Himoang mas Sinsero ang Imong mga Pag-ampo

1-2. (a) Ngano tingaling malisdan ta usahay sa pagsulti kang Jehova kon unsa gyoy atong gibati? (b) Nganong makaseguro ta nga maminaw gyod si Jehova sa atong mga pag-ampo?

MOBATI ba ka usahay nga balikbalik, dili kinasingkasing, o rutina na lang ang imong mga pag-ampo? Daghan ang mibati niana. Tingali tungod sa atong ka-busy, dalidalion ra nato ang atong mga pag-ampo. O kaha basin malisdan ta nga mosulti kang Jehova sa atong gibati kay naghunahuna ta nga dili ta takos moduol niya.

² Gipasaligan ta sa Bibliya nga dili kinahanglang maayo kaayo pagkabalay ang atong mga pag-ampo. Ang importante kang Jehova mao nga moampo ta nga mapainubsanon ug kinasingkasing. Iyang paminawon “ang hangyo sa mga maaghop.” (Sal. 10:17) Maminaw siya pag-ayo sa matag pulong nga atong isulti kay interesado gyod siya nato.—Sal. 139:​1-3.

3. Unsang mga pangutana ang atong konsiderahon niining artikuloha?

³ Tingali makapangutana ta: Nganong dili ta angayng magduhaduha nga moampo kang Jehova? Unsay atong himoon aron mahimong mas sinsero ang atong mga pag-ampo? Sa unsang paagi ang pagpamalandong sa kinasingkasing nga mga pag-ampo nga narekord sa Bibliya makatabang aron mouswag ang kalidad sa atong mga pag-ampo? Ug unsay atong himoon kon nabalaka kaayo ta ug dili nato masulti kon unsa gyoy atong gibati? Atong hisgotan ang mga tubag niini nga mga pangutana.

AYAW PAGDUHADUHA SA PAG-AMPO KANG JEHOVA

4. Unsay makatabang aron dili ta magduhaduha nga moampo kang Jehova? (Salmo 119:145)

⁴ Dili ta magduhaduha nga moampo kang Jehova kon masabtan nato nga maunongon siya nga higala ug gusto niya nga molampos ta. Mao nay pag-isip sa magsusulat sa Salmo 119 bahin kang Jehova. Ang salmista nakaatubang ug daghang problema. Pananglitan, gibutangbutangan siya sa daotang mga tawo. (Sal. 119:​23, 69, 78) Kinahanglan pod siyang makigbisog sa iyang mga kahuyangan. (Sal. 119:5) Bisan pa niana, wala siya magduhaduha nga isulti kang Jehova ang iyang gibati.—Basaha ang Salmo 119:145.

5. Nganong kinahanglang moampo gihapon ta bisag naa tay negatibong mga pagbati? Iilustrar.

⁵ Gidapit ni Jehova ang tanan, bisan gani kadtong nakahimog seryosong mga sala, nga moampo kaniya. (Isa. 55:​6, 7) Maong dili nato angayng tugotan ang atong negatibong mga pagbati nga mopugong nato sa pag-ampo. Sa pag-ilustrar, ang usa ka piloto sa eroplano nahibalo nga kinahanglan siyang mokontak sa mga air traffic controller kon nagkinahanglan siyag tabang. Pero ibutang ta nga nagkaproblema siya ug wala siya mahibalo kon unsay buhaton, o kaha nasayop siya. Angay ba siyang magpadaog sa iyang kaulaw ug dili na lang mokontak nila? Siyempre dili! Angay gyod siyang mokontak nila ug mangayog tabang. Sa susama, bisag maglibog ta usahay kon unsay buhaton o kaha nakasala ta, dili ta angayng magduhaduha nga moampo kang Jehova.—Sal. 119:​25, 176.

UNSAY ATONG HIMOON ARON MAHIMONG MAS SINSERO ANG ATONG MGA PAG-AMPO?

6-7. Sa unsang paagi ang pagpamalandong sa mga hiyas ni Jehova makatabang aron mahimong mas sinsero ang atong mga pag-ampo? Paghatag ug pananglitan. (Tan-awa sab ang footnote.)

⁶ Kon atong ibubo ang atong kasingkasing kang Jehova pinaagi sa pagsulti kaniya sa tanan natong gibati, mahimong mas sinsero ang atong mga pag-ampo. Busa unsay atong buhaton aron mouswag ta niining bahina?

