Ang Papilit sa Sisi

Sulod sa dugayng panahon, ang mga siyentista nga nagtuon sa mga hayop nakamatikod nga ang mga sisi o barnacle makatapot sa kasko sa mga barko, pantalan, ug mga bato. Ang papilit o glue nga ginapagawas sa sisi mas kusog mopilit kay sa bisan unsang papilit nga hinimo sa tawo. Di pa dugay, nasayran sa mga siyentista kon nganong ang mga sisi makatapot bisan sa basa nga lugar.

Hunahunaa: Gipakita sa mga pagtuon nga ang larva nga sisi, nga makahimo na sa paglangoy, magsusi sa lainlaing lugar nga puwedeng taptan niini una kini mopili kon asa motapot. Dihang makapili nig kataptan, ang larva magpagawas ug duha ka substansiya. Ang una mao ang mantikaong likido nga magtangtang sa tubig sa napili niining taptan. Kini nga likido mag-andam pod sa lugar para makatapot ang ikaduhang substansiya, nga ginama sa mga protina nga gitawag ug phosphoproteins.

Kining duha ka substansiya magpormag kusog motapot nga papilit nga dili madaot bisan sa mga bakterya. Importante kaayo nga lig-on ang maong papilit kay nianang lugara na motapot ang sisi sa tibuok nga kinabuhi niini.

Ang proseso sa paggama ug papilit sa sisi mas komplikado kay sa gidahom sa mga siyentista. Ang usa ka membro sa grupo nga nakadiskobre sa proseso miingon nga “maayo kaayo ni nga solusyon gikan sa kinaiyahan” kon unsaon nga ang papilit motapot gihapon bisag naay tubig o basa ang lugar. Ang mga nadiskobrehan makatabang sa mga researcher sa paghimog papilit nga magamit ilawom sa tubig ug sa paghimog synthetic nga mga papilit nga ginama gikan sa natural nga mga substansiya nga magamit sa electronics ug mga medical implant.

Unsay imong hunahuna? Ang papilit ba sa sisi mitungha pinaagig ebolusyon? O kini ba gidisenyo?