Mga Gobyerno sa Kalibotan Migastog Kapig $2 Trillion Para sa Militar—Unsay Giingon sa Bibliya?

Niadtong 2022, ang mga gobyerno sa kalibotan migastog 2.24 trillion dollars (U.S.), nga maoy kinadak-ang gasto nila sukad, para sa ilang militar. Ang nakaamot ug dako niini nga gasto mao ang pag-atake sa Russia sa Ukraine. Sumala sa report nga gi-release niadtong Abril 2023 sa Stockholm International Peace Research Institute (SIPRI), niadtong 2022:

• Ang paggasto sa Europe para sa militar “misakag 13 porsiyento niadtong tuiga, nga mao ang kinadak-ang pagsaka sa nagasto sulod sa usa ka tuig sa mga gobyerno sa Europe sukad niadtong 1991.”

• “Ang gigasto sa Russia misakag mga 9.2 porsiyento nga tungod niana, gikan sa ikalima nahimo kining ikatulo nga kinadak-ag nagasto sa tibuok kalibotan.”

• Ang United States gihapon ang kinadak-ag naggasto para sa militar, “kay migasto silag 39 porsiyento sa katibuk-ang nagasto sa tibuok kalibotan para sa militar.”

“Sa milabayng mga tuig, padayong nagkadako ang gigasto sa mga gobyerno para sa ilang militar. Nagpakita ni nga nagkinabuhi ta sa kalibotan diin nagkagrabe ang kawalay-kasegurohan,” miingon si Dr. Nan Tian, coauthor sa SIPRI report.

Gitagna sa Bibliya nga magkagrabe ang dili pagsinabtanay ug mga problema tali sa gamhanan kaayong mga gobyerno sa kalibotan karon. Gihisgotan sab niini ang bugtong paglaom aron mabatonan ang kalinaw.

Gitagna nga magkagrabe ang panag-away tali sa mga nasod

• Ang Bibliya nag-ingon nga nagkinabuhi ta sa “panahon sa kataposan.”—Daniel 8:19.

• Ang basahon sa Daniel nagtagna nga nianang panahona, ang gamhanang mga nasod magkompetensiyahay. Kining gamhanang mga nasod ‘magtinuloray,’ o mag-awayay kon kinsay modominar sa kalibotan. Sa maong panag-awayay, mogasto silag daghan kaayong “bahandi,” o kuwarta.—Daniel 11:40, 42, 43.

Aron makakat-og dugang bahin niining makapainteres nga tagna sa Bibliya, tan-awa ang video nga Natuman nga Tagna—Daniel Kapitulo 11.

Kon sa unsang paagi maangkon ang tinuod nga kalinaw

• Ang Bibliya nag-ingon nga pulihan sa Diyos ang mga gobyerno sa tawo. Siya “magtukod ug gingharian nga dili gayod malaglag. Ug kini nga gingharian dili ipasa ngadto sa laing katawhan. Dugmokon ug taposon niini kining tanang gingharian, ug kini ray mobarog hangtod sa hangtod.”—Daniel 2:44.

• Sa dili madugay, himoon ni Jehovaa nga Diyos ang dili mahimo sa mga tawo—ang pagpatunghag tinuod ug walay kataposang kalinaw o pakigdait. Sa unsang paagi? Ang iyang Gingharian, nga usa ka gobyerno sa langit, magwagtang sa tanang hinagiban ug magtapos sa tanang kapintasan.—Salmo 46:8, 9.

Aron makakat-og dugang bahin sa kon unsay napalampos sa Gingharian sa Diyos, basaha ang artikulong “Sa Pagmando sa Gingharian sa Diyos ‘ang Pakigdait Modagaya.’”