Ang Armagedon ba Magsugod sa Israel?—Unsay Giingon sa Bibliya?

Sa Bibliya, ang Armagedon wala magtumong sa usa ka gubat nga moapektar lang sa espesipikong lugar sa yuta. Kondili nagtumong ni sa usa ka tibuok kalibotang gubat tali sa Diyos ug sa tanang gobyerno sa tawo.

• “Mga pahayag sa mga demonyo . . . nangadto sa mga hari sa tibuok gipuy-ang yuta, aron tigomon sila ngadto sa gubat sa dakong adlaw sa Diyos nga Labing Gamhanan. . . . Gitigom sila niini sa dapit nga gitawag sa Hebreohanon ug Armagedon.”—Pinadayag 16:14, 16.

Ang pulong “Armagedon” naggikan sa Hebreohanong pulong nga Har Meghid·dohnʹ, nga nagkahulogang “Bukid sa Megido.” Ang Megido maoy siyudad sa teritoryo sa karaang Israel. Tungod ana, ang pipila nagtuo nga sa Israel mahitabo ang Armagedon. Pero, dili paigo ang rehiyon sa Megido o bisan unsang lugar sa Middle East aron pagatigomon ang “mga hari sa tibuok gipuy-ang yuta” ug ang ilang mga kasundalohan.

Ang basahon sa Pinadayag gisulat pinaagig “mga ilhanan,” o simbolo. (Pinadayag 1:1) Ang Armagedon wala magtumong sa usa ka literal nga lugar. Hinuon, nagtumong ni sa tibuok kalibotan nga panghitabo diin ang mga nasod magkahiusa sa ilang kataposang pagpakigbatok sa pagmando sa Diyos.—Pinadayag 19:11-16, 19-21.