MGA BATAN-ON NANGUTANA
Unsay Akong Himoon Kon Di na Ko Ganahang Moeskuwela?
Estrikto nga mga titser. Presyur sa mga classmate. Maka-stress nga mga exam, ug nagtipun-og nga asaynment. Kon di ka ganahang moeskuwela, naay mga rason kon nganong mibati ka ana.a Ang tin-edyer nga si Rachelb miingon:
“Mas gusto kong moadto bisag asa basta dili lang sa eskuwelahan. Mas gusto kong maligog dagat o makig-uban sa akong mga higala o bisag motabang sa akong ginikanan nga magluto o manghinlo!”
Kon parehas mo ni Rachel, gibati tingali nimo nga mora kag napriso ug kinahanglan nimo ning antoson hangtod nga makagawas ka dihang mo-graduate na ka. Naa bay makatabang aron mausab ang imong panghunahuna bahin sa pag-eskuwela?
Nahibalo ka ba? Kon positibo ka bahin sa pag-eskuwela, makontrol nimo ang situwasyon ug dili na nimo hunahunaon nga antosonon ang imong pag-eskuwela. Sa ato pa, isipon na nimo ang pag-eskuwela nga makatabang aron maugmad nimo ang mga skill nga gikinahanglan inigkadako nimo.
Aron mahimong positibo ka sa pag-eskuwela, pagpokus sa mosunod:
Imong edukasyon. Kon mas daghan kag makat-onan, mas dali unya nimong masulbad ang mga problema sa trabaho ug sa ubang bahin sa kinabuhi imbes magsigeg salig sa uban. Pangutan-a ang kaugalingon, ‘Bisag dili kaayo ko ganahang moeskuwela, unsang mga kaayohan ang akong nakuha gikan niini?’
Prinsipyo sa Bibliya: “Ampingi ang praktikal nga kaalam ug ang katakos sa panghunahuna.”—Proverbio 3:21.
Para sa dugang impormasyon, tan-awa ang artikulo nga “Unsay Akong Himoon Kon Pirmeng Ubos ang Akong Grado?”
Imong mga hiyas. Ang rutina sa eskuwelahan makatudlo nimo kon unsaon paggamit ang imong panahon, mahimong disiplinado, ug mahimong kugihang trabahante—mga hiyas nga imong gikinahanglan inigkadako nimo. Pangutan-a ang kaugalingon: ‘Sa unsang mga paagi makatabang nako ang rutina sa eskuwelahan aron mahimong disiplinado ug maayong trabahante? Unsay akong himoon aron mouswag ko aning mga bahina?’
Prinsipyo sa Bibliya: “Ang tanang paghago naay kaayohan.”—Proverbio 14:23.
Para sa dugang impormasyon, tan-awa ang artikulo nga “Unsaon Nako Paggamit Akong Oras?”
Imong relasyon sa uban. Ang pagpakig-estorya sa imong mga classmate makatabang nga maugmad nimo ang empatiya ug respeto sa uban. “Ang pagkat-on kon unsaon pagpakig-estorya sa mga tawo parehas ra ka importante sa pagkat-on ug history ug science,” miingon ang batan-ong si Joshua. “Skill ni nga magamit nimo sa tibuok kinabuhi.” Pangutan-a ang kaugalingon, ‘Unsang mga leksiyon ang akong nakat-onan sa eskuwelahan bahin sa pagbaton ug maayong relasyon sa uban—bisan niadtong lahi nakog background o tinuohan?’
Prinsipyo sa Bibliya: “Tinguhaa ang pagpakigdait sa tanang tawo.”—Hebreohanon 12:14.
Para sa dugang impormasyon, tan-awa ang artikulo nga “Unsay Akong Himoon Aron Mahimo Kong Maayo sa Pagpakig-estorya?”
Imong kaugmaon. Ang pag-eskuwela makatabang nga madiskobrehan nimo ang imong mga abilidad ug maghimog tumong base niana. Ang batan-ong babaye nga si Brooke miingon: “Puwede kang makakuhag espesipikong pagbansay, parehas sa akong gihimo, aron nga inig-graduate nimo, puwede na kang manarbaho.” Pangutan-a ang kaugalingon: ‘Unsaon nako pagsuportar akong kaugalingon human nakog graduate? Unsaon nako pagseguro nga ang akong gieskuwelahan mao gyoy akong magamit sa trabaho?’
Prinsipyo sa Bibliya: “Balansiha pag-ayo ang tanan mong pagahimuon.”—Panultihon (Proverbio) 4:26, Ang Pulong sa Dios.
a Daghan sa mga prinsipyo nga gihisgotan niining artikuloha makatabang sab sa mga batan-on nga nag-homeschool.
b Ang ubang ngalan giilisan.