MGA BATAN-ON NANGUTANA
Nganong Motambong sa mga Tigom sa Kingdom Hall?
Kaduha sa matag semana, ang mga Saksi ni Jehova magtigom diha sa ilang mga dapit sa pagsimba, nga gitawag ug Kingdom Hall. Unsay ginahimo didto, ug unsay mga kaayohan kon motambong ka?
Unsay ginahimo diha sa Kingdom Hall?
Ang Kingdom Hall maoy dapit alang sa pagkat-on nga ang ginatudlo maoy praktikal nga edukasyon bahin sa Bibliya. Ang mga tigom didto makatabang nimo nga:
makat-onan ang kamatuoran bahin sa Diyos.
masabtan ang hinungdan sa mga panghitabo karon.
mahimong mas maayong tawo.
makaplagan ang maayong mga higala.
Nahibalo ka ba? Ang dapit sa pagsimba sa mga Saksi ni Jehova gitawag ug Kingdom Hall kay kanunayng ginahisgotan didto ang Gingharian sa Diyos.—Mateo 6:9, 10; 24:14; Lucas 4:43.
Nganong angay kang motambong?
Ang imong makat-onan didto makatabang nimo. Ang mga prinsipyo sa Bibliya nga ginahisgotan sa mga tigom sa mga Saksi ni Jehova makatabang nimo nga ‘mabatonan ang kaalam.’ (Proverbio 4:5) Nagkahulogan kana nga ang Bibliya makatabang nimo sa paghimog maayong mga desisyon sa kinabuhi. Makatabang usab kini kanimo nga matubag ang importanteng mga pangutana sa kinabuhi, sama sa:
Ang mosunod maoy pipila sa mga ulohan sa pakigpulong diha sa mga tigom sa Sabado o Dominggo:
Nganong Magpagiya sa Bibliya?
Kinsay Makatabang Kanimo Panahon sa Kasakitan?
Kon Unsay Ginahimo sa Gingharian sa Diyos Kanato Karon.
“Mitambong sa tigom ang akong klasmet. Mitapad siya sa akong pamilya, ug gipagamit namo niya ang among mga libro. Pagkahuman sa tigom, giingnan ko niya nga ganahan siya sa mga komento panahon sa panaghisgot. Miingon sab siya nga sa ilang simbahan wala silay mga basahon nga gigamit sa pagtuon nga sama sa atoa.”—Brenda.
Nahibalo ka ba? Libre ang pagtambong sa Kingdom Hall, ug walay pagpangolekta.
Ang pagpakig-uban didto makapadasig nimo. Ang Bibliya nag-ingon nga ang usa ka rason kon nganong magtigom ang mga Kristohanon maoy aron “magdinasigay sa usag usa.” (Hebreohanon 10:24, 25) Ang pagpakig-uban sa mga tawo nga mas naghatag ug pagtagad sa Diyos ug sa uban kay sa ilang kaugalingon makapadasig gayod, kay sa kalibotan karon daghan ang naghunahuna lang sa kaugalingon.
“May mga panahon nga maguol ko ug kapoyon human sa tibuok adlaw, apan ang mga tawo sa Kingdom Hall kanunayng makapagaan sa akong gibati. Inig-uli nako gikan sa tigom, malipayon ko ug andam na pod alang sa sunod adlaw.”—Elisa.
Nahibalo ka ba? Dunay kapin sa 120,000 ka kongregasyon sa mga Saksi ni Jehova sa tibuok kalibotan, nga nagtigom sa kapig 60,000 ka lokasyon. Matag tuig, sa aberids, mga 1,500 ka Kingdom Hall ang gitukod aron magamit sa nagkadaghang tumatambong.a
a Aron masayran ang lokasyon sa mga tigom, adto sa page nga “Mga Tigom sa Kongregasyon sa mga Saksi ni Jehova” ug i-click ang “Pangitag Lokasyon nga Duol sa Inyo.”