Ayawg Kalimot nga Iampo ang Uban

1. Nganong makaingon ta nga ang atong mga pag-ampo importante kang Jehova?

ANG pag-ampo talagsaon kaayo nga tagana. Hunahunaa ni: Giasaynan ni Jehova ug mga buluhaton ang mga anghel. (Sal. 91:11) Gihatagan pod niya ang iyang Anak ug bug-at nga mga responsibilidad. (Mat. 28:18) Pero iya pod bang giasayn sa uban ang pagpaminaw sa atong mga pag-ampo? Wala. Kay gusto ni Jehova nga siya gyod ang mohimo ana. Si Jehova ang “Tigpatalinghog sa pag-ampo,” ug siya mismo ang maminaw nato.—Sal. 65:2.

2. Nganong maayong ehemplo si apostol Pablo sa pag-ampo para sa uban?

² Bisag makaampo ta kang Jehova bahin sa atong mga gikabalak-an, dili pod nato angayng kalimtan nga iampo ang uban. Mao nay gihimo ni apostol Pablo. Pananglitan, iyang gisulatan ang kongregasyon sa Efeso: “Padayon mo nakong gihisgotan sa akong mga pag-ampo.” (Efe. 1:16) Nag-ampo pod si Pablo para sa mga indibiduwal. Pananglitan, iyang giingnan si Timoteo: “Mapasalamaton ko sa Diyos, [ug] wala gyod ti ka kalimti sa akong mga pangamuyo adlaw ug gabii.” (2 Tim. 1:3) Si Pablo naay kaugalingong mga problema nga kinahanglan niyang iampo. (2 Cor. 11:23; 12:​7, 8) Pero naggahin gihapon siyag panahon nga iampo ang uban.

3. Nganong malimot ta usahay nga iampo ang uban?

³ Usahay malimot tingali ta nga iampo ang uban. Ngano? Gihisgotan sa sister nga si Sabrinaa ang usa ka rason. Siya miingon: “Busy kaayo ang kinabuhi niining sistemaha. Usahay mapokus ra kaayo ta sa atong mga problema ug mga panginahanglan, maong basin ang ato rang kaugalingon ang atong ginaampo.” Ingon ana ba ka usahay? Kon mao, kini nga artikulo makatabang nimo. Maghisgot ni (1) kon nganong importante nga iampo nato ang uban ug (2) kon unsaon nato ni paghimo.

NGANONG ANGAY NATONG IAMPO ANG UBAN?

4-5. Nganong ang atong mga pag-ampo para sa uban naay “gamhanang epekto”? (Santiago 5:16)

⁴ Ang pag-ampo para sa uban naay “gamhanang epekto.” (Basaha ang Santiago 5:16.) Posible ba gyod nga mausab ang kahimtang kon atong iampo ang uban? Oo. Pananglitan, bisan pag nahibalo si Jesus nga ilimod siya ni apostol Pedro, siya miingon: “Nangamuyo ko sa Diyos nga unta ang imong pagtuo dili moangka.” (Luc. 22:32) Nahibalo pod si Pablo nga dakog tabang ang pag-ampo. Dihang sayop siyang giakusahan ug dayon gipriso didto sa Roma, iyang gisulatan si Filemon: “Naglaom ko nga pinaagi sa inyong mga pag-ampo mahibalik ko kaninyo.” (Filem. 22; tan-awa ang study note nga “for I am hoping that through your prayers.”) Ug mao gyod toy nahitabo. Si Pablo gibuhian ug nakapadayon sa pagsangyaw.

⁵ Siyempre, wala ni magpasabot nga kon moampo ta kang Jehova, ato siyang gipresyur. Nahibalo siya nga nabalaka ra ta sa atong mga igsoon, maong usahay modesisyon siya nga dunggon ang atong mga hangyo. Busa makaampo gyod ta kang Jehova nga kinasingkasing bahin sa usa ka situwasyon, ug dayon isalig na nato kaniya ang tanan.—Sal. 37:5; tan-awa ang 2 Corinto 1:11 ug mga study note.

