Pagpadali sa Pagpanukod ug Kingdom Hall

MAKAPALIPAY nga makitang paspas nga gipakaylap ni Jehova ang matuod nga pagsimba! (Isa. 60:22) Tungod niana, gikinahanglan ang dugang Kingdom Hall. Sa tibuok kalibotan, kapig 13,000 ka bag-ong Kingdom Hall ang kinahanglang tukoron o ayohon.

Aron mapadali ug mas gamay ang gasto sa pagpanukod, ang Nagamandong Lawas naghimog kausaban sa atong mga departamento sa pagpanukod. Nagkugi pag-ayo ang bag-ong napormang Worldwide Design/Construction Department (WDC), nga naa sa hedkuwarter sa Brooklyn, New York, aron sayron kon unsay unahon ug kon unsaon nga mapadali ang tibuok kalibotang mga proyekto sa pagpanukod ug pagpang-ayo. Ang mga Regional Design/Construction Department (RDC) nga naa sa mga sangang buhatan sa Australasia, Central Europe, South Africa, ug United States maoy nagdumala sa pagpanukod sa sakop nilang mga rehiyon, nga nangitag paagi aron dali ug dili kaayo dakog gasto ang pagpanukod. Ang RDC sab ang nagbansay sa mga sangang buhatan sa pagmentinar sa mga pasilidad nga ilang sakop. Ug sa matag sangang buhatan, Local Design/Construction Department (LDC) ang nagdumala sa pagpanukod ug pagmentinar sa mga Kingdom Hall ug Assembly Hall.

Niadtong Enero 2015, gimiting pinaagig hook-up ang tanang ansiyano sa United States aron tudloan sa bag-ong kahikayan sa pagplano, pagtukod, ug pagmentinar sa mga Kingdom Hall. Kini ang ilang nakat-onan.

• Pagpanukod: Parehoon ang disenyo ug materyales unya ipahaom sa lokal nga kahimtang ug ibase sa instruksiyon sa Publishing Committee sa Nagamandong Lawas. Ang pasilidad lig-on ug daling imentinar, pero nindot ug dili dakog gasto.

• Pagmentinar: Ang mga boluntaryo sa matag kongregasyon bansayon sa pagmentinar aron dugayng mapahimuslan ang atong mga dapit sa pagsimba.

Oo, dako kaayong buluhaton ang pagpanukod ug pagmentinar. Pero, ang pagtinabangay sa katawhan sa Diyos makapadali sa buluhaton ug dili mausik ang donasyon.