Sa Unsang Paagi Ko Molampos sa Pag-eskuwela sa Balay?

Daghang estudyante karon ang nag-eskuwela sa lahi nga “classroom”​—ang ilang balay. Kon mao nay imong kahimtang, unsay imong himoon aron molampos ka? Niay pipila ka tip.a

• Lima ka tip aron molampos ka

• Ang giingon sa ubang batan-on

Lima ka tip aron molampos ka

• Planoha ang imong rutina. Paghimog regular nga eskedyul, nga samag naa ka sa eskuwelahan. Paggahin ug espesipikong oras para sa homwork, buluhaton sa balay, ug ubang importanteng butang. Puwede nimong i-adjust ang imong eskedyul kon gikinahanglan.

  Prinsipyo sa Bibliya: “Himoa ang tanang butang . . . pinaagig kahikayan [o, sa hapsay nga paagi].”​—1 Corinto 14:40.

  “Ieskedyul ang imong adlaw nga morag naa ka sa eskuwelahan. Kinahanglang mahuman ka sa matag subject sa espesipikong oras.”​—Katie.

  Hunahunaa kini: Nganong maayong isulat ang imong eskedyul ug ibutang kini sa lugar nga dali rang makita?

• Disiplinaha ang kaugalingon. Aron mohamtong, himoa kon unsay kinahanglan nimong buhaton​—bisan pag dili ka ganahan nga himoon kini. Ayaw paglangaylangay!

  Prinsipyo sa Bibliya: “Magmakugihon, ayaw paglangaylangay sa inyong buluhaton.”​—Roma 12:11, footnote.

  “Lisod gyod ang pagdisiplina sa kaugalingon. Sayon ra kaayong moingon, ‘Unya na ko maghimo sa akong asaynment.’ Pero dili gihapon nimo nâ mahimo kay nagtipun-og na ang imong homwork.”​—Alexandra.

  Hunahunaa kini: Sa unsang paagi ang pagtuon sa parehong lugar ug oras makatabang nimo nga mahimong mas disiplinado?

• Pangitag lugar para sa pagtuon. Andama ang tanang gamit nga imong gikinahanglan. Kinahanglang komportable ang maong lugar, pero ayaw pasobrahi nga ganahan na hinuon kang motagpilaw. Naa ka diha para magtuon, dili aron matulog! Kon walay lugar nga para lang gyod sa pagtuon, basig bakante ang kosina o kuwarto sa maadlaw ug didto ka magtuon panahon sa klase.

  Prinsipyo sa Bibliya: “Ang mga plano sa kugihan moresulta gyod ug kalamposan.”​—Proverbio 21:5.

  “Ipalayo ang bola sa basketball ug mga video game, i-silent ang imong cellphone, ug hiposa ang gitara. Kinahanglang walay makabalda sa imong pagtuon.”​—Elizabeth.

  Hunahunaa kini: Unsay angay nimong usbon sa imong lugar sa pagtuon aron mas makapokus ka sa pagtuon?

• Pagpokus. Pagpokus lang sa usa ka subject, ug ayaw pag-multitask. Kon imong dunganon ang imong mga himoonon, dakog purohan nga magkasayopsayop ka ug malangan na hinuon ka.

  Prinsipyo sa Bibliya: ‘Gamita ang imong panahon sa kinamaayohang paagi.’​—Efeso 5:16.

  “Dili ko makapokus kon naa sa duol ang akong cellphone. Daghang panahon ang akong nausik sa walay pulos nga mga butang.”​—Olivia.

  Hunahunaa kini: Puwede ba nimong dugangan ang imong oras sa pagpokus sa usa ka asaynment?

• Pagrelaks panagsa. Puwede kang maglakawlakaw, magbisikleta, o mag-ehersisyo. Makaparelaks pod kon naa kay kalingawan. “Pero tiwasa una ang imong himoonon,” nag-ingon ang librong School Power. “Mas mobati kang relaks kon wala na kay tiwasonong trabaho.”

  Prinsipyo sa Bibliya: “Mas maayo pa ang usa ka hakop nga pahulay kay sa duha ka hakop nga kahago ug paggukod sa hangin.”​—Ecclesiastes 4:6.

  “Sa eskuwelahan, sagad tudloan ka sa pagtugtog ug musical instrument o makaapil sa mga art class. Gimingaw gyod ko adto. Makaayo pod kon naa kay mapuslanong kalingawan gawas sa imong pagtuon.”​—Taylor.

  Hunahunaa kini: Unsay puwede nimong himoon aron mas relaks ka sa paghimog homwork?