6. Nganong ang pag-ampo para sa uban makatabang nga molalom ang atong pagbati kanila? (1 Pedro 3:8)

⁶ Ang pag-ampo para sa uban makatabang nato nga mobatig “kaluoy.” (Basaha ang 1 Pedro 3:8.) Kon mahibaloan nato nga nag-antos ang usa ka tawo, ang kaluoy mopalihok nato nga tabangan siya. (Mar. 1:​40, 41) Ang ansiyano nga si Michael miingon: “Dihang ako nang ginaampo ang panginahanglan sa uban, mas nasabtan na nako ang mga problema nga ilang ginaatubang. Tungod ana, mas milalom ang akong gugma para nila. Wala tingali sila kahibalo ani, pero mas naapresyar nako sila.” Ang ansiyano nga si Richard naghisgot pod ug laing kaayohan. Siya miingon: “Dihang atong iampo ang uban, mas mapalihok ta nga motabang nila.” Miingon pod siya: “Dihang atong tabangan sa praktikal nga paagi ang tawo nga atong ginaampo, sama rag mitabang ta nga matubag ang atong giampo para niya.”

7. Sa unsang paagi ang pag-ampo para sa uban makatabang nato nga makabatog balanseng panglantaw sa atong mga problema? (Filipos 2:​3, 4) (Tan-awa sab ang mga hulagway.)

⁷ Ang pag-ampo para sa uban makatabang nato nga makabatog balanseng panglantaw sa atong mga problema. (Basaha ang Filipos 2:​3, 4.) Ang matag usa nato naay problema nga ginaatubang kay nagkinabuhi ta sa kalibotan nga gikontrolar sa Yawa. (1 Juan 5:19; Pin. 12:12) Kon batasanon nato ang pag-ampo para sa uban, mapahinumdoman ta nga ang atong “mga igsoon sa tibuok kalibotan nakasinati sab sa samang mga pag-antos.” (1 Ped. 5:9) Ang payunir nga si Katherine miingon: “Ang pag-ampo para sa uban nagpahinumdom nako nga naa pod silay mga problema nga ginaatubang. Nakatabang na nako nga dili sobrang magpokus sa akong mga problema.”

GIKINAHANGLAN NILA ANG ATONG MGA PAG-AMPO

8. Kinsay puwede natong iapil sa atong mga pag-ampo? Paghatag ug pananglitan.

⁸ Kinsay puwede natong iapil sa atong mga pag-ampo? Makaampo ta para sa daghan. Pananglitan, makaampo ta para niadtong naay sakit, para sa mga batan-on nga gibiaybiay o gipresyur diha sa eskuwelahan, o niadtong naglisod na tungod sa katigulangon. Daghan sa atong mga igsoon ang gisupak sa ilang pamilya o sa gobyerno. (Mat. 10:​18, 36; Buh. 12:5) Ang uban kinahanglang mobiya sa ilang mga balay tungod sa kagubot sa politika. Naa poy mga igsoon nga naapektohan sa kalamidad. Wala tingali ta personal nga nakaila nila, pero kon ato silang iampo, atong gisunod ang sugo ni Jesus nga “maghigugmaay.”—Juan 13:34.

9. Nganong angay natong iampo kadtong mga nanguna sa organisasyon ni Jehova ug ang ilang mga asawa?

⁹ Puwede pod natong iampo kadtong mga nanguna sa organisasyon ni Jehova. Apil ana ang Nagamandong Lawas ug ang ilang mga helper, mga membro sa Branch Committee, mga overseer sa Bethel, tigdumala sa sirkito, ansiyano, ug mga ministeryal nga alagad. Kini nga mga brader naay kaugalingong mga problema ug kabalaka. Bisan pa ana, naghago sila para nato. (2 Cor. 12:15) Pananglitan, ang tigdumala sa sirkito nga si Mark miingon: “Lisod kaayo para nako nga layo ko sa akong tigulang nga mga ginikanan. Pareho sila nga luya nag panglawas. Bisag giatiman sila sa akong igsoon ug sa iyang bana, masakitan gihapon ko kay gamay ra kaayo kog mahimo para nila.” Wala tingali ta kabalo sa tanang gikabalak-an niining kugihan nga mga brader, pero angay nato silang iapil sa atong mga pag-ampo. (1 Tes. 5:​12, 13) Puwede pod natong iampo ang mga asawa niini nga mga brader, kay ang ilang maunongong suporta nakatabang sa mga bana nga makapadayon sa ilang asaynment.

