Si Jehova ang Tuboran sa Atong “Tumang Kalipay”

1-2. (a) Unsay gipangandoy sa daghang tawo karon? (b) Unsay atong hisgotan niini nga artikulo?

DAGHANG tawo karon ang nangandoy nga magmalipayon, maong nagbuhat silag bisan unsa nga gituohan nila nga makahatag ug kalipay. Bisan pa ana, daghan gihapon ang dili malipayon. Ang uban nalumsan sa grabeng kaguol ug mibati nga naay kulang sa ilang kinabuhi. Bisan gani kita nga mga alagad ni Jehova mobati pod niini usahay. Kay nagkinabuhi na ta sa “kataposang mga adlaw,” makadahom ta nga makaatubang tag makapaguol nga mga situwasyon nga “lisod sagubangon.”—2 Tim. 3:1.

² Niining artikuloha, atong hisgotan kon unsay makapawala sa atong kalipay ug kon unsay makapabalik sa atong kalipay. Pero ato unang hisgotan kon kinsay Tinubdan sa tinuod nga kalipay.

ANG TINUBDAN SA TINUOD NGA KALIPAY

3. Unsay atong makat-onan bahin kang Jehova gikan sa kalalangan? (Tan-awa sab ang mga hulagway.)

³ Si Jehova malipayon gyod nga Diyos. Ug gusto niya nga magmalipayon pod ta. Gani, makita nato ang iyang kalipay diha sa iyang kalalangan—ang atong nindot nga planeta, lainlaing kolor sa atong palibot, makalingaw nga mga hayop, ug daghang lami nga pagkaon. Gimahal gyod ta sa Diyos ug gusto niya nga ma-enjoy nato ang atong kinabuhi.

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Nganong malipayon gihapon si Jehova bisan pa sa mga pag-antos nga iyang nakita? (b) Unsay regalo ni Jehova kanato? (Salmo 16:11)

⁴ Bisan pag nakita ni Jehova ang tanang kasakit ug pag-antos sa mga tawo, siya usa gihapon ka “malipayong Diyos.” (1 Tim. 1:11) Wala niya tugoti kini nga mga pag-antos nga makapawala sa iyang kalipay. Nahibalo siya nga temporaryo ra ni. Naa na siyay gitakdang panahon aron bug-os taposon ang tanang kasakit ug pag-antos, ug mapailobon siyang nagpaabot nianang panahona. Pero sa pagkakaron, gipasaligan ta ni Jehova nga nakasabot siya sa mga problema nga atong ginaatubang, ug gusto gyod siyang motabang nato. Sa unsang paagi siya nagatabang nato? Ang usa ka paagi mao nga gihatagan ta niyag regalo nga kalipay. (Basaha ang Salmo 16:11.) Matikdi kon giunsa pagtabang ni Jehova ang iyang Anak nga si Jesus nga magmalipayon.

5-6. Nganong malipayon si Jesus?

⁵ Sa tanang gilalang ni Jehova, si Jesus ang pinakamalipayon. Ngano? Konsideraha ang duha ka rason. (1) “Siya ang larawan sa dili makita nga Diyos” ug hingpit niyang gisundog ang personalidad sa iyang Amahan. (Col. 1:15; tan-awa ang study note nga “happy” sa 1 Timoteo 6:15.) (2) Si Jesus ang pinakadugay nga nakauban sa iyang Amahan, kinsa mao ang Tinubdan sa kalipay.

⁶ Si Jesus malipayon gyod sa pagbuhat sa bisan unsa nga ipahimo sa iyang Amahan. (Prov. 8:​30, 31; Juan 8:29) Tungod ana, gimahal ug giuyonan siya ni Jehova.—Mat. 3:17.

7. Sa unsang paagi ta tinuod nga magmalipayon?

⁷ Sama kang Jesus, tinuod ta nga magmalipayon kon makigsuod ta kang Jehova, ang Tinubdan sa kalipay. Kon mogahin ta ug mas dakong panahon sa pagkat-on bahin kang Jehova ug maningkamot nga sundogon siya, mas magmalipayon gyod ta. Magmalipayon pod ta pinaagi sa pagbuhat sa kabubut-on sa Diyos ug sa pagkahibalo nga iya tang giuyonan.a (Sal. 33:12) Pero komosta kon naay mga panahon nga dili ta malipayon o kaha nagsige na lang tag kaguol? Nagpasabot ba ni nga wala ta uyoni ni Jehova? Wala. Nakasabot si Jehova nga dili ta hingpit, ug usahay makaeksperyensiya tag kasakit, kaguol, ug depresyon. (Sal. 103:14) Karon, atong hisgotan kon unsay makapawala sa atong kalipay ug kon unsay makapabalik sa atong kalipay.

