Mora Gyod Siyag si Sara

SI Mama mapinanggaon, mahigalaon, ug dakog pagtahod sa Bibliya. Dihang nakaila niya si Gertrud Ott, misyonarya sa Manado, North Sulawesi, nagpa-Bible study dayon siya, ug na-Saksi. Pero supak kaayo akong Papa nga si Erwin, usa ka iladong empleyado sa bangko ug sa ulahi nahimong tsirman sa Jakarta Stock Exchange.

Usa ka adlaw, gihatagan ni Papa si Mama ug ultimatum.

“Imong relihiyon o imong bana—pagpili!” siya misingka.

Si Mama namalandong, dayon malumo nga mitubag, “Duha akong pilion—akong bana ug si Jehova.”

Wala katingog si Papa, ug nawala iyang kasuko.

Kadugayan, dili na kaayo estrikto si Papa. Pinangga man god kaayo niya si Mama ug gipabilhan sab niya ang kaalam ug maayong opinyon ni Mama.

Pero gusto ni Mama nga makauban si Papa sa matuod nga pagsimba. Sinsero niya kining giampo, ug nahinumdom siya nga ganahan si Papa mokat-on ug mga pinulongan. Busa nagbutang siyag Iningles nga mga teksto diha sa balay. “Gusto nakong mapraktis akong Iningles,” giingnan niya si Papa. Kay interesado man sab si Papa ug mga diskurso sa publiko, magpatabang si Mama sa iyang mga bahin sa Teokratikanhong Tunghaan sa Ministeryo. Mosugot ra pod si Papa. Kay maabiabihon si Papa, hangyoon siya ni Mama kon puwede bang moestar sa balay ang tigdumala sa sirkito. Mosugot sab si Papa. Kay pinangga ni Papa among pamilya, hangyoon siya ni Mama sa matinahorong paagi nga ubanan mi sa mga kombensiyon. Mokuyog pod si Papa.

Ang pailob ug maalamong mga paagi ni Mama anam-anam nga nakalukmay sa kasingkasing ni Papa. Sa ulahi, dihang namalhin mi sa England, tigtambongan na siyag tigom ug naamigo niya si John Barr, kinsa nahimong membro sa Nagamandong Lawas sa mga Saksi ni Jehova. Nianang tuiga, nagpabawtismo si Papa ug sangko sa langit ang kalipay ni Mama. Human niadto, misamot pa ang iyang gugma kang Mama.

Para sa uban namong higala, parehas daw si Mama kang Lydia, usa ka maabiabihon kaayong Kristohanon sa unang siglo. (Buh. 16:14, 15) Pero matandi nako siya kang Sara, nga malipayong nagpasakop sa iyang bana nga si Abraham. (1 Ped. 3:4-6) Si Mama putli, matinahoron, ug hamtong kaayo sa espirituwal, nga nakapadasig sa tanang nakaila niya. Ang iyang panig-ingnan maoy nakatabang kang Papa nga dawaton ang kamatuoran. Para nako, mora gyod siyag si Sara.