Si Jesus ‘Nakakat-on sa Pagkamasinugtanon’

Si Jesus kanunay gyong nagmasinugtanon kang Jehova. (Juan 8:29) Pero nganong ang Bibliya nag-ingon:“Nakat-onan niya ang pagkamasinugtanon gikan sa mga butang nga iyang giantos”?—Heb. 5:8.

Niadtong dinhi pa si Jesus sa yuta, nakaatubang siyag mga kahimtang nga wala niya maeksperyensiyahi didto sa langit. Gipadako siya sa matinumanon pero dili hingpit nga mga ginikanan. (Luc. 2:51) Gipaantos siya sa daotan nga relihiyosong mga lider ug sa dili matarong nga mga magmamando. (Mat. 26:59; Mar. 15:15) Ug ang Bibliya nag-ingon nga “siya nagpaubos ug nagmasinugtanon hangtod sa kamatayon.” Oo, siya nakasinatig sakit kaayo nga kamatayon.—Filip. 2:8.

Tungod niini nga mga kasinatian, ang pagkamasinugtanon ni Jesus mas nasulayan ug mas milig-on pa kay sa niadtong wala pa siya moanhi sa yuta. Mao nga siya gyod ang pinakakuwalipikado nga mahimong Hari ug Hataas nga Saserdote, kay nakasabot siya sa atong kahimtang. (Heb. 4:15; 5:9) Nahimo siyang mas bililhon kang Jehova human niya makat-oni ang pagkamasinugtanon gikan sa mga butang nga iyang giantos. Sama kang Jesus, mahimo pod tang mas bililhon kang Jehova ug mas magamit niya sa bisan unsang asaynment kon magpabilin tang masinugtanon bisan pa sa lisod nga mga kahimtang.—Sant. 1:4.