⁷ Pamalandonga ang mga hiyas ni Jehova.a Kon kanunay tang mamalandong sa iyang mga hiyas, mahimong mas sayon para nato ang pagsulti sa atong gihunahuna ug gibati. (Sal. 145:​8, 9, 18) Konsideraha ang sister nga si Kristine, nga naay bayolenteng amahan. Siya miingon: “Kaniadto, dili sayon para nako ang pagpakig-estorya kang Jehova ingong akong Amahan. Mahadlok ko nga basin isalikway ko niya tungod sa akong mga kahuyangan.” Unsang hiyas ni Jehova ang nakatabang kang Kristine? Siya miingon: “Akong gipamalandong ang maunongong gugma ni Jehova, maong kombinsido ko nga iya kong gimahal. Nahibalo ko nga dili gyod ko niya biyaan. Bisan pag makahimo kog mga sayop, mahigugmaon gihapon ko niyang tabangan. Maong sa mga panahon nga malipay ko o maguol, sayon na para nako nga isulti kang Jehova ang akong gibati.”

8-9. Nganong maayo nga hunahunaon una nato kon unsay gusto natong isulti sa dili pa ta moampo? Paghatag ug pananglitan.

⁸ Hunahunaa daan ang imong isulti. Sa dili pa ka moampo, puwede nimong pangutan-on ang imong kaugalingon: ‘Unsa may akong ginaatubang nga problema karon? Naa ba koy kinahanglang pasayloon? Nausab ba ang akong kahimtang ug nagkinahanglan ko sa tabang ni Jehova?’ (2 Hari 19:​15-19) Puwede pod natong sundogon ang ehemplo ni Jesus pinaagi sa paghunahuna kon unsay puwede natong iampo kang Jehova bahin sa Iyang ngalan, sa Iyang Gingharian, ug sa Iyang kabubut-on.—Mat. 6:​9, 10.

⁹ Konsideraha ang eksperyensiya sa sister nga si Aliska. Dihang nahibaloan niya nga dili na magdugay ang iyang bana tungod sa brain cancer, nalisdan siya sa pag-ampo. Siya miingon: “Grabe kaayo ang akong kaguol maong wala na ko kabalo kon unsay iampo.” Unsay nakatabang kang Aliska? Siya miingon: “Sa dili pa ko moampo, akong hunahunaon daan ang akong isulti, ug nakatabang ni aron dili lang puro problema ang akong iampo. Nakatabang pod ni aron mahimong mas kalmado ang akong hunahuna ug kasingkasing dihang moampo ko.”

10. Unsay kaayohan kon mogahin tag taas nga panahon sa pag-ampo? (Tan-awa sab ang mga hulagway.)

¹⁰ Paggahin ug taas nga panahon sa pag-ampo. Puwede man tang makaampo nga mubo ug kinasingkasing, pero mas masulti gyod nato ang tanan natong gibati kon mogahin tag taas nga panahon sa pag-ampo.b Ang bana ni Aliska nga si Elijah miingon: “Kadaghan ko moampo kada adlaw, pero mas nasuod ko kang Jehova dihang gihimo nakong mas taas ang akong mga pag-ampo. Si Jehova dili gyod kapoyon sa paghulat kon kanus-a ko mahumag ampo, maong dili ra ko magdalidali.” Sulayi ni: Pangitag oras ug lugar diin makaampo ka, nga tingali kusogkusog ug walay makadisturbo nimo. Batasana pod ang paggahin ug taas nga panahon sa pag-ampo.

PAMALANDONGA ANG KINASINGKASING NGA MGA PAG-AMPO NGA NAA SA BIBLIYA

11. Sa unsang paagi ta makabenepisyo kon pamalandongon nato ang kinasingkasing nga mga pag-ampo nga narekord sa Bibliya? (Tan-awa sab ang kahong “Parehas ba Mo ug Kahimtang?”)

¹¹ Makabenepisyo gyod ka kon pamalandongon nimo ang kinasingkasing nga mga pag-ampo ug mga salmo nga narekord sa Bibliya. Samtang imong basahon kon giunsa pagbubo sa mga alagad sa Diyos kaniadto ang ilang kasingkasing kang Jehova, mapalihok pod ka nga himoon na. Basin makadiskobre pod ka ug bag-ong mga ekspresyon sa pagdayeg nga puwede nimong iapil sa imong mga pag-ampo. Ug tingali makabasa pod kag mga pag-ampo sa mga alagad kaniadto nga parehas nimog kahimtang.

12. Unsay puwede natong ipangutana sa atong kaugalingon dihang mamalandong bahin sa pag-ampo nga atong nabasa sa Bibliya?

