Pabilhi ang Pribilehiyo nga Simbahon si Jehova sa Iyang Espirituwal nga Templo

1. Unsay ginaingon sa usa ka anghel, ug unsay angayng epekto niana kanato?

KON naay anghel nga makig-estorya nimo, maminaw ba ka sa iyang isulti? Sa atong panahon karon, naay ginasulti ang usa ka anghel “ngadto sa matag nasod ug tribo ug pinulongan ug katawhan.” Unsay iyang ginaingon? “Kahadloki ang Diyos ug ihatag kaniya ang himaya . . . Simbaha ang Usa nga naghimo sa langit ug sa yuta.” (Pin. 14:6, 7) Si Jehova ang bugtong matuod nga Diyos nga angayng simbahon sa tanan. Mapasalamaton gyod ta nga gihatagan ta niyag bililhong kahigayonan nga simbahon siya sa iyang dakong espirituwal nga templo!

2. Unsa ang espirituwal nga templo ni Jehova? (Tan-awa sab ang kahong “Kon Unsay Wala Gitumong Niini.”)

² Unsa gyod ang espirituwal nga templo, ug asa nato makita ang mga detalye nga nagpatin-aw niini? Ang espirituwal nga templo dili literal nga bilding. Kini ang kahikayan ni Jehova sa pagtanyag ug dalawatong pagsimba base sa halad lukat ni Jesus. Gipatin-aw ni apostol Pablo kini nga kahikayan diha sa iyang sulat sa Hebreohanong mga Kristohanon sa Judea niadtong unang siglo.b

3-4. Nganong nabalaka si Pablo sa Hebreohanong mga Kristohanon sa Judea, ug giunsa niya sila pagtabang?

³ Nganong gisulatan ni Pablo ang Hebreohanong mga Kristohanon sa Judea? Tingali tungod sa duha ka pangunang rason. Una, aron dasigon sila. Kadaghanan nila nagdako sa Hudiyong relihiyon. Pero dihang nahimo silang Kristohanon, tingali gibiaybiay sila sa ilang kanhing mga lider sa relihiyon. Ngano? Kay ang mga Kristohanon walay nindot kaayong templo alang sa pagsimba, walay literal nga halaran diin makahalad sila ngadto sa Diyos, ug walay mga saserdote nga mag-alagad para nila. Posibleng nakapaluya ni sa mga tinun-an sa Kristo ug nakapahuyang sa ilang pagtuo. (Heb. 2:1; 3:12, 14) Ang uban nila basin naghunahuna pa ganing mobalik sa Judaismo.

⁴ Ikaduha, giingnan ni Pablo ang Hebreohanong mga Kristohanon nga wala sila maningkamot nga masabtan ang bag-o o lawom nga mga pagtulon-an, ang “gahing pagkaon” diha sa Pulong sa Diyos. (Heb. 5:11-14) Klaro nga ang uban kanila nagsunod gihapon sa Moisesnong Balaod. Pero gipatin-aw ni Pablo nga ang mga halad nga gisugo sa Balaod dili bug-os makatabon sa sala. Tungod ana, ang Balaod “giwala.” Dayon, gitudloan sila ni Pablo sa mas lawom nga mga kamatuoran. Iya silang gipahinumdoman sa “mas maayong paglaom” nga gibase sa halad ni Jesus, nga mao gyoy makatabang nila sa ‘pagduol sa Diyos.’​—Heb. 7:18, 19.

