Unsaon Pagtratar sa mga Saksi ni Jehova Kadtong Dili na Bahin sa Ilang Relihiyon?

Naningkamot mi nga trataron ang tanan uban ang gugma, pagkabuotan, ug pagtahod. Kon ang usa ka Saksi ni Jehova dili na kaayo aktibo o mihunong sa pagsimba, mangita mig mga paagi aron maestorya siya, mapasaligan nga gimahal namo siya, ug matabangan nga masuod ug balik sa Diyos.—Lucas 15:4-7.

Naa tingali mga higayon nga tungod sa binuhatan sa usa ka indibiduwal kinahanglan siyang tangtangon gikan sa kongregasyon. (1 Corinto 5:13) Pero kay gimahal kaayo namo ang among kaubang mga Saksi, maningkamot mi nga tabangan ang maong indibiduwal aron dili na siya kinahanglang tangtangon sa kongregasyon. Ug bisag matangtang siya, pakitaan gihapon namo siyag gugma ug pagtahod, sama sa gidasig sa Bibliya nga angay namong himoon.—Marcos 12:31; 1 Pedro 2:17.

Unsay mga hinungdan nga matangtang ang usa ka indibiduwal gikan sa kongregasyon?

Ang Bibliya klarong nag-ingon nga kon ang usa ka Kristohanon mohimog seryosong sala ug dili magbag-o, kinahanglan siyang tangtangon gikan sa kongregasyon.a (1 Corinto 5:11-13) Gihisgotan pod sa Bibliya kon unsang mga sala ang grabe kaayo nga tungod ana ang usa puwedeng matangtang. Apil ani ang mga sala sama sa pagpanapaw, paghuboghubog, pagpatay, pagpangabuso sa mga membro sa pamilya, ug pagpangawat.—1 Corinto 6:9, 10; Galacia 5:19-21; 1 Timoteo 1:9, 10.

Pero dili dayon namo tangtangon sa kongregasyon ang indibiduwal nga nakahimog seryosong sala. Ang mga ansiyano sa kongregasyonb maningkamot una nga tabangan siya nga magbag-o. (Roma 2:4) Himoon nila ang ilang maarangan nga magpakitag gugma, pailob, ug pagkabuotan aron matandog ang iyang kasingkasing. (Galacia 6:1) Pinaagi ani, ang nakahimog sala basin makaamgo sa iyang nahimo ug maghinulsol. (2 Timoteo 2:24-26) Pero kon balikbalik na siyang gitabangan ug padayon gihapon niyang gilapas ang balaod sa Bibliya ug wala maghinulsol, kinahanglan siyang tangtangon gikan sa kongregasyon. Ang mga ansiyano mohimog pahibalo sa kongregasyon nga ang maong indibiduwal dili na Saksi ni Jehova.

Unsay maayong mga resulta kon tangtangon ang indibiduwal nga padayong naghimog sala? Ang usa sa maayong resulta mao nga masunod ang mga sukdanan sa Diyos bahin sa moral ug mapanalipdan ang kongregasyon sa dili maayong impluwensiya sa tawong naghimog sala. (1 Corinto 5:6; 15:33; 1 Pedro 1:16) Dugang pa, ang nakasala mapalihok tingali nga mohunong sa paghimog daotan ug maningkamot nga magbag-o.—Hebreohanon 12:11.

Unsay pagtratar sa mga Saksi ni Jehova niadtong mga natangtang sa kongregasyon?

Ang Bibliya nag-ingon nga ang mga Kristohanon angayng “mohunong na sa pagpakig-uban” niadtong natangtang gikan sa kongregasyon, ug “dili gani mokaon uban sa ingon niana nga tawo.” (1 Corinto 5:11) Mao nga dili mi makig-uban niadtong natangtang. Pero wala na magpasabot nga dili na gyod namo siya tagdon. Trataron namo siya uban ang pagtahod. Makatambong pod siya sa among relihiyosong mga panagkatigom diin puwede siyang timbayaon sa mga Saksi ni Jehova.c Puwede pod siyang mangayog tabang sa mga ansiyano aron mabalik ang iyang maayong relasyon sa Diyos.

Komosta kadtong natangtang sa kongregasyon pero Saksi ni Jehova gihapon ang kapikas ug ang bata pa nga mga anak? Bisag wala na siya magsimba kang Jehova nga Diyos uban sa iyang pamilya, magpabilin gihapon ang ilang relasyon ingong pamilya. Kay nagpuyo man sila sa usa lang ka balay, silang tanan angayng magpakitag gugma sa usag usa.

Kadtong natangtang gikan sa kongregasyon makahangyo nga duawon siya sa mga ansiyano, kinsa mohatag niyag mahigugmaong tambag gikan sa Bibliya ug modasig niya nga maghinulsol ug mobalik sa Diyos. (Zacarias 1:3) Kon mohunong siya sa paghimog daotan ug ipakita ang iyang sinserong tinguha nga sundon ang mga sukdanan sa Bibliya, kinasingkasing siyang dawaton pag-usab ingong bahin sa kongregasyon. Ang kongregasyon ‘andam mopasaylo ug mohupay niya,’ sama sa gihimo sa mga Kristohanon sa Corinto dihang ang nakasala nagbag-o.—2 Corinto 2:6-8.

Unsay gibati niadtong mga natangtang kaniadto?

Matikdi ang giingon sa pipila ka Saksi ni Jehova nga natangtang gikan sa kongregasyon kaniadto ug sa ulahi midesisyon nga mobalik sa Diyos.

“Dihang nakadesisyon ko nga mobalik sa kongregasyon, abi nakog pangutan-on pa ko sa mga ansiyano kon unsay akong gihimo sa daghang tuig nga natangtang ko. Pero miingon lang sila, ‘Ayaw nag baliki tong nangagi, pagpokus lang sa imong himoon karon.’ Nahupayan gyod ko sa ilang giingon.”—Maria, United States.

“Nalipay kaayo ang kongregasyon nga mibalik ko. Gimahal gyod ko nila. Gipabati sa mga igsoon nga napasaylo na gyod ko sa Diyos ug nakatabang ni nako nga dili na maghunahuna sa nangagi. Gitabangan pod ko sa mga ansiyano nga mabalik ang akong maayong relasyon kang Jehova. Gihupay ko nila, ug gipakita gyod nila nga gipabilhan ug gimahal ko ni Jehova.”—Malcom, Sierra Leone.

“Gimahal gyod ni Jehova ang iyang katawhan kay gusto niya nga magpabiling hinlo sa moral ang iyang organisasyon. Nakapalipay gyod na nako. Bisag para sa uban daotan ang pagtangtang sa indibiduwal nga nagpakasala, makaingon ko nga kinahanglan gyod ning himoon ug pagpakita gyod nig gugma. Mapasalamaton kaayo ko nga ang atong langitnong Amahan mahigugmaon kaayo ug mapinasayloon nga Diyos.”—Sandi, United States.