Ang World Cup Makapahiusa ba Gyod sa mga Tawo?—Unsay Giingon sa Bibliya?

Gibanabana nga lima ka bilyong tawo ang motan-aw sa FIFA World Cup nga gipahigayon gikan sa Nobyembre 20 hangtod Disyembre 18, 2022. Daghan ang nagdahom nga ang ingon niini nga mga sporting event dili lang magpabati sa mga tawong nagtan-aw nga nagkahiusa sila.

• “Ang sport naay gahom sa pagbag-o sa kalibotan. Makahatag nig inspirasyon sa mga tawo. Naa ni gahom sa paghiusa sa mga tawo sa talagsaong paagi.”—Nelson Mandela, kanhing presidente sa South Africa.

• Ang football makapahiusa sa mga tawo kay mohatag ni nilag “paglaom, kalipay, ug kadasig, ug mopabati ni nila nga gihigugma nila ang uban ug nga naay butang nga pareho nilang gusto.”—Gianni Infantino, presidente sa FIFA.a

Ang World Cup ba o bisan unsang sporting event makapahinabo niini nga mga tumong? Naa bay paglaom nga mahitabo ang kalinaw ug panaghiusa?

Makapahiusa ba gyod?

Ang World Cup niining tuiga dili lang bahin sa football. Ang mga dula nakapatunghag debate bahin sa mga isyu sa komunidad ug politika, ug apil niini ang katungod sa mga tawo, diskriminasyon sa rasa, ug dili patas nga ekonomiya.

Bisan pa niana, daghan ang malingaw sa pagtan-aw ug mga international sporting event sama sa World Cup. Pero bisag unsa pay himoon sa mga tawo, kini nga mga event dili makahatag ug permanenteng panaghiusa. Hinuon, gipakita niini ang makapabahinbahin nga kinaiya ug binuhatan sa mga tawo, ug mao ni ang giingon sa Bibliya nga ilhanan sa yugto sa panahon nga gitawag ug “kataposang mga adlaw.”—2 Timoteo 3:1-5.

Tinuod nga paglaom para sa tibuok kalibotang panaghiusa

Ang Bibliya naghatag ug tinuod nga paglaom para sa tibuok kalibotang panaghiusa. Kini nagsaad nga ang tanang tawo sa yuta magkahiusa ubos sa langitnong gobyerno nga gitawag ug “Gingharian sa Diyos.”—Lucas 4:43; Mateo 6:10.

Ang Hari sa maong Gingharian, si Jesu-Kristo, magseguro nga naay kalinaw, o pakigdait, sa tibuok kalibotan. Ang Bibliya nag-ingon:

• “Molambo ang matarong, ug ang pakigdait modagaya.”—Salmo 72:7.

• “Luwason niya ang kabos nga nagtuaw alang sa tabang … Luwason niya sila gikan sa pagdaogdaog ug kapintasan.”—Salmo 72:12, 14.

Bisan karon, ang mga pagtulon-an ni Jesus nakapahiusa na sa minilyong tawo sa 239 ka kayutaan. Nakakat-on sila nga dili na magdumot sa uban. Aron mahibalog dugang, basaha ang serye sa mga artikulo nga nag-ulohang “Kon Unsaon Pagwala sa Pagdumot.”