“Dili na Ko Bayolente”

AKONG KAAGI

Natawo ko sa Uganda sa distrito sa Gomba. Pobre kaayo ang kadaghanang tawo didto. Walay koryente sa among lungsod maong sa magabii, lampara ang among gamiton.

Ang akong mga ginikanan mibalhin sa Uganda gikan sa Rwanda. Mag-uuma sila. Nananom silag kape ug saging, ug gikan sa saging naggama sila ug iladong makahubog nga ilimnon nga gitawag ug waragi. Ang akong mga ginikanan namuhi sab ug mga manok, kanding, baboy, ug baka. Tungod sa akong kultura ug sa paagi sa pagpadako nako, nagtuo ko nga ang asawa kinahanglang masinundanon sa iyang bana sa tanang higayon ug dili angayng magpahayag sa iyang opinyon.

Dihang 23 anyos ko, mibalhin ko sa Rwanda diin moadto kog mga diskohan uban sa akong mga kaedad. Pirme kong moadto sa usa ka diskohan maong gitagaan ko nilag kard aron libre na kong makasulod. Ganahan sab kog mga salida nga bayolente kaayo. Ang akong palibot ug kalingawan maoy nag-impluwensiya nako nga mahimong bayolente, imoral, ug palahubog.

Pagka-2000, naa koy gipuyopuyo nga batan-ong babaye nga ginganlag Skolastique Kabagwira, ug nakabaton mig tulo ka anak. Sama sa akong nakat-onan dihang bata pa ko, gidahom nako nga moluhod siya sa akong atubangan dihang motimbaya siya nako o dihang naa siyay ihangyo. Nagtuo sab ko nga akoy tag-iya sa tanan namong gamit, ug nga akoy magbuot kon unsay buhaton ani. Pirme ko molaag inigkagabii ug mouli kog mga alas tres na sa buntag, nga sagad hubog. Manuktok ko sa pultahan, ug kon dugay ganing makaabli si Skolastique, ako siyang kulatahon.

Nianang panahona, nagtrabaho ko ingong superbisor sa usa ka pribado nga security company, ug dako kog suweldo. Si Skolastique naningkamot nga mahimo kong membro sa iyang relihiyon nga Pentecostal, kay tingali nagtuo siya nga mabag-o ko ani. Pero dili ko interesado. Hinuon, naa koy nakarelasyon nga laing babaye. Tungod sa akong pagkabayolente ug pagkaimoral, gidala ni Skolastique ang among tulo ka anak ug mibalhin siyag puyo uban sa iyang mga ginikanan.

Naa mi edarang higala nga nakig-estorya nako bahin sa akong paagi sa pagkinabuhi. Gidasig ko niya nga makig-uli kang Skolastique. Siya miingon nga ang akong buotang mga anak dili angayng mabulag sa ilang amahan. Busa niadtong 2005, mihunong ko sa paghuboghubog, gibiyaan ang akong karelasyon, ug nakig-uli kang Skolastique. Nagpakasal mi niadtong 2006. Pero bayolente gihapon ko ug abusado sa akong asawa.

GIBAG-O SA BIBLIYA ANG AKONG KINABUHI

Pagka-2008, si Joël, nga usa ka Saksi ni Jehova, miduaw sa among balay ug naminaw ko sa iyang mensahe. Siya ug ang laing Saksi, nga si Bonaventure, regular nga nagduaw nako sulod sa pipila ka bulan, ug grabe ang among mga panaghisgot bahin sa Bibliya. Daghan kog pangutana, ilabina bahin sa basahon sa Pinadayag. Sa tinuod lang, naningkamot kong pamatud-an nga sayop ang mga Saksi. Pananglitan, nangutana ko kon nganong miingon sila nga ang “dakong panon” nga gihisgotan sa Pinadayag 7:9 mabuhi sa yuta, nga ang teksto nag-ingon man nga sila “nagbarog atubangan sa trono [sa Diyos] ug atubangan sa Kordero,” si Jesu-Kristo. Mapailobong gitubag ni Joël ang akong mga pangutana. Pananglitan, iyang gipakita nako ang Isaias 66:1, diin ang Diyos miingon nga ang yuta mao ang “tumbanan” sa iyang tiil. Busa ang dakong panon nagbarog sa yuta atubangan sa trono sa Diyos. Ug nabasa nako ang Salmo 37:29, nga nag-ingon nga ang mga matarong magpuyo sa yuta hangtod sa hangtod.