AYAWG TUGOTI NGA NAAY MAKAPAWALA SA IMONG KALIPAY

8. Unsay puwedeng mahimong epekto kanato sa mga problema?

⁸ Makapawala sa kalipay #1: Mga problema. Nag-antos ba ka tungod sa paglutos, kalamidad, kalisod sa kinabuhi, sakit, o pagkatigulang? Dali rang mawala ang atong kalipay kon mag-atubang ta niana nga mga problema, ilabina kon limitado ra ang atong mahimo o wala gyod tay mahimo aron mausab ang atong situwasyon. Gani ang Bibliya nag-ingon nga “ang kasakit sa kasingkasing makadugmok sa espiritu.” (Prov. 15:13) Si Babis, usa ka ansiyano nga namatyag mga ginikanan ug igsoong lalaki sulod lang sa upat ka tuig miingon: “Mibati ko nga nag-inusara na lang ug walay mahimo sa akong situwasyon. Naa poy mga higayon nga magmahay ko kay tungod sa akong ka-busy, wala kaayo ko makagahin ug panahon para sa akong mga ginikanan ug sa akong igsoon sa wala pa sila mamatay.” Sama kang Babis, usahay makaatubang pod tag lisod kaayo nga mga kahimtang nga makapaluya nato sa pisikal ug makapaguol nato.

9. Unsay makapabalik sa atong kalipay? (Jeremias 29:​4-7, 10)

⁹ Unsay makapabalik sa atong kalipay? Mabalik ang atong kalipay kon realistiko ta ug mapasalamaton. Gipasiugda sa kalibotan nga magmalipayon lang ta kon maayo kaayo ang atong kahimtang. Pero dili na tinuod. Pananglitan, giingnan ni Jehova ang mga Hudiyo didto sa Babilonya nga dawaton ang ilang bag-ong kahimtang ingong mga binihag ug himoon ang ilang maarangan bisan pa sa ilang lisod nga situwasyon. (Basaha ang Jeremias 29:​4-7, 10.) Unsay leksiyon niini para nato? Paningkamoti nga dawaton ang imong kahimtang, ug magmapasalamaton sa maayong mga butang nga imong nadawat. Hinumdomi nga dili gyod ka pasagdan ni Jehova. (Sal. 63:7; 146:5) Si Effie, nga naparalisar tungod sa aksidente miingon: “Gitabangan gyod ko ni Jehova, sa akong pamilya, ug sa kongregasyon. Maong kon mosurender ko, mora bag wala nako pabilhi ang ilang tabang. Gusto gyod nakong ipakita kang Jehova ug sa mga igsoon nga mapasalamaton kaayo ko nila.”

10. Nganong puwede gihapon tang magmalipayon bisan pag makaatubang tag mga problema?

¹⁰ Bisan pag dili maayo ang kahimtang sa atong kinabuhi o kaha naay dili maayong mga butang nga mahitabo nato o sa atong pamilya, puwede gihapon tang magmalipayon.b (Sal. 126:5) Ngano? Kay ang atong kalipay wala magdepende sa atong kahimtang. Ang payunir nga si Maria miingon: “Kon makaatubang kag mga problema pero malipayon gihapon ka, wala ni magpasabot nga imo rang giluom ang imong gibati. Hinuon nagpasabot ni nga wala nimo kalimti ang mga saad ni Jehova. Tabangan ta sa atong Amahan aron dili mawala ang atong kalipay.” Hinumdomi nga bisag unsa pa ka lisod ang atong kahimtang karon, temporaryo ra ang tanan natong problema. Sama ra nig mga tunob diha sa balas sa baybayon. Sa dili madugay, mabanlas ra ni, ug walay magpabilin nga bisan unsang timailhan niini.