5. Unsay kinahanglan natong masabtan sa basahon sa Hebreohanon, ug ngano?

⁵ Gipatin-aw ni Pablo ngadto sa Hebreohanong mga Kristohanon kon nganong ang ilang pagsimba mas labaw kay sa pagsimba nga ilang gihimo kaniadto. Ang paagi sa pagsimba sa Hudiyong relihiyon maoy “anino [lang] sa mga butang nga moabot, apan ang katinuoran iya sa Kristo.” (Col. 2:17) Ang anino maghatag natog ideya sa porma sa usa ka butang, pero dili kini ang aktuwal nga butang. Sa susama, ang paagi sa pagsimba sa mga Hudiyo kaniadto maoy anino lang sa umaabot nga kahikayan sa pagsimba. Kinahanglan natong masabtan ang kahikayan nga gihimo ni Jehova sa pagpasaylo sa atong mga sala aron makahatag ta kaniyag dalawatong pagsimba. Atong ikompara ang “anino” (ang karaang paagi sa pagsimba sa mga Hudiyo) ug ang “katinuoran” (ang Kristohanong paagi sa pagsimba), nga gipatin-aw sa basahon sa Hebreohanon. Pinaagi niana, mas masabtan nato ang espirituwal nga templo ug ang kahulogan niini para nato karon.

ANG TABERNAKULO

6. Sa unsang paagi gigamit ang tabernakulo?

⁶ Karaang paagi sa pagsimba. Ang eksplinasyon ni Pablo gibase niya sa tabernakulo nga gihimo ni Moises niadtong 1512 B.C.E. (Tan-awa ang chart nga “Karaang Paagi sa Pagsimba​—Kristohanong Paagi sa Pagsimba.”) Ang tabernakulo maoy samag tolda nga tinukod nga ginadala sa mga Israelinhon niadtong nagbalhinbalhin pa silag lugar. Halos 500 ka tuig nila ning gigamit hangtod natukod ang templo sa Jerusalem. (Ex. 25:8, 9; Num. 9:22) Kini nga “tolda nga tagboanan” mao ang sentro sa pagsimba sa mga Israelinhon, diin makaduol sila sa Diyos ug makatanyag ug mga halad. (Ex. 29:43-46) Pero ang tabernakulo nagrepresentar pod sa mas labaw pa nga kahikayan sa pagsimba para sa mga Kristohanon sa umaabot.

7. Kanus-a nagsugod paglungtad ang espirituwal nga templo?

⁷ Kristohanong paagi sa pagsimba. Ang karaang tabernakulo maoy “anino sa mga butang nga langitnon,” ug kini nagrepresentar sa dakong espirituwal nga templo ni Jehova. Si Pablo miingon nga “kini nga tolda [o, tabernakulo] naghulagway sa mga butang niining panahona.” (Heb. 8:5; 9:9) Busa dihang gisulatan niya ang mga Hebreohanon, ang espirituwal nga templo naglungtad na. Nagsugod ni niadtong 29 C.E. Nianang tuiga, si Jesus nabawtismohan, gidihogan sa balaang espiritu, ug nagsugod pag-alagad ingong “labaw nga hataas nga saserdote” diha sa espirituwal nga templo ni Jehova.c​—Heb. 4:14; Buh. 10:37, 38.

ANG HATAAS NGA SASERDOTE

8-9. Sumala sa Hebreohanon 7:23-27, unsa ang dakong kalainan sa hataas nga mga saserdote sa Israel ug sa labaw nga Hataas nga Saserdote, si Jesu-Kristo?

⁸ Karaang paagi sa pagsimba. Ang hataas nga saserdote maoy morepresentar sa katawhan atubangan sa Diyos. Ang unang hataas nga saserdote sa Israel, si Aaron, gipili ni Jehova dihang gipahinungod ang tabernakulo. Pero sumala sa gipatin-aw ni Pablo, “daghan ang nagpulipuli ingong mga saserdote kay nangamatay man sila ug dili na makaalagad.”d (Basaha ang Hebreohanon 7:23-27.) Ug kay dili hingpit ang hataas nga mga saserdote, kinahanglan silang magtanyag ug mga halad para sa ilang mga sala. Mao ni ang dakong kalainan sa hataas nga mga saserdote sa Israel ug sa labaw nga Hataas nga Saserdote, si Jesu-Kristo.

