mga doktor. Karon miarang-arang na ang among gibati, ug nagahangyo mi kang Jehova nga tabangan mi sa paghupay sa uban nga nakasinatig ingon niini nga kondisyon.

Miingon mo nga panahon sa inyong mga kalisdanan, sama mog “mga itlog” nga gidala ni Jehova. Unsay buot ninyong ipasabot?

Mats: Kana maoy Swahili nga ekspresyon nga “Tumebebwa kama mayai mabichi,” o “Gidala mi samag mga itlog.” Samag usa ka tawo nga mag-amping nga dili mabuak ang mga itlog diha sa iyang mga kamot, mahigugmaon ming giampingan ug gisuportahan ni Jehova sa tanan namong asaynment. Kanunay gyod siyang nagtagana sa tanan namong panginahanglan, ug usahay sobra pa gani kay sa among gikinahanglan ang iyang ihatag. Gipakitaan pod mig konsiderasyon sa Nagamandong Lawas, ug usa na sa mga paagi nga gibati namo ang gugma ug tabang ni Jehova.

Ann-Catrin: Gusto nakong i-share ang usa ka pananglitan kon unsa ka mahigugmaon si Jehova. Usa ka adlaw, nakadawat mig tawag nga nagpahibalo namo nga si Papa, nga tua sa Sweden, gidala sa intensive care unit (ICU). Bag-o lang naulian si Mats sa malaria. Wala pod mi igong kuwarta nga ikapalit ug tiket sa eroplano pauli. Maong nakadesisyon mi nga ibaligya na lang ang among sakyanan. Dayon nakadawat mig duha ka tawag. Ang una maoy gikan sa usa ka magtiayon nga nakabalita sa among situwasyon ug gustong mobayad para sa usa ka tiket. Ang laing tawag maoy gikan sa edarang sister nga nagtigom ug kuwarta diha sa box nga iyang gimarkahag “Para niadtong nanginahanglan.” Paspas gyod kaayong miabot ang tabang ni Jehova!—Heb. 13:6.

Unsay inyong nakat-onan sa inyong kapig 50 ka tuig nga bug-os panahong pag-alagad?

Ann-Catrin: Nakita nako nga tinuod gyod ang giingon sa Bibliya nga mahimo tang kusgan kon “magpabilin [tang] kalmado ug mosalig” kang Jehova. Kon mosalig ta niya, iya gyod tang tabangan nga madaog ang atong mga kalisdanan. (Isa. 30:15; 2 Cron. 20:​15, 17) Kay gihimo namo ang among maarangan sa matag asaynment, nabatonan namo ang daghan kaayong panalangin gikan kang Jehova.

Mats: Ang pinakaimportanteng leksiyon nga akong nakat-onan mao nga angay kong mosalig kang Jehova sa tanang situwasyon ug mapailobong magpaabot kon unsaon ko niya pagtabang. (Sal. 37:5) Kanunay gyod niyang gituman ang iyang saad nga dili mi niya pasagdan. Hangtod karon, padayon namong nakita ang iyang tabang sa among presenteng asaynment dinhi sa Bethel sa Myanmar.

Nanghinaot mi nga daghan pang batan-on ang maningkamot nga mohimo pag dugang sa pag-alagad aron ila pong masinatian ang maunongong gugma nga gipakita ni Jehova kanamo. Masaligon mi nga kon magpagiya sila kang Jehova, iya silang tabangan nga motubo bisan asa sila itanom.