11. Sa unsang paagi ang ehemplo ni apostol Pablo makadasig nimo?

¹¹ Mobati ba ka usahay nga nakasinati kag mga problema tungod kay wala na ka uyoni ni Jehova? Kon mao, makatabang tingali nimo ang pagpamalandong sa matinumanong mga alagad ni Jehova nga nakasinati sab ug lisod kaayo nga mga kahimtang. Konsideraha ang ehemplo ni apostol Pablo. Si Jesus mismo ang nagpili niya nga isangyaw ang kamatuoran “ngadto sa kanasoran ingon man sa mga hari ug sa mga anak ni Israel.” (Buh. 9:15) Dako kaayo ni nga pribilehiyo! Pero wala ni magpasabot nga dili na gyod makasinati si Pablo ug mga problema. Gani, daghan kaayong problema ang iyang naatubang. (2 Cor. 11:​23-27) Nagpakita ba ni nga wala na siya uyoni ni Jehova? Siyempre wala! Ang tinuod, si Pablo nakalahutay tungod sa tabang ni Jehova. (Roma 5:​3-5) Karon, hunahunaa ang imong kahimtang. Nganong nakalahutay man ka nga matinumanon bisan pa sa mga problema nga imong giatubang? Tungod kana kay giuyonan ka ni Jehova.

12. Nganong posibleng makapawala sa atong kalipay ang mga tumong nga wala makab-ot?

¹² Makapawala sa kalipay #2: Mga tumong nga wala makab-ot. (Prov. 13:12) Tungod sa atong gugma ug pagkamapasalamaton kang Jehova, mapalihok ta nga magtakdag mga tumong sa pag-alagad. Pero kon ang atong mga tumong dili realistiko sa atong kahimtang, basin maguol ra ta sa ulahi. (Prov. 17:22) Ang payunir nga si Holly miingon: “Tumong nako nga moeskuwela sa School for Kingdom Evangelizers, moalagad sa laing nasod, o moboluntaryo sa pagpanukod sa Ramapo. Pero nausab ang akong kahimtang, maong wala na nako makab-ot ang maong mga tumong. Nasakitan kaayo ko. Makapaguol gyod kon naa kay gustong himoon pero dili nimo mahimo.” Mao pod nay gibati sa uban.

13. Kon limitado ra ang atong mahimo tungod sa atong kahimtang, unsang realistikong mga tumong ang puwede natong himoon?

¹³ Unsay makapabalik sa atong kalipay? Hinumdomi nga si Jehova dili demanding. Wala siya magdahom ug labaw pa sa atong makaya. Ang atong bili para kang Jehova wala magdepende sa kon unsay atong mahimo sa pag-alagad kaniya. Gusto ni Jehova nga magmatinumanon ta ug magmakasaranganon sa kon unsay kaya natong himoon. (Miq. 6:8; 1 Cor. 4:2) Mas nagpokus si Jehova sa atong tinguha nga mapalipay siya kay sa kaya natong himoon. Makataronganon ba kon mas labaw ang atong gidahom sa atong kaugalingon kay sa gidahom ni Jehova kanato?c Siyempre dili. Busa kon limitado lang ang imong mahimo sa pag-alagad kang Jehova, pagpokus sa kon unsay kaya nimong buhaton. Pananglitan, puwede kang makadasig sa mga batan-on sa inyong kongregasyon o makatabang sa mga tigulang. Puwede pod nimong himoong tumong nga palig-onon ang usa ka igsoon, tingali pinaagi sa pagpakig-estorya, pagtawag, o pag-text niya. Seguradong tabangan ka ni Jehova nga magmalipayon samtang naningkamot ka nga makab-ot ang imong realistikong mga tumong. Ug hinumdomi pod nga sa bag-ong kalibotan, dili na ta malimitahan sa atong mahimo sa pag-alagad kang Jehova. Mao nay nakadasig kang Holly, nga gihisgotan ganina. Siya miingon: “Kon maguol ko, akong ginapamalandong ang akong paglaom nga mabuhi hangtod sa hangtod. Sa tabang ni Jehova, puwede nakong makab-ot ang uban nakong tumong sa bag-ong kalibotan.”

