Naapresyar Nila ang Iyang mga Sulat

Si Brooke maoy usa sa mga Saksi ni Jehova nga nagpuyo sa United States. Panahon sa COVID-19 nga pandemic, nagsangyaw siya pinaagig sulat. Gani, kada semana daghang sulat ang iyang mapadala. Pero paglabayg usa ka tuig ug tunga, na-discourage siya. Usa ray ni-reply sa iyang mga sulat, ug giingnan pa gyod siya nga dili na mosulat ug balik. Naghunahuna si Brooke nga morag walay pulos ang iyang mga paningkamot.

Pero sa ulahi si Kim, nga usa ka Saksi nga nagtrabaho sa bangko, miingon kang Brooke nga naa siyay nakaestorya nga customer. Giingnan si Kim sa customer nga nakadawat siyag handwritten nga sulat gikan sa usa ka Saksi ni Jehova. Nahibaloan ni Kim nga kang Brooke diay to nga sulat! Pagkasunod semana, mibalik sa bangko ang customer. Samtang nakig-estorya siya kang Kim, nangutana siya kon puwede ba siyang motambong sa mga tigom, nga adtong panahona gihimo pinaagig videoconferencing.

Wala madugay si David, nga Saksi pod, miingon kang Brooke nga naa siyay katrabaho nga nakadawat sa usa sa iyang mga sulat. Bilib kaayo ang iyang katrabaho kay handwritten ang sulat ni Brooke. Miingon siya: “Unta mas daghan pang tawo ang magpakitag ingon ani nga interes sa uban.” Gigamit ni David ang kahigayonan nga sangyawan pag dugang ang iyang katrabaho ug miingon si David nga dal-an niya kinig literatura, ug misugot ang iyang katrabaho.

Nahibalo ang mga Saksi ni Jehova nga dili sa tanang panahon nga mahibalo sila kon kanus-a motubo ang binhi nga ilang gitanom pinaagi sa pagsangyaw. (Ecclesiastes 11:5, 6) Pero tungod sa mga naeksperyensiyahan ni Brooke, mas naapresyar niya ang iyang mga paningkamot diha sa ministeryo.—1 Corinto 3:6.