¹² Samtang mamalandong ka bahin sa pag-ampo nga imong nabasa diha sa Bibliya, pangutan-a ang imong kaugalingon: ‘Kang kinsa ni nga pag-ampo ug unsay iyang kahimtang niadtong panahona? Maomao ba mig gibati? Unsang mga leksiyon ang akong makat-onan gikan niini nga pag-ampo?’ Basin kinahanglan kang mag-research aron matubag ni nga mga pangutana, pero makabenepisyo gyod ka kon imo ning himoon. Konsideraha ang pipila ka pananglitan.

13. Unsa ang usa ka leksiyon bahin sa pag-ampo nga atong makat-onan kang Ana? (1 Samuel 1:​10, 11) (Tan-awa sab ang hulagway.)

¹³ Basaha ang 1 Samuel 1:​10, 11. Dihang gisulti ni Ana kini nga pag-ampo, nag-atubang siyag duha ka dagkong problema. Una, baog siya, ug ikaduha, ang iyang bana naay laing asawa nga nakapamiserable sa iyang kinabuhi. (1 Sam. 1:4-7) Kon nag-atubang kag problema nga nakapalisod sa imong kinabuhi, unsay imong makat-onan sa pag-ampo ni Ana? Nahupayan siya dihang migahin siyag taas nga panahon sa pag-ampo ug dihang iyang gibubo ngadto sa Diyos ang kabug-at nga iyang gibati. (1 Sam. 1:​12, 18) Sama kang Ana, mahupayan pod ta kon atong “itugyan ang [atong] palas-anon kang Jehova.” Mahimo nato na pinaagi sa pagsulti kaniya sa tanan natong gibati ug gikabalak-an.—Sal. 55:22.

14. (a) Unsa pay atong makat-onan kang Ana? (b) Sa unsang paagi ang pagpamalandong sa Pulong sa Diyos makapauswag sa kalidad sa atong mga pag-ampo? (Tan-awa ang footnote.)

¹⁴ Pipila ka tuig human matawo ang anak ni Ana nga si Samuel, iyang gidala ang bata ngadto sa hataas nga saserdoteng si Eli. (1 Sam. 1:​24-28) Sa kinasingkasing nga pag-ampo ni Ana, gisulti niya ang iyang pagsalig nga panalipdan ug atimanon gyod ni Jehova ang iyang maunongong mga alagad.c (1 Sam. 2:​1, 8, 9) Tingali naa ra gihapon ang iyang mga problema, pero nagpokus si Ana sa kon giunsa siya pagpanalangin ni Jehova. Unsay atong makat-onan? Mas malahutay nato ang atong mga problema kon magpokus ta sa kon giunsa ta pagtabang ni Jehova hangtod karon.

15. Dihang makasinati tag inhustisya, unsay atong makat-onan sa pag-ampo ni propetang Jeremias? (Jeremias 12:1)

¹⁵ Basaha ang Jeremias 12:1. Dihay higayon nga natugaw si propetang Jeremias kay iyang nakita nga nagmalamposon ang mga daotan. Naguol pod siya kay gimaltratar siya sa iyang mga isigka-Israelinhon. (Jer. 20:​7, 8) Makasabot gyod ta sa gibati ni Jeremias, ilabina dihang biaybiayon ta o dihang makita nato nga ang malimbongong mga tawo nangadato. Pero bisag gipahungaw ni Jeremias ang iyang gibati, wala niya kuwestiyona ang hustisya ni Jehova. Dihang nakita niya kon giunsa pagdisiplina ni Jehova ang Iyang rebelyosong katawhan, seguradong mas milalom pa ang pagsalig ni Jeremias sa hustisya sa Diyos. (Jer. 32:19) Sama kang Jeremias, puwede pod natong ipahungaw kang Jehova ang atong mga kalagot ug kahiubos, ug mosalig ta nga sa iyang gitakdang panahon, tul-iron niya ang bisan unsang inhustisya nga atong giatubang.

16. Kon limitado lang ang atong mahimo tungod sa atong kahimtang, unsay atong makat-onan sa nabihag nga Levihanon? (Salmo 42:​1-4) (Tan-awa sab ang mga hulagway.)

¹⁶ Basaha ang Salmo 42:​1-4. Kini nga awit nagpakita sa gibati sa nabihag nga Levihanon nga nalayo sa iyang mga isigkamagsisimba. Makasabot tingali ta sa iyang gibati ilabina kon mapriso ta tungod sa atong pagtuo o kaha dili na ta makagawas sa balay tungod sa sakit. Mag-usab-usab tingali ang atong emosyon—usahay malipayon ta, usahay maguol. Pero matabangan ta kon ato ning iampo kang Jehova. Kon ato ning himoon, mas masabtan nato ang atong gibati ug makabaton tag hustong panglantaw sa atong kahimtang. Pananglitan, naamgohan sa Levihanon nga naa pay laing mga paagi nga madayeg niya si Jehova. (Sal. 42:5) Iya pong gipamalandong kon sa unsang paagi siya giatiman ni Jehova. (Sal. 42:8) Kon kinasingkasing tang moampo sa Diyos, makatabang ni nato nga masabtan ang atong gibati, makabaton ug kalinaw, ug makalahutay.