14. Unsa pay makapawala sa atong kalipay?

¹⁴ Makapawala sa kalipay #3: Pagpatuyang sa gusto. Sa social media, makita nato ang mga tawo nga morag malipayon ug malamposon sa ilang kinabuhi tungod sa daghang maayong butang nga ilang na-enjoy. Pananglitan, mahimo nila ang tanan nilang gusto, makapalit ug bisan unsa, ug makaadtog lainlaing lugar. Tungod ana, daghan ang nadasig nga mangagpas anang mga butanga. Dili man sayop nga himoon nato ang mga butang nga makapalipay nato, kay mao nay pagkadisenyo ni Jehova nato. Gilalang ta niya nga mag-enjoy sa nindot nga mga butang. Pero nakita sa daghan nga ang mga butang nga abi nilang makahatag ug kalipay nakawala na hinuon sa ilang kalipay. Ang payunir nga si Eva miingon, “Kon magpokus lang ka sa paglipay sa imong kaugalingon, dili gyod ka makontento.” Mouyon gyod ta sa iyang giingon. Gani ang pagpatuyang sa atong mga gusto makapaguol nato.

15. Unsay atong makat-onan kang Haring Solomon?

¹⁵ Makat-onan nato sa eksperyensiya ni Haring Solomon nga dili gyod makahatag ug tinuod nga kalipay ang pagpatuyang sa atong gusto. Gisulayan niya nga maglipay pinaagi sa pagtagbaw sa iyang kaugalingon. Pananglitan, mikaon siyag lami nga mga pagkaon, nag-enjoy sa nindot nga musika, ug nakabaton ug daghang mahalong mga butang. Pero wala gyod siya makontento. Siya miingon: “Ang mata dili makontento sa makita niini; ug ang dalunggan dili matagbaw sa madungog niini.” (Eccl. 1:8; 2:​1-11) Ang gihunahuna sa mga tawo nga makahatag nilag kalipay puwedeng ipakasama sa kuwarta nga dako kunog bili pero peke diay. Dili gyod ni makahatag ug tinuod nga kaayohan.

16. Nganong makapalipay nato ang paghimog maayo para sa uban? (Tan-awa sab ang mga hulagway.)

¹⁶ Unsay makapabalik sa atong kalipay? Si Jesus nagtudlo nato nga “dunay labaw nga kalipay sa paghatag kay sa pagdawat.” (Buh. 20:35) Ang ansiyano nga si Alekos miingon: “Naningkamot ko nga mohimog maayo para sa uban. Nakatabang ni nako nga dili magpokus sa akong kaugalingon, maong malipayon ko.” Unsay imong mahimo para sa uban? Kon nakita nimo nga ang usa nabug-atan sa iyang mga problema, dasiga siya. Dili tingali nimo masulbad ang iyang mga problema, pero makahupay ka niya kon paminawan nimo siya ug maningkamot ka nga masabtan ang iyang gibati. Puwede pod nimo siyang pahinumdoman nga itugyan ang iyang mga problema kang Jehova. (Sal. 55:22; 68:19) Tabangi siya nga makita nga wala siya biyai ni Jehova. (Sal. 37:28; Isa. 59:1) Puwede pod kang motabang sa praktikal nga paagi. Pananglitan, puwede nimo siyang lutoan o ubanan sa paglakawlakaw. Dasiga siya nga mouban nimo sa ministeryo kay makapagaan ni sa iyang gibati. Tugoti si Jehova nga gamiton ka sa pagdasig sa uban. Kon magpokus ka sa uban imbes sa imong kaugalingon, magmalipayon gyod ka!—Prov. 11:25.

17. Nganong kang Jehova nagdepende ang atong kalipay? (Salmo 43:4)

¹⁷ Tinuod lang tang magmalipayon kon padayon tang makigsuod sa atong langitnong Amahan. Ang Bibliya nag-ingon nga si Jehova ang Tinubdan sa atong “tumang kalipay.” (Basaha ang Salmo 43:4.) Bisag unsa pay atong maeksperyensiyahan, makasalig ta nga puwede gihapon tang magmalipayon. Busa hinaot nga dili gyod ta mobiya kang Jehova, kay siya ang seguradong makahatag nato ug tinuod nga kalipay.—Sal. 144:15.