Ang Tingog sa Japanese Tree Frog

Ang laki nga mga Japanese tree frog nailhan sa ilang balikbalik nga pagtingog nga morag wala ray katuyoan. Pero mailhan gihapon ang matag laki nga baki bisag saba ug daghan sila nga nagtingog. Sa Japan, nadiskobrehan sa mga researcher nga nagtuon bahin niini nga mga baki nga naposible kini kay ang mga laki sa samang dapit naay organisado kaayong paagi sa pagpanawag ug mga baye.

Hunahunaa: Ang laki nga Japanese tree frog motingog aron makadani ug mga baye. Ang tingog maggikan sa iyang vocal cords ug mokusog dihang molanog ni sa vocal sac, nga usa ka puyo (pouch) sa tutonlan nga iyang mapaburot.

Sa unsang paagi ang tingog sa usa ka laki mailhan nga lahi niadtong sa ubang laki? Nadiskobrehan sa mga researcher nga ang nagdug-ol nga mga Japanese tree frog dili bastabasta lang nga motingog kondili kini dunay espesipikong pagkasunodsunod; ang matag baki magpulihanay ug tingog. Tungod niining episyente nga teknik, dili sila magsinapaway; hinuon, makahimo silag tin-aw nga koro sa managlahi nga mga tingog nga sa samang higayon makadaginot ug enerhiya. Dugang pa, kay organisado ang ilang pagtingog, ang mga baki makahunong kadiyot sa matag koro.

Gustong sundogon sa mga researcher sa wireless communications ang organisado kaayong paagi sa pagtingog sa mga Japanese tree frog. Tungod niana, naggamit silag advanced mathematics sa pagpaningkamot nga makontrol ang pagpasag data aron dili ni magkadungan sa ubang data. Ingong resulta, mas kasaligan ang pagpasag data ug mas menos ang enerhiya nga magamit.

Unsay imong hunahuna? Ang organisado ba nga pagtingog sa mga Japanese tree frog resulta sa ebolusyon? O gidisenyo kini?