Mga Tigulang—Panalangin Kaayo Mo sa Kongregasyon

Kon tigulang na ka, tingali parehas mog gibati ni Connie. Bisag daghang tuig na kang nag-alagad kang Jehova, maghunahuna tingali ka nga wala na kay pulos kay gamay na lang kag mahimo. Ikompara tingali nimo ang imong kaugalingon karon sa kon unsay kaya nimong himoon sa una. Kon mao, unsay makatabang aron dili ka maghunahunag negatibo bahin sa imong kaugalingon?

KON UNSAY GIDAHOM NI JEHOVA KANIMO

Pangutan-a ang imong kaugalingon, ‘Unsay gidahom ni Jehova nako?’ Makahupay gyod nimo ang giingon sa Deuteronomio 6:5: “Higugmaa si Jehova nga imong Diyos sa bug-os mong kasingkasing, sa bug-os mong kalag, ug sa bug-os mong kusog.”

Base ana nga teksto, gidahom ni Jehova nga moalagad ka niya sa bug-os nimong kasingkasing, kalag, ug kusog. Ang paghinumdom ana makatabang nimo nga dili ikompara ang imong kaugalingon sa uban, o ikompara ang imong kaugalingon sa kon unsay kaya nimong himoon sa una.

Hunahunaa ni: Niadtong batabata pa ka, unsay imong gihatag kang Jehova? Sama sa kadaghanang alagad ni Jehova, imong gihatag ang imong pinakamaayo. Mao to ang imong pinakamaayo base sa imong kahimtang sa una. Karon nga edaran na ka, unsa may imong ginahatag kang Jehova? Siyempre kon unsay imong pinakamaayo base sa imong presenteng kahimtang, kon unsay kaya nimong himoon karon. Kon kanay imong hunahunaon, makaingon gyod ka nga wala mausab ang imong ginahatag kang Jehova. Sukad sa una hangtod karon, imong ginahatag kaniya ang imong pinakamaayo.

DAKO GIHAPON KAG MATABANG SA UBAN

Naa pay laing puwede nimong hunahunaon: Imbes isipon nimo ang imong taas nga edad ingong babag, puwede nimo ning isipon ingong kahigayonan sa pagtabang sa uban. Ingong edaran nga Kristohanon, naa kay mahimo karon nga wala tingali kaayo nimo mahimo niadtong batabata pa ka. Pananglitan, puwede nimo ning himoon:

Isulti sa uban ang imong mga eksperyensiya. Konsideraha ang giingon niini nga mga alagad ni Jehova:

Haring David: “Sukad sa akong pagkabatan-on hangtod karon nga tigulang na ko, wala ko makakitag matarong nga gibiyaan, wala usab ko makakita nga ang iyang mga anak nagpakilimos ug tinapay.”—Sal. 37:25.

Josue: “Hapit na kong mamatay, ug nahibalo mo pag-ayo sa bug-os ninyong kasingkasing ug sa bug-os ninyong kalag nga walay usa ka pulong gikan sa tanang maayong saad nga gisaad kaninyo ni Jehova nga inyong Diyos ang napakyas. Kining tanan natuman para kaninyo. Walay usa ka pulong niini ang napakyas.”—Jos. 23:14.

Tingali parehas mog gibati niining duha ka matinumanong alagad ni Jehova. Ang giingon ni David ug Josue gibase sa ilang personal nga mga eksperyensiya. Ilang gisulti kon unsay ilang naobserbahan sa taastaas na nga panahon, maong makaingon gyod ta nga tinuod ang ilang gisulti.

Kon dugaydugay na kang nag-alagad kang Jehova, seguradong daghan na kag nindot nga mga eksperyensiya. Pananglitan, naa ba kay dili malimtan nga eksperyensiya diin nakita nimo kon giunsa pagpanalangin ni Jehova ang iyang mga alagad? Aw, isulti na sa uban. Seguradong makadasig na nila ug makadasig pod na nimo. Kon madungog sa uban ang imong mga kasinatian sa pag-alagad kang Jehova, matabangan nimo sila nga molig-on ang ilang pagtuo.—Roma 1:​11, 12.