⁹ Kristohanong paagi sa pagsimba. Ingong atong Hataas nga Saserdote, si Jesu-Kristo “usa ka alagad . . . sa tinuod nga tolda nga si Jehova ang nagpatindog, dili tawo.” (Heb. 8:1, 2) Gipatin-aw ni Pablo nga “kay buhi man [si Jesus] hangtod sa hangtod, walay manununod sa iyang pagkasaserdote.” Si Pablo midugang nga si Jesus “wala mahugawi, bulag sa mga makasasala.” Dili pod siya sama sa hataas nga mga saserdote sa Israel kay “siya dili kinahanglang magtanyag ug mga halad kada adlaw” para sa iyang mga sala. Karon, atong konsiderahon ang kalainan sa mga halaran ug mga halad diha sa karaang paagi sa pagsimba ug sa Kristohanong paagi sa pagsimba.

ANG MGA HALARAN UG MGA HALAD

10. Unsay gipaila sa mga halad diha sa halaran nga tumbaga?

¹⁰ Karaang paagi sa pagsimba. Sa gawas sa entrada sa tabernakulo, dihay halaran nga tumbaga diin ginatanyag ang halad nga mga hayop para kang Jehova. (Ex. 27:1, 2; 40:29) Pero ang maong mga halad dili bug-os makapasaylo sa sala sa katawhan. (Heb. 10:1-4) Ang balikbalik nga paghalad ug mga hayop diha sa tabernakulo nagpaila nga gikinahanglan gyod sa katawhan ang usa ka halad nga bug-os magpasaylo sa ilang sala.

11. Sa unsang halaran gitanyag ni Jesus ang iyang kaugalingon ingong halad? (Hebreohanon 10:5-7, 10)

¹¹ Kristohanong paagi sa pagsimba. Nahibalo si Jesus nga gipadala siya ni Jehova sa yuta aron itanyag ang iyang kinabuhi ingong halad lukat para sa katawhan. (Mat. 20:28) Busa sa iyang bawtismo, gipresentar ni Jesus ang iyang kaugalingon aron himoon ang kabubut-on ni Jehova. (Juan 6:38; Gal. 1:4) Gitanyag ni Jesus ang iyang kaugalingon diha sa simbolikong halaran nga nagrepresentar sa “kabubut-on” sa Diyos. Kabubut-on ni Jehova nga ihalad sa iyang Anak ang hingpit nga tawhanong kinabuhi niini. Gitanyag ni Jesus ang iyang kinabuhi “kausa alang sa tanang panahon” aron bug-os o permanenteng mapasaylo ang sala sa tanan nga nagpakitag pagtuo sa Kristo. (Basaha ang Hebreohanon 10:5-7, 10.) Karon, atong susihon kon unsay girepresentahan sa sulod nga mga bahin sa tabernakulo.

ANG BALAAN UG ANG LABING BALAAN

12. Kinsay puwedeng mosulod sa matag lawak sa tabernakulo?

¹² Karaang paagi sa pagsimba. Ang tabernakulo ug ang mga templo nga gitukod sa ulahi didto sa Jerusalem parehog disenyo sa sulod. Naa ni duha ka lawak​—ang “Balaang Dapit” ug ang “Labing Balaan”​—ug naay binordahan nga kortina nga nagsilbing dibisyon niini. (Heb. 9:2-5; Ex. 26:31-33) Sa sulod sa Balaan, naay tangkawan nga bulawan, halaran sa pagsunog ug insenso, ug lamesa nga naay halad nga tinapay. Ang “dinihogang mga saserdote” lang ang gitugotan nga mosulod sa Balaan aron himoon ang ilang sagradong buluhaton. (Num. 3:3, 7, 10) Naa sa Labing Balaan ang bulawang kaban sa pakigsaad nga nagrepresentar sa presensiya ni Jehova. (Ex. 25:21, 22) Ang hataas nga saserdote lang ang gitugotan nga mosulod sa Labing Balaan agi sa kortina. (Lev. 16:2, 17) Iya nang himoon kada tuig, sa Adlaw sa Pagtabon sa Sala. Nianang adlawa, mosulod siya dala ang dugo sa mga hayop alang sa pagtabon sa iyang mga sala ug nianang sa tibuok nasod. Sa ulahi, giklaro ni Jehova pinaagi sa iyang balaang espiritu kon unsa gyoy girepresentahan niini nga mga bahin sa tabernakulo.​—Heb. 9:6-8.e

