Mga Proyekto nga Makaayo sa Atong mga Igsoon ug sa Planeta

Ingong mga Saksi ni Jehova, nahibalo ta nga sa dili na madugay naay himoon si Jehova nga Diyos aron masalbar ang atong planeta gikan sa kadaot nga gihimo sa mga tawo. (Pinadayag 11:18) Pero samtang wala pa na mahitabo, naningkamot ta pag-ayo aron maatiman ang atong planeta. Pananglitan, gidisenyo nato ang atong mga pasilidad sa paagi nga dili kaayo makadaot sa atong palibot.

Naa tay gihimo nga mga proyekto nga ang tumong mao nga mamenosan ang dili maayong epekto nga mahatag ani sa atong planeta. Unsa ni nga mga proyekto? Ug nganong nakatabang ni nga magamit sa pinakamaayong paagi ang atong mga donasyon?

Solusyon sa Kaigang sa usa ka Assembly Hall

Sa una, ang Assembly Hall sa Matola sa Mozambique walay bungbong ug sin ray atop maong init kaayo didto. Ang usa ka brader miingon: “Igang kaayo maong singot kaayo mi! Inighuman sa programa, magdalidali gyod tawon ug gawas ang mga igsoon aron makapahangin.” Unsay atong gihimo aron mas komportable ang mga igsoon sa Assembly Hall?

Nagtaod tag mga heat insulator aron mamenosan ang kainit nga mosulod sa bilding. Nagbutang pod tag mga ventilator sa atop aron bugnaw ang hangin sa sulod kay suyopon ani ang init nga hangin pagawas sa bilding. Wala ni magkinahanglag koryente kay moandar ra ni pinaagig hangin. Mga $50 ang presyo sa kada ventilator.a

Kini nga solusyon nakatabang gyod nga makuhakuhaan ang kaigang sa Assembly Hall. Kay padayon ra man ang tuyok sa hangin, dili kaayo mag-umog ug agup-opon ang bilding. Mas gamay na pod ang carbon dioxide ug daghan na ang oxygen. Tungod ani, komportable na ang mga igsoon ug mas makapokus na sila sa programa. Ang brader nga gihisgotan ganina miingon: “Karon, dili na mi magdalidali ug gawas inighuman sa programa. Ganahan na ming magpondo sa sulod kon tingpaniudto ug makig-estorya sa mga igsoon. Kay bag-o na ang among atop, bugnaw na ang among pamati. Mora mig nanglingkod sa ilawom sa dakong kahoy!”

Pagkuhag Enerhiya Gikan sa Adlaw

Daghan sa atong pasilidad sa tibuok kalibotan ang gibutangan ug photovoltaic (PV) system. Naggamit nig mga solar panel aron mahimong koryente ang enerhiya gikan sa adlaw. Kay wala may kinutoban ang suplay sa enerhiya gikan sa adlaw, dili na kaayo ta magsalig sa koryente nga gikan sa mga fossil fuel. Ang mga PV system dili kaayo makahatag ug kadaot sa atong palibot ug makatabang pod ni aron dako tag madaginot sa atong mga donasyon.

Niadtong 2023, gitaoran ug PV system ang sangang buhatan sa Slovenia. Nakasuplay nig 30 porsiyento sa ilang gikinahanglan nga koryente. Kon pananglitan mosobra ang suplay sa koryente gikan sa PV system, puwede ning magamit sa mga tawo nga nagpuyo adtong lugara. Kini nga PV system nagkantidad ug $360,000. Pero kay mas gamay na man karon ug bayranan sa koryente ang sangang buhatan, mabawi ra gihapon nato ni nga gasto sulod lang sa upat ka tuig.

Pagka-2024, nagbutang tag mga PV panel ug usa ka dako nga battery sa sangang buhatan sa Sri Lanka. Mikantidad nig mga $3 million, ug nakasuplay nig 70 porsiyento sa ilang gikinahanglang koryente. Nakadaginot gyod ta ani, maong ang nagasto mabawi ra nato sulod sa tulo ka tuig. Nagtaod pod ta ug PV system sa sangang buhatan sa Netherlands niana ra gihapon nga tuig. Nagkantidad nig $1.1 million ug nakasuplay nig 35 porsiyento sa ilang gikinahanglang koryente. Ang presyo sa PV system mabawi nato sulod sa siyam ka tuig.

Nag-install pod tag mga PV system sa lainlaing remote translation office (RTO) sa Mexico. Usa niana ang Tarahumara (Central) RTO sa Chihuahua. Kon winter, tugnaw gyod kaayo didto kay ang temperatura mas moubos pa sa 0 degrees Celsius. Ug init pod kaayo kon summer kay molapas nig 40 degrees Celsius! Pero kay mahal man kaayo ang koryente didto, ang mga igsoon dili na lang mogamit sa heater ug aircon. Si Jonathan, nga naa didto nga RTO, miingon: “Mogamit mig mga habol ug baga nga mga sinina kon tingtugnaw, ug ablihan namo ang mga bentana kon ting-init.”

Pagka-2024, gitaoran silag PV system nga nagkantidad ug $21,480. Pero mabawi ra ni nga gasto sulod sa lima ka tuig. Karon, pirme nang gamiton sa mga igsoon ang heater ug aircon. Si Jonathan miingon: “Mas nag-enjoy na mi sa among asaynment ug mas nakapokus na mig trabaho. Nalipay pod mi nga nagamit sa pinakamaayong paagi ang atong mga donasyon ug nga nakatabang tang dili kaayo madaot ang atong palibot.”

Pagpondo ug Tubig Gikan sa Ulan

Sa Africa, ang ubang Kingdom Hall walay tubig maong ang mga igsoon kinahanglan pang moadtog layo para maghakot ug tubig. Sa uban pong kongregasyon, ang mga igsoon mopalit ug tubig nga gina-deliver ug trak. Pero mahal kaayo ni ug dili makaayo sa palibot.

Aron masolusyonan ni, nagtaod tag mga sandayong ug dagkong tangke sa tubig sa daghang Kingdom Hall sa lainlaing bahin sa Africa. Sa wala pa ni himoa, gitun-an daan sa mga brader kon unsay klima sa mga lugar didto aron mahibaloan nila kon unsa ang pinakamaayong paagi nga makakuhag suplay sa tubig. Ang kantidad ani nga mga equipment naa sa mga $600 ngadto sa $3,000. Kon mataod na ni, mas gamay na lang ug galastohan ang Kingdom Hall kay di na kinahanglang mopalit ug tubig ang mga igsoon.

Nakabenepisyo gyod ang mga igsoon ani nga proyekto. Si Noemia, sister nga taga-Mozambique, miingon: “Sa una, layo kaayo mig hakotan ug tubig maong kapoyon na mi inig-abot sa Kingdom Hall. Ug kay wala man kaayoy tubig, lisod makapanghinlo sa kaugalingon. Karon, makapanghunaw na ming tanan. Makapokus na pod mi sa tigom kay dili na man mi kapoy. Salamat gyod kaayo!”

Asa gikan ang kuwarta nga nagasto para aning tanan? Gikan ni sa donasyon sa mga igsoon sa tibuok kalibotan nga gihimo sa lainlaing paagi. Kini nga mga paagi makita sa donate.jw.org. Salamat kaayo sa inyong pagkamahinatagon!