Nganong Angay Ming Magkasinabot sa Akong mga Igsoon?

• “Mahal nimo pero makalagot usahay”

• Duha ka rason kon nganong importante kini

• Ang giingon sa ubang batan-on

“Mahal nimo pero makalagot usahay”

Mahal nimo ang imong mga igsoon, ug mahal pod ka nila​—pero usahay dili mo magkasinabot. “Maglagot ko sa akong manghod nga lalaki,” miingon ang 18 anyos nga si Helena. “Kahibalo gyod siya kon unsay isulti o buhaton aron maglagot ko!”

Masulbad ra ang pipila ka panag-away sa magsoon pinaagig simpleng panag-estoryahay ug pagpakigsabot. Pananglitan:

• Ang duha ka magsoong lalaki nga usa rag kuwarto lagmit maglalis bahin sa pribasiya. Ang solusyon? Magpakitag konsiderasyon ug hatagig pribasiya ang usag usa. Ipadapat ang prinsipyo sa Bibliya sa Lucas 6:31.

• Ang duha ka magsoong babaye lagmit “maghulamay” ug sinina nga dili mananghid. Ang solusyon? Maayong estoryahan kini ug magtakdag rasonableng mga limitasyon. Ipadapat ang prinsipyo sa Bibliya sa 2 Timoteo 2:24.

Usahay, ang problema sa magsoon mas seryoso ug mahimong moresultag dili maayo. Konsideraha ang duha ka pananglitan sa Bibliya:

• Si Miriam ug Aaron nagselos sa ilang igsoong si Moises ug kini miresultag grabeng kadaot. Basaha ang estorya sa Numeros 12:1-15. Dayon pangutan-a ang kaugalingon: ‘Unsay akong himoon aron dili ko magselos sa akong igsoon?’

• Ang grabeng kasuko ni Cain miresulta sa iyang pagpatay kang Abel nga iyang igsoon. Basaha ang estorya sa Genesis 4:1-12. Dayon pangutan-a ang kaugalingon: ‘Unsaon nako pagkontrol ang akong kasuko dihang maglagot ko sa akong igsoon?’

Duha ka rason kon nganong importante kini

Bisag lisod nga magkasinabot mo sa imong mga igsoon, naay duha ka rason kon nganong maningkamot kang makigdait nila.

1. Ilhanan kini sa pagkahamtong. “Sa una, dali ra kong masuko sa akong duha ka manghod nga babaye,” miingon ang batan-ong si Alex. “Pero karon, mas kalmado na ko ug taas nag pailob nila. Makaingon ko nga mihamtong na ko.”

   Ang Bibliya nag-ingon: “Ang tawong dili daling masuko nagpakitag katakos sa pag-ila, apan ipakita sa tawong walay pailob nga buangbuang siya.”​—Proverbio 14:29.

2. Pagbansay kini para sa umaabot. Kon dili nimo mapalabay ang mga sayop o makalagot nga kinaiya sa imong mga igsoon, unsaon man nimo pagpakiglabot sa imong kapikas, katrabaho, amo, o sa ubang tawo?

   Realidad sa kinabuhi: Makabaton kag maayong relasyon sa uban kon maayo kang makigkomunikar ug makigsabot, ug maayong bansayon nimo ang imong kaugalingon niini diha sa imong pamilya.

   Ang Bibliya nag-ingon: “Kutob sa mahimo, pakigdait mo.”​—Roma 12:18.

Gusto ba nimog tabang aron magkasinabot mo sa imong mga igsoon? Basaha ang seksiyon nga “Ang giingon sa ubang batan-on,” dayon i-download ang worksheet nga “Getting Along With Siblings.”