Nganong Lisod Para sa mga Tawo nga Makab-ot ang Kalinaw?—Unsay Giingon sa Bibliya?

Ang mga lider sa kalibotan ug ang internasyonal nga mga organisasyon wala makapatunghag kalinaw sa kalibotan. Karon, mas daghang bayolenteng panag-away ug gubat ang nahitabo sukad niadtong Gubat sa Kalibotan II. Mga duha ka bilyong tawo, nga katumbas sa 25 porsiyento sa populasyon sa kalibotan, ang nagpuyo sa mga lugar nga apektado sa maong mga panag-away.

Nganong ang mga tawo dili makapatunghag kalinaw? Unsay giingon sa Bibliya?

Tulo ka rason kon nganong ang mga tawo dili makapatunghag kalinaw

1. 1. Ang mga tawo nagpakitag mga tinamdan nga makababag nila sa pagpakigdait sa uban. Gitagna sa Bibliya nga sa atong panahon, “ang mga tawo unya mahigugmaon sa kaugalingon, mahigugmaon sa kuwarta, hambogiro, mapahitas-on, . . . dili maunongon, . . . dili ikasabot, . . . walay pagpugong sa kaugalingon, bayolente, . . . gahig ulo, garboso kaayo.”—2 Timoteo 3:2-4.

2. 2. Ang mga tawo, ingong indibiduwal ug ingong grupo, walay katakos sa pagsulbad sa ilang mga problema nga wala ang tabang sa ilang Maglalalang, si Jehovaa nga Diyos. Gipakita sa Bibliya nga “dili iya sa tawong naglakaw bisan ang pagtultol sa iyang lakang.”—Jeremias 10:23.

3. 3. Ang kalibotan nailalom sa impluwensiya sa usa ka gamhanan ug daotang magmamando, si Satanas nga Yawa, “nga nagpahisalaag sa tibuok gipuy-ang yuta.” (Pinadayag 12:9) Samtang “ang tibuok kalibotan nailalom [pa] sa gahom sa usa nga daotan,” dunay mahitabong mga gubat ug panag-away.—1 Juan 5:19.

Kinsa ang makapatungha sa kalinaw?

Gipasaligan ta sa Bibliya nga dili ang mga tawo ang makapatungha sa kalinaw, kondili ang Diyos.

• “‘Kay nahibalo ko pag-ayo kon unsay akong buhaton kaninyo,’ miingon si Jehova, ‘hatagan mo nakog kalinaw, ug dili katalagman, aron makabaton mog maayong kaugmaon ug paglaom.’”—Jeremias 29:11.

Sa unsang paagi tumanon sa Diyos ang maong saad? “Ang Diyos nga nagahatag ug kalinaw magdugmok kang Satanas.” (Roma 16:20) Gamiton sa Diyos ang usa ka langitnong gobyerno, nga gitumong sa Bibliya ingong “Gingharian sa Diyos,” sa pagpatunghag kalinaw sa tibuok kalibotan. (Lucas 4:43) Ubos sa pagmando ni Jesu-Kristo, ang Hari sa maong Gingharian, ang mga tawo tudloan kon sa unsang paagi magkinabuhi nga may kalinaw o pakigdait.—Isaias 9:6, 7.

• Aron mahibalog dugang, basaha ang artikulong “Unsay Himoon sa Gingharian sa Diyos?”