Nganong Makapabahinbahin Pag-ayo sa mga Tawo ang Politika?—Unsay Giingon sa Bibliya?

Daghang nasod sa tibuok kalibotan ang nagkabahinbahin tungod sa politika. Sumala sa usa ka surbi sa 2022 Pew Research Center, “65% sa mga hamtong diha sa 19 ka nasod ang miingon nga naay grabe o grabe kaayong dili pagsinabtanay tali sa mga tawo nga lainlaig gisuportaran nga partido sa politika sa ilang nasod.”

Namatikdan ba nimo nga nagkagrabe ang pagkabahinbahin diha sa inyong lugar tungod sa politika? Unsa kahay hinungdan niana? Duna bay solusyon niini? Sayra kon unsay giingon sa Bibliya.

Mga kinaiya nga makapabahinbahin

Ang Bibliya nagtagna nga sa atong panahon, nga gitawag ug “kataposang mga adlaw,” daghang tawo ang naay mga kinaiya nga makapalisod nila nga magkahiusa.

• “Sa kataposang mga adlaw moabot ang kuyaw nga mga panahong lisod sagubangon. Kay ang mga tawo unya mahigugmaon sa kaugalingon, . . . dili ikasabot.”—2 Timoteo 3:1-3.

Bisan pa sa mga paningkamot sa daghang tawo, wala molampos ang mga gobyerno. Lisod o imposible pa gani para sa mga tawo nga lainlaig panglantaw ang pagtinabangay sa pagsulbad sa mga problema. Ang mga resulta niini nagpamatuod sa dugay nang giingon sa Bibliya.

• “Ang tawo nagmando sa tawo alang sa iyang ikadaot.”—Ecclesiastes 8:9.

Pero gihisgotan sa Bibliya ang solusyon—usa ka gobyerno nga gimandoan sa usa nga makawagtang sa mga problema nga nagpaantos sa mga tawo karon.

Usa ka kuwalipikadong lider nga nagmahal nato

Gipaila sa Bibliya ang usa ka talagsaon ug kuwalipikadong lider: si Jesu-Kristo. Si Jesus dunay gahom, awtoridad, ug tinguha sa pagpatunghag panaghiusa, kalinaw, ug pakigdait sa tanang tawo.

• “Sa iyang mga adlaw molambo ang matarong, ug ang pakigdait modagaya.”—Salmo 72:7.

• “Ang tanang nasod moalagad kaniya.”—Salmo 72:11.

Si Jesus ang kinamaayohang lider kay gimahal niya ang mga tawo ug gusto niyang tabangan sila, ilabina kadtong nakaeksperyensiyag inhustisya.

• “Luwason niya ang kabos nga nagtuaw alang sa tabang, ingon man ang timawa ug si bisan kinsa nga walay magtatabang. Maluoy siya sa timawa ug sa kabos, ug luwason niya ang kinabuhi sa mga kabos. Luwason niya sila gikan sa pagdaogdaog ug kapintasan.”—Salmo 72:12-14.

Pagkat-og dugang bahin sa Gingharian sa Diyos, ang gobyerno sa langit nga gimandoan ni Jesus. Sayra kon sa unsang paagi ka makabenepisyo ug makasuportar sa pagmando niini.

• Tan-awa ang video nga Unsa ang Gingharian sa Diyos?

• Basaha ang artikulong “Gingharian sa Diyos—Gobyerno nga Walay Korapsiyon.”