Unsay Ginahimo Panahon sa Kasal sa mga Saksi ni Jehova?
Ang kasal sa mga Saksi ni Jehova sagad dunay simple ug dungganon nga seremonyas nga may mubong pakigpulong base sa Bibliya. Ang seremonyas mahimong sundan ug tapoktapok, o reception, nga puwedeng may kaonkaon.a Si Jesus mitambong ug kombira sa kasal sa siyudad sa Cana sa sayong bahin sa iyang ministeryo.—Juan 2:1-11.
Unsay ginahimo panahon sa seremonyas sa kasal?
Ang pangunang bahin sa seremonyas mao ang pakigpulong sa kasal, nga mga 30 minutos ang gitas-on ug ihatag sa usa ka ministro sa mga Saksi ni Jehova. Ang makapadasig ug makapalig-ong pakigpulong magpasiugda kon sa unsang paagi ang Bibliya makatabang sa magtiayon nga makabatog dumalayon, mahigugmaon, ug malipayon nga kaminyoon.—Efeso 5:33.
Sa daghang nasod, ang gobyerno nag-awtorisar sa mga ministro sa mga Saksi ni Jehova sa pagkasal. Kon ingon niana ang kahimtang, ang gikasal manumpa sa usag usa sa hapit nang matapos ang pakigpulong. Puwede sab silang mohatag ug singsing sa usag usa. Dayon, ipahibalo sa ministro nga magtiayon na sila.
Sa ubang nasod, gitakda sa balaod nga usa ka opisyal sa gobyerno ang mokasal sa kaslonon. Himoon ni sa kaslonon una ang pakigpulong sa kasal. Kon wala pa sila manumpa panahon sa sibil nga kasal, puwede nâ nilang himoon sa hapit nang matapos ang pakigpulong. Kon nanumpa na sila, puwede nila ning usbon pagsulti kon gusto nila, pero gamiton nila ang past tense. Ang pakigpulong taposon pinaagig pag-ampo, nga maghangyo sa Diyos nga panalanginan ang bag-ong magtiayon.
Asa ginahimo ang kasal sa mga Saksi ni Jehova?
Daghang Saksi ang magpakasal sa Kingdom Hall kon puwede ning gamiton.b Kon naa silay reception, magpili silag laing lugar para niana.
Kinsay puwedeng motambong?
Kon ang kasal himoon sa Kingdom Hall, sagad puwedeng motambong bisan kinsa—mga Saksi ug dili Saksi. Kon dunay reception, ang kaslonon maoy mopili kon kinsay imbitahon.
Duna bay espesipikong instruksiyon kon unsay isul-ob?
Bisag walay espesipikong instruksiyon kon unsay isul-ob diha sa mga kasal nga himoon sa Kingdom Hall, ang mga Saksi ni Jehova naningkamot sa pagsunod sa sugo sa Bibliya nga magsul-ob ug desenteng sinina nga magpakitag pagtahod nianang importanteng okasyon. Maapresyar nila kon mao pod nay himoon sa uban. (1 Timoteo 2:9) Siyempre, kon dunay reception, ang maong mga prinsipyo mapadapat sab.
Duna bay mga regalo sa kasal?
Ang Bibliya nagdasig nato nga magmahinatagon. (Salmo 37:21) Ang mga Saksi ni Jehova malipayng mohatag ug modawat ug mga regalo sa kasal. (Lucas 6:38) Pero ang mga Saksi dili mangayog regalo o mag-anunsiyo sa ngalan sa mga nanghatag. (Mateo 6:3, 4; 2 Corinto 9:7; 1 Pedro 3:8) Kini nga mga kostumbre supak sa Bibliya, ug kon himoon ni, posibleng maulawan ang mga nanambong.
Mag-toast bag bino panahon sa reception?
Dili. Ang mga Saksi ni Jehova dili mag-toast, kay kini nga kostumbre naggikan sa bakak nga mga relihiyon.c Ang mga Saksi mopahayag sa ilang mga pahalipay sa bag-ong kasal sa laing mga paagi.
Magsabwag bag bugas o confetti?
Dili. Sa pipila ka lugar, ang mga tawo magsabwag sa bag-ong kasal ug bugas, confetti, o mga butang nga susama niana. Sila nagtuo nga kini maghatag sa magtiayon ug suwerte, kalipay, ug taas nga kinabuhi. Pero ang mga Saksi ni Jehova dili mohimog mga kostumbre nga gibase sa patuotuo. Apil na niana ang pagpanghinaot ug suwerte, nga supak sa giingon sa Bibliya.—Isaias 65:11.
Duna bay pagkaon ug ilimnon?
Panahon sa kasal sa Kingdom Hall, ang kaslonon dili magdalit ug pagkaon o ilimnon. Ang pipila ka kaslonon modesisyon nga dunay reception human sa seremonyas, ug didto posibleng dunay idalit nga pagkaon o snack. (Ecclesiastes 9:7) Kon modesisyon sila nga magdalit ug alkoholikong ilimnon, seguroon nila nga igoigo lang ang gidaghanon niini ug para lang niadtong naa na sa legal nga edad nga moinom.—Lucas 21:34; Roma 13:1, 13.
Duna bay musika o sayawsayaw?
Kon ang kaslonon dunay reception, puwede silang modesisyon nga apilan nig musika ug sayawsayaw. (Ecclesiastes 3:4) Ang musika nga ilang pilion magdepende sa ilang gusto ug sa ilang kultura, pero seguroon nila nga maayo ning paminawon ug maayog epekto sa ilang mga bisita. Ang mga kasal nga himoon sa Kingdom Hall sagad dunay mga musika nga ang liriko gibase sa Bibliya.
Magselebrar ba ang mga Saksi ni Jehova ug anibersaryo sa kasal?
Kay ang Bibliya walay giingon bahin sa mga anibersaryo sa kasal, ang mga magtiayong Saksi maoy modesisyon kon magselebrar ba sila o dili sa ilang anibersaryo. Kon magselebrar sila, himoon tingali nila kini sa pribado o uban sa ilang mga higala ug pamilya.
a Ang mga kostumbre ug legal nga mga kinahanglanon magkalainlain tingali depende sa lugar.
b Ang ministro nga mohatag sa pakigpulong dili magpabayad para sa seremonyas sa kasal, ug wala poy bayad ang paggamit sa Kingdom Hall.
c Alang sa dugang impormasyon bahin sa paganong sinugdanan sa pag-toast ug bino, tan-awa ang “Mga Pangutana Gikan sa mga Magbabasa” sa Pebrero 15, 2007 nga Bantayanang Torre.