Madasig pod nimo ang uban kon motambong ka sa mga tigom in person, kon kaya sa imong kahimtang. Makahatag nig kaayohan dili lang para sa mga igsoon, kondili para pod nimo. Si Connie, nga gihisgotan ganiha, miingon: “Ang pagtambong sa mga tigom diha sa Kingdom Hall nakatabang nako nga dili magsigeg kaguol. Nganong maguol man ko nga pinangga man kaayo ko sa mga igsoon? Matandog kaayo ko sa ilang gugma maong mag-andam kog gagmayng regalo. Ug naningkamot ko nga makaapil gihapon sa espirituwal nga mga kalihokan uban sa mga igsoon.”

GIPABILHAN NI JEHOVA ANG IMONG MATINUMANONG PAG-ALAGAD

Ang Bibliya daghag pananglitan sa mga tawo nga gamay na lag mahimo sa pag-alagad pero gimahal gihapon ni Jehova. Hunahunaa si Simeon, usa ka tigulang nga Israelinhon nga buhi sa panahon nga natawo si Jesus. Mag-adtoan siya pirme sa templo ug makita tingali niya ang mga batan-ong lalaki nga busy sa mga buluhaton didto. Unsa kahay gibati ni Simeon dihang magtan-aw siya nila? Basin nakahunahuna siya nga wala na siyay pulos para kang Jehova kay tigulang na siya. Pero dili ingon ana ang hunahuna ni Jehova. Giisip niya si Simeon ingong “matarong ug diyosnon,” ug gipanalanginan siya nga makakita sa batang si Jesus. Gigamit pa gani ni Jehova si Simeon sa pagtagna bahin niining bataa nga maoy mahimong umaabot nga Mesiyas. (Luc. 2:​25-35) Klaro nga wala magpokus si Jehova sa kon unsay dili na kayang himoon ni Simeon tungod sa iyang katigulangon. Hinuon nagpokus si Jehova sa iyang lig-ong pagtuo, ug “ang balaang espiritu [anaa] kaniya.”

Makasalig ka nga ingon ana pod ang panglantaw ni Jehova kanimo. Iyang gipabilhan ang imong matinumanong pag-alagad bisag gamay na lang tingali ang imong mahimo. Para kang Jehova, ang mga sakripisyo mahimong “mas dalawaton [kon gihatag ni] sumala sa kon unsay nabatonan sa usa, dili sa kon unsay wala niya.”—2 Cor. 8:12.

Busa pagpokus sa kon unsay kaya nimong himoon. Pananglitan, basin puwede kang moapil sa ubang klase sa ministeryo nga kaya pa nimo, bisag kadiyot lang. O kaha basin puwede nimong tawgan o himoag card ang mga igsoon aron palig-onon sila. Ang simpleng mga pagdasig dako na kaayog epekto sa mga igsoon, ilabina kon gikan ni niadtong dugay nang nag-alagad kang Jehova.

Bisag lisod na ang imong kahimtang tungod sa katigulangon, naa gihapon kay mahimo sa pagtabang sa uban diha sa ministeryo. Matikdi ang eksperyensiya didto sa East Africa nga gihisgotan sa kahong “Ang Bibliya Nakaluwas sa Iyang Kinabuhi.”

Hinumdomi nga ang imong pagkamatinumanon ug pagkamaunongon makadasig kaayo sa uban. Maayo kaayo ka nga panig-ingnan sa paglahutay, ug makasalig ka nga “ang Diyos matarong, ug dili niya kalimtan ang [imong] buhat ug ang gugma nga [imong] gipakita para sa iyang ngalan pinaagi sa pag-alagad ug sa padayon [nimong] pag-alagad sa mga balaan.”—Heb. 6:10.

PADAYONG HIMOA ANG IMONG MAARANGAN

Gipakita sa mga research nga ang mga tigulang nga nagatabang sa uban mas himsog, abtik pag panghunahuna, ug taas ug kinabuhi.

Pero siyempre kay makasasala man ta, matigulang gyod ta ug mamatay. Maong bisag mohimo pa tag maayo para sa uban, dili gyod nato mapugngan ang epekto sa pagkatigulang. Ang Gingharian sa Diyos lang ang makawala niana.—Roma 5:12.

Bisan pa ana, ang imong pag-alagad kang Jehova—apil na ang imong pagtabang sa uban nga makaila niya—makapalig-on sa imong pagtuo ug paglaom kang Jehova ug makahatag pa ganig kaayohan sa imong panglawas. Maong minahal nga mga tigulang, palihog hinumdomi nga gipabilhan pag-ayo ni Jehova ang inyong mga paningkamot, ug giapresyar sa kongregasyon ang inyong maayong ehemplo sa pagkamatinumanon.