10-11. Malipay ba si Jehova bisag dili espesipiko ang atong mga pag-ampo para sa mga igsoon? Ipatin-aw.

¹⁰ Sama sa ato nang nahisgotan, sagad moampo ta para sa daghang igsoon. Pananglitan, bisag wala tay gihunahuna nga espesipikong tawo, puwede natong hangyoon si Jehova nga tabangan kadtong mga napriso o hupayon kadtong mga namatyag minahal. Ang ansiyano nga si Donald miingon, “Daghang igsoon ang nag-atubang ug lainlaing problema, maong usahay moampo ta nga ‘pangkatibuk-an’ aron maapil nato ang tanan nga nag-antos.”

¹¹ Malipay ba si Jehova niana nga mga pag-ampo? Siyempre! Nakasabot si Jehova nga usahay dili ta makahatag ug espesipikong mga pag-ampo para sa mga igsoon kay wala ta mahibalo kon unsa gyoy ilang gikinahanglan. (Juan 17:20; Efe. 6:18) Pero bisag dili espesipiko kini nga mga pag-ampo, nagpakita ni nga atong ‘gihigugma ang tanang igsoon.’—1 Ped. 2:17.

DIHANG MOAMPO PARA SA ESPESIPIKONG MGA TAWO

12. Unsay kaayohan kon atong obserbahan ang kahimtang sa uban?

¹² Obserbahi ang kahimtang sa uban. Gawas nga moampo ta para sa daghang igsoon, angay pod tang moampo para sa espesipikong mga tawo ug nganlan sila. Pananglitan, naa bay igsoon sa inyong kongregasyon nga grabeng nasakit? Naa bay batan-on nga naguol kay gipresyur siya diha sa eskuwelahan? O kaha naa bay nag-inusarang ginikanan nga naglisod sa pagpadako sa iyang anak “sa disiplina ug tambag ni Jehova”? (Efe. 6:4) Kon obserbahan nato ang kahimtang sa uban, molalom ang atong gugma para nila, nga mas magpalihok nato nga iampo sila.b—Roma 12:15.

13. Sa unsang paagi makaampo ta para niadtong dili nato personal nga kaila?

¹³ Isulti ang ilang ngalan diha sa imong mga pag-ampo. Mahimo nato na bisag dili nato sila personal nga kaila. Pananglitan, puwede natong iampo ang mga igsoon nga napriso diha sa mga lugar sama sa Crimea, Eritrea, Russia, ug Singapore. Makita nato ang ilang mga ngalan diha sa jw.org.c Ang tigdumala sa sirkito nga si Brian miingon: “Nakita nako nga kon akong isulat ang ngalan sa napriso nga igsoon ug dayon akong litokon ang iyang ngalan, mas mahinumdoman nako siya ug ako siyang maapil sa akong mga pag-ampo.”

14-15. Unsay puwede natong himoon aron mahimong mas espesipiko ang atong mga pag-ampo?

¹⁴ Himoang espesipiko ang imong mga hangyo. Si Michael nga gihisgotan ganina miingon: “Dihang magbasa ko sa mga artikulo diha sa jw.org bahin sa napriso nga mga igsoon, imadyinon nako kon unsa kahay akong bation kon ako ang naa sa ilang situwasyon. Nahibalo ko nga mabalaka gyod ko sa akong asawa ug gusto nakong seguroon nga maatiman siya. Tungod ana, naa na koy ideya kon unsay espesipiko nakong iampo para sa minyo nga mga brader nga napriso.”—Heb. 13:​3, ug footnote.

