MGA BATAN-ON NANGUTANA
Unsaon Nako Pag-move on sa Among Panagbulag?
“Dihang nagbulag mi sa akong uyab, guol kaayo ko,” miingon si Steven. “Mao toy pinakasakit nga akong gibati.”
Naka-experience na ba kag ingon ana? Kon oo, kining artikuloha makatabang nimo.
Kon unsa ka sakit
Ang pagbulag sa manag-uyab sakit kaayo para nilang duha.
Kon ikaw ang nakigbulag, makasabot seguro ka sa gibati ni Jasmine, nga miingon, “Nakonsensiya kaayo ko nga napasakitan nako ang tawong dili gani nako gustong pasakitan. Unta dili na ko maka-experience anig usab.”
Kon ikaw ang gibulagan, makasabot tingali ka nganong ang uban moingon nga mora silag namatyan. “Dugaydugay pod kong naka-move on,” miingon ang batan-ong si Janet. “Sa primero, dili ko katuo ug naglagot ko, pero gusto kong makigbalik niya, dayon na-depress ko. Pero paglabayg mga usa ka tuig, naka-move on ra gyod ko.”
Ang punto: Ang panagbulag sakit kaayo ug tingali maka-depress pa gani. Usa ka magsusulat sa Bibliya miingon nga ang sobrang kaguol “makapauga sa kabukogan,” o makapaluya.—Proverbio 17:22.
Ang imong mahimo
Pakig-estorya sa kasaligang amigo o amiga. Ang Bibliya nag-ingon: “Ang tinuod nga higala mahigugma sa tanang panahon, ug maoy usa ka igsoon nga natawo alang sa panahon sa kasakit.” (Proverbio 17:17) Kon imong isulti sa imong ginikanan o sa kasaligang higala ang imong gibati, matabangan ka nga makontrol ang imong emosyon.
“Pipila pod ka bulan nga gusto lang kong mag-inusara, ug gitago ra nako ang akong gibati. Pero nakatabang gyod ang akong mga higala. Dihang naestorya na nako nila ang akong gibati, migaan-gaan akong paminaw.”—Janet.
Kuhaig leksiyon ang nahitabo. Ang Bibliya nag-ingon: “Batoni ang kaalam, batoni ang pagsabot.” (Proverbio 4:5) Ang dili maayong mga eksperyensiya makatabang nato nga mas mailhan ang atong kaugalingon ug makakat-on kon unsaon pag-atubang ang maong mga situwasyon.
“Human mi magbulag sa akong uyab, gipangutana ko sa akong amigo, ‘Unsay imong nakat-onan sa inyong relasyon, ug unsaon nimo paggamit ang imong nakat-onan kon mosulod kag bag-ong relasyon?’”—Steven.
Pag-ampo. Ang Bibliya nag-ingon: “Itugyan ang imong palas-anon kang Jehova,” kay siya magpalig-on nimo. (Salmo 55:22) Ang pag-ampo makatabang nimo nga mahupayan sa imong kaguol ug magmapositibo gihapon bisan sa panagbulag.
“Pag-ampo pirme kang Jehova, kay mas nakasabot siya sa imong gibating kaguol ug sa imong situwasyon.”—Marcia.
Tabangi ang uban. Ang Bibliya nagdasig nato nga hunahunaon ‘dili lang ang atong kaugalingong kaayohan, kondili ang kaayohan usab sa uban.’ (Filipos 2:4, Ang Biblia, NCV) Kon ipokus nimo ang imong atensiyon sa pagtabang sa uban, mas dali kang maka-move on sa inyong panagbulag.
“Tong nagbulag mi sa akong uyab, gibati nako nga morag kataposan na sa kalibotan. Sakit gyod kaayo to. Pero kadugayan anam-anam ra to nga nawala. Nagkinahanglan lang gyod ug panahon aron mawala ang kasakit nga akong gibati.”—Evelyn.