Unsay Giingon sa Bibliya Bahin sa Cremation?
Tubag sa Bibliya
Ang Bibliya wala maghatag ug espesipikong instruksiyon bahin sa cremation, o pagsunog sa patayng lawas. Walay sugo sa Bibliya bahin sa paglubong o pagsunog sa patayng lawas.
Pero ang Bibliya naghisgot ug mga kahimtang diin ang matinumanong mga alagad sa Diyos naglubong sa ilang mga minatay. Pananglitan, si Abraham naningkamot pag-ayo sa pagpangitag kalubngan sa iyang namatay nga asawang si Sara.—Genesis 23:2-20; 49:29-32.
Naghisgot sab ang Bibliya ug matinumanong mga alagad nga nagsunog sa patayng lawas. Pananglitan, dihang namatay sa gubat si Haring Saul ug ang tulo sa iyang mga anak nga lalaki, ang ilang patayng lawas didto ra sa teritoryo sa mga kaaway ug gipasipad-an kini. Dihang nahibaloan kini sa matinumanon nga Israelinhong mga manggugubat, ilang gikuha ang lawas ni Saul ug sa iyang mga anak, gisunog kini, ug gilubong. (1 Samuel 31:8-13) Gipakita sa Bibliya nga kadto dalawatong paagi sa paghipos sa patayng lawas niadtong mga tawhana.—2 Samuel 2:4-6.
Sayop nga mga ideya bahin sa cremation nga komon karon
Sayop nga ideya: Ang cremation nagpakitag kawalay pagtahod sa patayng lawas.
Tinuod: Ang Bibliya nag-ingon nga ang mamatay mobalik sa abog, nga maoy natural nga mahitabo dihang madugta ang patayng lawas. (Genesis 3:19) Pinaagi sa cremation, mas daling mahimong abo, o abog, ang patayng lawas.
Sayop nga ideya: Sa kapanahonan sa Bibliya, kadto lang wala uyoni sa Diyos ang gisunog human mamatay.
Tinuod: Ang patayng lawas sa pipila ka dili matinumanon, sama ni Acan ug sa iyang pamilya, gisunog. (Josue 7:25) Hinuon, eksepsiyon ni dili balaod. (Deuteronomio 21:22, 23) Sa nahisgotan na, bisan ang patayng lawas sa pipila ka matinumanong mga alagad, sama ni Jonatan nga anak ni Haring Saul, gisunog human mamatay.
Sayop nga ideya: Dili makabanhaw ang Diyos sa tawong gi-cremate.
Tinuod: Bahin sa pagbanhaw sa mga patay, dili igsapayan sa Diyos kon ang patayng lawas sa tawo gilubong, gi-cremate, nawala sa dagat, o gikaon sa mabangis nga hayop. (Pinadayag 20:13) Dali ra kaayo alang sa Labing Gamhanan ang paghimog bag-ong lawas.—1 Corinto 15:35, 38.