Mga Literature Cart nga Gigamit “sa Pagpamatuod Ngadto sa Tanang Kanasoran”

Kapin nag 10 ka tuig nga ang mga literature cart nahimong bahin sa atong ministeryo nga nakakuha sa atensiyon sa mga tawo. Sa tibuok kalibotan, ang mga tawo nakaila na sa atong mga cart. Dili lang kay nindot ni, kondili sayon pod ning gamiton. Tingali mouyon ka kang Asenata, sister sa Poland, kinsa miingon: “Ang mga cart simple, pero nindot. Sayon ra ning gamiton ug dad-on.”

Nakahunahuna na ba ka kon giunsa pagdisenyo ug paghimo ang mga cart?

Maayo Kaayo nga Disenyo

Niadtong 2001, giaprobahan sa Nagamandong Lawas nga sulayan sa mga igsoon sa France ang lainlaing paagi sa publikong pagsangyaw, apil ang paggamit ug mga cart. Gisulayan nila ang lainlaing disenyo. Pananglitan, migamit silag mga luggage ug grocery trolley aron displeyhan ug butangan sa mga literatura. Sa ngadtongadto, ang sangang buhatan sa France mipilig standard nga disenyo, nga gigamit sa mga magmamantala sulod sa daghang tuig.

Ang mga igsoon sa France nalipay pag-ayo sa mga resulta sa ilang gisulayan nga publikong pagsangyaw. Busa niadtong 2011, giaprobahan sa Nagamandong Lawas nga sulayan ang publikong pagsangyaw sa New York City, U.S.A., gamit ang mga cart ug lamesa. Dihang gisulayan ni sa mga payunir, nakita nila nga ang mga cart daghag kaayohan. Usa niini mao nga dali ra ning dad-on bisag asa. Ang mga payunir mihatag pod ug praktikal nga mga sugyot nga makatabang aron mo-improve ang disenyo sa mga cart. Ang unang mga cart nga hinimo sa kahoy bug-at, maong lisod ning dad-on kon pasaka o panaog. Busa giusab ang disenyo niini aron mas mogaan, pero dili pod sobra ka gaan nga matumba na sa hangin. Apil sa bag-ong disenyo ang mas dagko ug mas lig-ong mga ligid, nga nakatabang nga mas sayon dad-on ang mga cart bisan pa sa dalan nga may mga libaong. Dugang pa, ang bag-ong mga cart dunay gamayng kahon nga kabutangag ekstra nga mga literatura.

Ang maong programa sa publikong pagsangyaw nagmalamposon! Busa niadtong 2012, giaprobahan sa Nagamandong Lawas ang paggamit ug mga literature cart sa tibuok kalibotan. Ang mga igsoon nakakitag kompaniya nga makahimog binulto nga mga cart gamit ang gaan pero lig-on nga mga materyales.

Sulod sa katuigan, dihay ginagmayng kabag-ohan ang gihimo sa mga cart. Pananglitan, niadtong 2015, gibutangan ug plastic cover ang atubangan sa cart aron dili ni mabasa sa ulan. Ganahan kaayo niini si Dina, nga taga-Georgia. Siya miingon, “Ang cart dunay kaugalingong ‘raincoat’ aron dili mabasa ang mga publikasyon.” Niadtong 2017, ang mga magnetic poster nahimong available sa pipila ka pinulongan. Si Tomasz, nga brader sa Poland, miingon: “Dihang mga poster pa nga ipapilit ang among gigamit, lisod ning ilisan. Maong nindot kaayo nga ideya ang mga magnetic poster.” Niadtong 2019, diha pay gihimong mga kausaban sa mga materyales ug sa paghimo sa mga cart aron mas molig-on ni.

Ang Paghimo sa mga Literature Cart

Usa lang ka manufacturer ang nagahimo sa tanang literature cart ug dayon ipadala ni ngadto sa mga kongregasyon sa tibuok kalibotan. Sa pagkakaron, ang usa ka cart mokantidad ug $43 U.S., wala pay labot ang shipping ug ubang galastohan. Kapin nag $16 million U.S. ang gigasto sa mga cart, ug kapig 420,000 na ka cart ang napadala ngadto sa mga kongregasyon sa tibuok kalibotan.

Aron magamit sa kinamaayohang paagi ang mga donasyon, ang mga literature cart orderon nga binulto. Dugang pa, ang mga kongregasyon makaorder na karon ug mga spare part aron ilang ma-repair ang mga cart imbes ilisan nig bag-o.

Paggamit sa mga Cart sa Pagpamatuod

Ang mga magmamantala sa tibuok kalibotan ganahan kaayong mogamit sa mga literature cart. Si Martina, nga taga-Ghana, miingon: “Sa kadaghanang bahin sa atong ministeryo, kitay moduol sa mga tawo. Pero ganahan ko sa cart witnessing kay ang mga tawo ang moduol nato. Bisan ang mga nanglabay lang mahatagan ug pamatuod.”

Sa laing nasod sa Africa, naay lalaki nga miduol sa cart ug mikuhag mga publikasyon sa iyang pinulongan. Usa ka semana sa ulahi, mibalik siya ug miingon: “Nabasa na nako ang tanang literatura, ug importante kaayo ang impormasyon adto. Ako ning isulti sa akong pamilya didto sa among baryo,” nga mga 500 kilometros (311 ka milya) ang gilay-on. Duha ka bulan sa ulahi, mibalik siya ug miingon: “Gibasa sa mga tawo sa among baryo ang tanang literatura, ug ganahan kaayo sila sa ilang nabasa. Gusto silang mahimong Saksi ni Jehova. Pero naa silay mga pangutana. Pananglitan, nasabtan nila nga aron mabawtismohan sila, kinahanglan silang ituslob sa tubig. Pero walay suba duol sa among baryo. Kinahanglan ba ming moanhi dinhi aron mabawtismohan?” Gipailaila siya sa mga magmamantala sa usa ka payunir nga nagsulti sa iyang pinulongan. Sukad niadto, silang duha regular nang naghisgot bahin sa Bibliya.

Makapalipay gyong makita ang mga literature cart nga gigamit sa pagsangyaw sa tibuok yuta “sa pagpamatuod ngadto sa tanang kanasoran.” (Mateo 24:14) Sa unsang paagi nato nabayran ang galastohan sa pagpahimog mga cart? Pinaagi sa mga donasyon para sa tibuok kalibotang buluhaton, nga ang kadaghanan niini gihatag pinaagi sa donate.jw.org. Salamat sa inyong pagkamahinatagon.