Ang Suction Disc sa Kumi

Ang isda nga kumi (remora) dunay abilidad nga lig-ong makatapot sa ubang mananap sa dagat, ug sayon ra niyang matangtang ang iyang kaugalingon nga dili ra masakitan ang iyang gitapotan. Kini nga abilidad nakapainteres sa mga researcher.

Hunahunaa: Ang kumi motapot sa mga pagi, iho, pawikan, balyena, ug ubang mananap sa dagat, hamis man o dili ang ilang panit o kabhang. Ang kumi mokaog mga parasite ug sobrang pagkaon sa iyang gitapotan. Malibre sab ang iyang paglangoy ug maproteksiyonan siya gikan sa mga isda nga manukob. Gitun-an sa mga researcher ang pangtapot, o suction disc, sa kumi aron mahibaloan kon nganong lig-on kining makatapot sa lainlaing klase sa panit o kabhang nga dili ra masakitan ang iyang gitapotan.

Mga kumi nga nag-uban-uban sa butanding

Ang pormag oval nga suction disc sa kumi naa sa iyang ulo. Humok ug baga ang palibot nga kilid sa disc, maong makahimo kinig hugot nga suction nga dili daling matangtang. Sa tunga sa disc, dunay naglaray nga mga bugdobugdo, ug ang matag bugdo dunay gahi ug gagmay kaayong mga tunok. Dihang motindog ang mga bugdobugdo, ang mga tunok modapat sa panit sa gitapotan ug moresulta kinig friction. Tungod niining kombinasyon sa suction ug friction, ang kumi lig-ong makatapot bisag paspas kaayong molangoy ang iyang gitapotan o kalit kining mag-usab ug direksiyon.

Mibilib ang mga siyentista sa suction disc sa kumi, maong naghimo silag artipisyal nga suction disc. Ang ilang gidisenyo nga device makatapot sa lainlaing butang. Dihang gisulayan kinig tangtang sa mga researcher, dili ni bastabasta matangtang bisan pag gigamitan kinig puwersa nga gatosan ka pilo sa gibug-aton niini!

Daghag kagamitan ang disenyo nga gibase sa suction disc sa kumi. Puwede kining gamiton ingong research tag para sa mga mananap sa dagat ug dihang magtuon sa lawom kaayong bahin sa dagat. Magamit sab ni ingong pangtapot sa mga suga o tools sa underwater nga mga parte sa tulay o barko.

Unsay imong hunahuna? Ang suction disc ba sa kumi mitungha pinaagig ebolusyon? O gidisenyo kini?