¹⁵ Kon atong imadyinon kon unsa kahay kahimtang sa atong mga igsoon nga napriso, makahunahuna tag uban pang butang nga puwede natong iampo. Pananglitan, puwede natong iampo nga unta buotan ra ang mga guwardiya, ug nga tugotan ra sa mga naay awtoridad ang atong mga igsoon nga magtigom diha sa prisohan. (1 Tim. 2:​1, 2) Puwede pod natong iampo nga madasig unta ang mga igsoon didto sa pagkamatinumanon niining napriso nga mga brader ug nga makita unta sa mga dili Saksi ang maayong binuhatan niini nga mga brader ug maminaw sila sa atong mensahe. (1 Ped. 2:12) Puwede pod nato nang himoon dihang mag-ampo para sa mga igsoon nga nag-atubang ug uban pang mga problema. Kon obserbahan nato ang ilang kahimtang, isulti ang ilang ngalan diha sa atong mga pag-ampo, ug himoon natong espesipiko ang atong mga hangyo, atong mapakita nga ‘dagaya ang atong gugma sa usag usa.’—1 Tes. 3:12.

BALANSENG PANGLANTAW SA ATONG MGA PAG-AMPO

16. Unsay angay natong panglantaw sa atong mga pag-ampo? (Mateo 6:8)

¹⁶ Sa ato nang nahisgotan, ang atong mga pag-ampo puwedeng makapausab sa situwasyon. Pero kinahanglang balanse ang atong panglantaw niini. Dili nato angayng isipon nga wala pa mahibalo si Jehova sa usa ka situwasyon maong kinahanglan nato siyang sultihan, ug dili pod nato siya angayng tambagan kon unsay pinakamaayong buhaton sa usa ka situwasyon. Hinumdomi nga nahibalo na daan si Jehova kon unsay gikinahanglan sa iyang mga alagad. Mas una pa gani siyang mahibalo niana kay sa nila, o nato. (Basaha ang Mateo 6:8.) Busa nganong moampo man gihapon ta para sa uban? Gawas pa sa mga rason nga gihisgotan niini nga artikulo, atong iampo ang uban kay naghunahuna ta sa ilang kaayohan. Ang gugma mopalihok nato nga iampo ang usag usa. Ug malipay gyod si Jehova dihang makita niya nga atong gisundog ang iyang gugma.

17-18. Sa unsang paagi ang atong mga pag-ampo nagpakita nga gimahal nato ang mga igsoon? Iilustrar.

¹⁷ Bisag dili tingali mausab ang usa ka situwasyon, ang atong pag-ampo nagpakita nga gimahal nato ang mga igsoon, ug malipay si Jehova niana. Ato ning ikailustrar niining paagiha: Imadyina ang usa ka pamilya nga naay duha ka gagmayng bata—lalaki ug babaye. Ang batang lalaki nasakit. Ang batang babaye mihangyo sa iyang papa: “Pa, palihog tabangi si Kuya. Luoy kaayo siya.” Siyempre, naa nay gihimo ang amahan sa pag-atiman sa iyang anak. Wala gyod ni niya pasagdi kay iya ning gimahal. Pero seguradong nalipay ang amahan dihang nakita niya ang iyang anak nga babaye nga naghunahuna pag-ayo sa iyang igsoon ug nangayo pa ganig tabang para niya.

¹⁸ Mao nay gusto ni Jehova nga atong buhaton—nga hunahunaon nato ang kaayohan sa usag usa ug iampo ang usag usa. Kon ato nang himoon, atong gipakita nga dili lang ang atong kaugalingon ang atong gihunahuna ug nga gimahal gyod nato ang mga igsoon. Malipay gyod si Jehova niana. (2 Tes. 1:3; Heb. 6:10) Nahisgotan pod nato nga ang atong mga pag-ampo puwede pa ganing makausab sa situwasyon. Busa hinaot nga dili gyod nato kalimtan nga iampo ang usag usa!