17. (a) Unsay atong makat-onan sa pag-ampo ni propetang Jonas? (Jonas 2:​1, 2) (b) Sa unsang paagi ang mga pulong ug ekspresyon nga naa sa basahon sa Salmo makatabang nato dihang mag-atubang tag mga kalisdanan? (Tan-awa ang footnote.)

¹⁷ Basaha ang Jonas 2:​1, 2. Kini ang giampo ni propetang Jonas dihang naa siya sa tiyan sa dakong isda. Bisag misupak siya kang Jehova una pa ani, segurado siya nga paminawon gihapon siya ni Jehova. Sa iyang pag-ampo, migamit si Jonas ug mga pulong nga makita diha sa basahon sa Salmo.d Tingali pamilyar kaayo siya niini nga mga salmo ug iya ning gipamalandong maong napasaligan siya nga tabangan siya ni Jehova. Sa susama, kon naa tay na-memorize nga mga teksto, ato ning mahinumdoman ug makahupay ni nato dihang moampo ta kang Jehova panahon sa mga kalisdanan.

PADAYON SA PAGPAKIGSUOD KANG JEHOVA PINAAGI SA PAG-AMPO

18-19. Kon naay mga panahon nga maglisod ta kon unsay atong iampo kang Jehova, unsay gipasalig nato sa Roma 8:​26, 27?

¹⁸ Basaha ang Roma 8:​26, 27. Naa tingali mga panahon nga malumsan ta sa grabeng kabalaka, nga tungod niana maglisod tag sulti sa atong gibati ngadto kang Jehova. Pero naay makatabang nato. Nianang panahona, ang balaang espiritu sa Diyos maoy “mohangyo” para nato. Hinumdomi nga gigamit ni Jehova ang iyang balaang espiritu aron marekord ang daghang pag-ampo nga naa sa Bibliya. Maong kon maglisod tag sulti sa atong gibati, puwedeng isipon ni Jehova ang maong mga pag-ampo ingong atong personal nga mga hangyo, ug dunggon ni niya.

¹⁹ Konsideraha ang kasinatian ni Yelena, sister nga taga-Russia nga gidakop tungod kay nag-ampo siya ug nagbasag Bibliya. Grabe kaayo ang stress nga iyang gibati tungod sa iyang situwasyon, maong naglisod siyag ampo. Pero naay nakatabang niya. Siya miingon: “Adtong panahona, nahinumdoman nako nga kon bug-at kaayo ang akong gibati ug wala ko mahibalo kon unsay iampo, puwedeng isipon ni Jehova ang mga pag-ampo sa iyang mga alagad kaniadto . . . ingong akong personal nga mga hangyo. . . . Nakapahupay gyod to nako ilabina sa lisod kaayo nga kahimtang.”

20. Unsay makatabang aron makaampo gihapon ta bisan pa sa grabeng kabalaka?

²⁰ Dihang naa ta sa grabeng kabalaka, dili tingali ta makatarong ug ampo kay daghan tag gihunahuna. Unsay makatabang? Makatabang nato ang pagpaminaw sa mga audio recording sa basahon sa Salmo sa dili pa moampo. Puwede pod natong isulat ang tanan natong gibati, sama sa gihimo ni Haring David. (Sal. 18; 34; 142; mga superskripsiyon) Siyempre, walay estriktong paagi kon unsaon nato pag-andam ang atong kaugalingon sa dili pa moampo. (Sal. 141:2) Maong himoa kon unsay pinakamaayo para nimo.

21. Nganong puwede natong iampo kang Jehova ang tanan?

²¹ Makapahupay kaayo ang pagkahibalo nga nakasabot si Jehova sa atong gibati bisag dili pa nato ni isulti kaniya. (Sal. 139:4) Bisan pa ana, malipay siya dihang sultihan nato siya sa atong gibati ug dihang ipahayag nato ang atong pagsalig kaniya. Maong ayaw pagduhaduha sa pag-ampo sa atong langitnong Amahan. Puwede nimong gamiton ang mga pulong gikan sa mga pag-ampo nga naa sa Bibliya. Ibubo ang imong kasingkasing kang Jehova. Isulti kaniya ang tanan nimong kalipay ug mga kabalaka. Ingong tinuod nga Higala, makaseguro ka nga si Jehova naa pirme para nimo!