MGA BATAN-ON NANGUTANA
Lingawlingaw ra ba ang Flirting?
Unsa ang flirting?
Para sa uban, ang flirting maoy pagpakita, pinaagig sulti ug buhat, nga nakagusto ka sa usa ka tawo. Sayop ba kon imong ipakita nga nakagusto ka sa usa ka tawo? Dili. “Kon puwede na kang makigdeyt ug naa na kay nagustohan,” miingon ang batan-ong si Ann, “unsaon man nimo pagkahibalo kon pareho mog feelings?”
Usahay ipabati sa uban nga nakagusto sila sa usa ka tawo, pero dili diay sila seryoso. Kana nga klase sa flirting ang atong hisgotan.
“Lahi nang hatagan nimog espesyal nga atensiyon ang usa ka tawo kay tinuod gyod kang nakaangay niya. Pero lahi pod nang padahomon nimo ang tawo nga nakagusto ka niya. Imo ra siyang mapasakitan kay dili man diay nimo tinud-on.”—Deanna.
Nganong naga-flirt ang uban?
Naga-flirt ang uban aron motaas ang ilang pagtan-aw sa kaugalingon. “Kon mamatikdan nimo nga mosaler ang imong pag-flirt, ganahan na pod ka magsigeg flirt,” miingon ang batan-ong si Hailey.
Pero kon tinuyo nimong padahomon ang usa ka tawo bisag wala gyod ka makagusto niya, imo rang gibalewala o giduladulaan ang iyang pagbati. Ug makuwestiyon sab kon tarong ba ka nga pagkatawo. Ang Bibliya nag-ingon: “Ikalipay sa walay buot ang mga binuang.”—Panultihon (Proverbio) 15:21, Biblia sa Kristohanong Katilingban.
Tinuod gyod ang giingon ni Hailey. “Tingali sa sugod, morag duwaduwa lang ang flirting, pero dili gyod maayo ang resulta ini.”
Unsa ang dili maayong mga resulta?
Kon mag-flirt ka, madaot ang imong reputasyon.
“Ang tawong flirt ginaisip sa uban ingong insecure ug immature. Dili ka mosalig niya kay naghunahuna man ka nga naa ra siyay gustong makuha nimo.”—Jeremy.
Ang Bibliya nag-ingon: “Ang gugma . . . dili mangita sa kaugalingong kaayohan niini.”—1 Corinto 13:4, 5.
Hunahunaa: Unsang mga sinultihan o binuhatan ang makahatag ug impresyon nga flirt ka?
Kon mag-flirt ka, mapasakitan nimo ang laing tawo.
“Dili ko ganahan makig-uban ug flirt. Feeling nako, makig-estorya ra siya kay babaye man ko. Ang mga flirt wala ra gyoy pakabana nako. Gusto lang nilang mapalipay ang ilang kaugalingon.”—Jaqueline.
Ang Bibliya nag-ingon: “Magpadayon pagpangita ang matag usa, dili sa iyang kaugalingong kaayohan, kondili nianang sa laing tawo.”—1 Corinto 10:24.
Hunahunaa: Nakasulay na ba kang gipadahom ka sa usa ka tawo nga nakagusto siya nimo, pero wala diay? Unsa may imong gibati? Unsay imong himoon aron dili pod ka makapasakit sa uban?
Kon flirt ka, way tawong tarong ang makagusto nimo.
“Wala gyoy ganahan makigminyo o bisan ganig makig-date sa tawong flirt. Nganong makigsuod o mosalig man ko sa tawong dili sinsero o nagpakaaron-ingnon lang?”—Olivia.
Sa Bibliya, ang salmistang si David miingon: “Wala ko makig-uban . . . sa tigpakaaron-ingnon.”—Salmo 26:4, Biblia sa Kristohanong Katilingban.
Hunahunaa: Unsang klase sa tawo ang ganahan pod ug flirt? Ganahan ba sab kag ingon ana?