Kapitulo 29
Naghimog Maayong mga Buhat sa Igpapahulay
TINGPAMULAK kadto sa 31 K.P. Mga bulan na ang milabay sukad nakigsulti si Jesus sa usa ka babaye diha sa atabay sa Samaria samtang naglakbay gikan sa Judea paingon sa Galilea.
Sa mao nga panahon, human nakapanudlo nga masangkaron sa tibuok Galilea, milakaw na usab si Jesus paingon sa Judea, diin didto nagsangyaw siya sa mga sinagoga. Kon itandi ang pagtagad nga gihatag sa Bibliya bahin sa iyang ministeryo sa Galilea, kini diyutay ray gisugilon bahin sa kalihokan ni Jesus sa Judea sa maong panahon sa pagduaw ug sa mga bulan nga iyang gigugol dinhi human sa miagi nga Paskuwa. Dayag nga ang iyang ministeryo wala makadawat ug maayong pagsanong sa Judea sama sa pagsanong sa Galilea.
Dayon miadto si Jesus sa pangunang siyudad sa Judea, sa Jerusalem, alang sa Paskuwa sa 31 K.P. Dinhi, duol sa Ganghaan sa mga Karnero sa siyudad, mao ang linaw nga gitawag Betsata, diin dinhi daghang masakiton, mga buta, ug mga bakol ang manganhi. Sila nagtuo nga maayo ang mga tawo pinaagi sa pag-ubog sa mga tubig sa linaw kon kini makutaw.
Igpapahulay kadto, ug nakita ni Jesus ang tawo diha sa linaw nga nagmasakiton sulod sa 38 ka tuig. Kay nahibalo sa dugay nang sakit sa tawo, si Jesus nangutana: “Gusto ka bang mamaayo?”
Iyang gitubag si Jesus: “Senyor, walay mosakwat kanako ngadto sa linaw inigkutaw na sa tubig; samtang manlimbasog ako sa paglusad adunay makauna kanako sa pag-ubog.”
Si Jesus miingon kaniya: “Bangon, dad-a ang imong higdaan ug lumakaw ka.” Dihadiha ang tawo naayo, ug gidala niya ang iyang higdaan, ug milakaw!
Dihang nakita sa mga Hudiyo ang tawo, sila miingon: “Igpapahulay karon, ug ginadili kanimo ang pagdala sa imong higdaan.”
Gitubag sila sa tawo: “Giingnan ako sa tawo nga nag-ayo kanako, ‘Dad-a ang imong higdaan ug lumakaw ka.’”
“Kinsa bang tawhana ang nagsugo kanimo, ‘Dad-a kini ug lumakaw ka’?” sila nangutana. Mipahawa na si Jesus tungod sa pundok sa mga tawo, ug ang tawo nga naayo wala mahibalo sa ngalan ni Jesus. Sa ulahi, hinunoa, si Jesus ug ang tawo nagkita sa templo, ug nahibaloan sa tawo kon kinsa ang nag-ayo kaniya.
Busa gipangita sa naayong tawo ang mga Hudiyo sa pagsulti kanila nga si Jesus mao ang nagpabalik sa iyang maayong panglawas. Sa pagkahibalo niini, ang mga Hudiyo miadto kang Jesus. Alang sa unsang katarongan? Aron ba mahibalo kon pinaagi sa unsa nga nakahimo siya niining katingalahang mga buhat? Dili. Kondili sa pagpangitag sayop kaniya tungod kay nagbuhat niining maayong mga buhat sa adlawng Igpapahulay. Ug gani misugod sila sa paglutos kaniya! Lucas 4:44; Juan 5:1-16.
▪ Unsa na ka dugay sukad sa kataposang pagduaw ni Jesus sa Judea?
▪ Nganong ang linaw nga gitawag Betsata popular kaayo?
▪ Unsang milagro ang gihimo ni Jesus diha sa linaw, ug unsay reaksiyon sa mga Hudiyo?