Gigamit ba sa Diyos ang Ebolusyon sa Pagpatungha sa Lainlaing Matang sa Kinabuhi?
Tubag sa Bibliya
Wala. Ang Bibliya klarong nag-ingon nga gilalang sa Diyos ang mga tawo ug ang lainlaing “matang” sa mga hayop ug tanom.a (Genesis 1:12, 21, 25, 27; Pinadayag 4:11) Kini nag-ingon sab nga ang tanang tawo naggikan kang Adan ug Eva, ang atong unang mga ginikanan. (Genesis 3:20; 4:1) Ang Bibliya wala magsuportar sa teoriya nga ang Diyos naggamit sa ebolusyon sa pagpatungha sa lainlaing matang sa kinabuhi, nga tawgon usahay ug theistic evolution. Pero ang Bibliya dili supak sa siyentipikanhong obserbasyon nga dunay lainlaing klase diha sa usa ka matang sa kinabuhi.b
Gigamit ba sa Diyos ang ebolusyon?
Ang terminong “theistic evolution” lapad ug kahulogan. Sumala sa Encyclopædia Britannica, kini nga termino nagpakaylap sa ideya nga ang “natural selection maoy usa sa mga paagi nga gigamit sa Diyos sa pagpatungha sa mga butang sa kinaiyahan.”
Apil sab sa theistic evolution kini nga mga ideya:
Ang tanang buhing organismo mao rag mga gigikanan, o ancestor, nga naglungtad dugay na kanhi.
Ang usa ka klase sa kinabuhi bug-os nga mausab ug mahimong laing klase sa kinabuhi, ideya nga usahay tawgong macroevolution.
Ang Diyos ang naghimo niini nga mga proseso.
Nahiuyon ba sa Bibliya ang ebolusyon?
Base sa theistic evolution, ang giingon sa Bibliya bahin sa paglalang diha sa Genesis dili siyento porsiyentong eksakto. Pero si Jesus mikutlo sa estorya sa Genesis, nga nagpakitang tinuod gyod ni nga hitabo. (Genesis 1:26, 27; 2:18-24; Mateo 19:4-6) Ang Bibliya nag-ingon nga sa wala pa monaog si Jesus sa yuta, siya nagkinabuhi na sa langit uban sa Diyos ug mitabang sa pagpatungha sa tanang butang. (Juan 1:3) Busa ang ideya nga ang Diyos naggamit sa ebolusyon sa pagpatungha sa lainlaing klase sa kinabuhi wala mahiuyon sa Bibliya.
Komosta man ang abilidad sa mga tanom ug hayop nga mopahiuyon sa kahimtang sa palibot?
Ang Bibliya wala maghisgot kon unsa ka daghang klase ang mahimong motungha diha sa usa ka matang sa kinabuhi. Ang Bibliya dili sab supak sa kamatuoran nga ang lainlaing klase sa hayop ug tanom nga gilalang sa Diyos makapatunghag laing klase dihang kini i-breed o dihang kini mopahiuyon sa bag-ong palibot. Bisan tuod giisip kini sa uban ingong ebolusyon, ang tinuod walay mitungha nga bag-ong matang sa kinabuhi.
a Ang Bibliya naggamit sa pulong “matang,” nga mas lapad ug kahulogan kay sa pulong “species” nga gigamit sa mga siyentipiko. Usahay, moingon ang mga siyentipiko nga dunay bag-ong species nga mitungha pinaagig ebolusyon pero ang tinuod laing klase lang ni diha sa usa ka matang, nga maoy pulong nga gigamit sa Genesis.
b Kini nga ideya usahay tawgong microevolution.