Sa ngadtongadto, misugot ko nga dumalahan ug Bible study. Busa kami ni Skolastique giestadihan ni Bonaventure. Samtang nagtuon mi sa Bibliya, nadasig ko nga magbag-o. Nakakat-on ko sa pagtratar sa akong asawa uban ang respeto. Dili na nako gustong moluhod siya sa akong atubangan dihang motimbaya siya nako o dihang duna siyay ihangyo, ug wala na ko moingon nga akoy tag-iya sa tanang butang nga gipanag-iya sa among pamilya. Miundang pod kog tan-aw ug bayolenteng mga salida. Kini nga mga kausaban lisod himoon ug nagkinahanglag dakong pagpugong sa kaugalingon ug pagkamapaubsanon.

Pipila ka tuig una pa niana, akong gidala sa Uganda ang akong kamagulangang anak nga si Christian aron magpuyo uban sa akong mga paryente didto. Pero dihang nabasa nako ang Deuteronomio 6:4-7, nakaamgo ko nga kami sa akong asawa ang naay tulubagon atubangan sa Diyos sa pag-atiman sa among mga anak, nga naglakip sa pagtudlo kanila sa mga prinsipyo sa Diyos. Lipay kaayo mi ug ang among anak dihang gidala namo siyag balik sa among balay!

MGA KAAYOHAN NGA AKONG NABATONAN

Akong nakat-onan nga si Jehova maluluy-on nga Diyos, ug may pagtuo ko nga iya na kong gipasaylo sa akong kinaiya ug binuhatan kaniadto. Nalipay ko nga si Skolastique nagtuon ug Bibliya uban nako. Among gipahinungod ang among kinabuhi kang Jehova ug dungan ming nabawtismohan niadtong Disyembre 4, 2010. Karon may pagsalig na mi sa usag usa, ug nalipay mi sa pagpadapat sa mga prinsipyo sa Bibliya diha sa among pamilya. Nalipay kaayo ang akong asawa kay deretso na kong mopauli sa balay gikan sa trabaho. Nalipay pod siya nga ako siyang gitratar nga may respeto ug dignidad, nga midesisyon ko nga dili na gyod moinom ug alkoholikong ilimnon, ug nga dili na ko bayolente. Niadtong 2015, gitudlo ko ingong ansiyano aron motabang sa pag-atiman sa among kongregasyon. Sa among lima ka anak, tulo na ang bawtismado.

Dihang nagsugod ko sa pagtuon sa Bibliya uban sa mga Saksi ni Jehova, wala nako basta gidawat ang ilang gitudlo nako. Pero nakadayeg ko kay ilang gigamit ang Bibliya sa pagtubag sa akong mga pangutana. Nasabtan namo ni Skolastique nga kadtong nag-ingon nga nag-alagad sa matuod nga Diyos kinahanglang magkinabuhi uyon sa iyang mga sukdanan, ug dili pilion ang gusto lang nilang sundon. Mapasalamaton gyod ko nga gikabig ko ni Jehova ug nga bahin na ko karon sa iyang espirituwal nga pamilya. Dihang maghunahuna ko bahin sa akong kinabuhi, kombinsido ko nga sa tabang sa Diyos, si bisan kinsa nga sinserong tawo makahimog mga kausaban nga gikinahanglan aron mapalipay siya.