13. Unsay girepresentahan sa Balaan ug sa Labing Balaan sa tabernakulo diha sa Kristohanong paagi sa pagsimba?

¹³ Kristohanong paagi sa pagsimba. Naay limitadong gidaghanon sa mga tinun-an ni Jesus nga gidihogan sa balaang espiritu, ug naa silay espesyal nga relasyon uban kang Jehova. Kining 144,000 mag-alagad ingong mga saserdote sa langit uban ni Jesus. (Pin. 1:6; 14:1) Ang Balaan sa tabernakulo nagrepresentar sa ilang kahimtang sa yuta ingong dinihogan sa espiritu nga mga anak sa Diyos. (Roma 8:15-17) Ang Labing Balaan sa tabernakulo nagrepresentar sa langit, diin nagpuyo si Jehova. Ang “kortina” nga nagsilbing dibisyon sa Balaan ug Labing Balaan nagrepresentar sa tawhanong lawas ni Jesus. Kini nagsilbing ali sa iyang pagsulod sa langit ingong labaw nga Hataas nga Saserdote sa espirituwal nga templo. Pinaagi sa paghatag sa iyang tawhanong kinabuhi ingong halad para sa katawhan, gibuksan ni Jesus ang dalan ngadto sa langitnong kinabuhi alang sa tanang dinihogang Kristohanon. Kinahanglan pod nilang biyaan ang ilang tawhanong lawas aron madawat nila ang langitnong ganti. (Heb. 10:19, 20; 1 Cor. 15:50) Human mabanhaw si Jesus, misulod siya sa Labing Balaan sa espirituwal nga templo, diin sa ngadtongadto moduyog kaniya ang tanang dinihogan.

14. Sumala sa Hebreohanon 9:12, 24-26, nganong mas labaw ang kahikayan sa espirituwal nga templo ni Jehova?

¹⁴ Dinhi, klaro natong makita ang pagkalabaw sa kahikayan ni Jehova sa putling pagsimba nga gibase sa halad lukat ug pagkasaserdote ni Jesu-Kristo. Ang hataas nga saserdote sa Israel misulod sa Labing Balaan nga lawak nga hinimo sa tawo dala ang dugo sa gihalad nga mga hayop, pero si Jesus misulod “sa langit mismo,” ang labing balaan nga dapit sa tanan, aron moatubang kang Jehova. Didto, iyang gipresentar ang bili sa iyang hingpit nga tawhanong kinabuhi alang kanato, “aron wad-on ang sala pinaagi sa paghalad sa iyang kaugalingon.” (Basaha ang Hebreohanon 9:12, 24-26.) Ang halad ni Jesus mao ang kinalabwang halad nga magpapas sa sala hangtod sa hangtod. Sama sa atong makat-onan sa sunod nga mga parapo, kitang tanan makasimba kang Jehova sa iyang espirituwal nga templo, sa langit man o sa yuta ang atong paglaom.

ANG MGA HAWANAN

15. Kinsay nag-alagad sa hawanan sa tabernakulo?

¹⁵ Karaang paagi sa pagsimba. Ang tabernakulo naay usa ka hawanan​—kinoralan, lapad nga hawanan diin ginahimo sa mga saserdote ang ilang buluhaton. Naa dinhi ang dakong tumbaga nga halaran alang sa mga halad nga sinunog. Naa pod dinhi ang kawakawa nga tumbaga nga punog tubig, nga gigamit sa mga saserdote sa paghinlo sa ilang kaugalingon sa dili pa nila himoon ang ilang sagradong pag-alagad. (Ex. 30:17-20; 40:6-8) Pero ang mga templo nga gitukod sa ulahi naa poy gawas nga hawanan, diin kadtong mga dili saserdote makaadto ug makasimba sa Diyos.  

16. Kinsay nag-alagad sa duha ka hawanan sa espirituwal nga templo?

¹⁶ Kristohanong paagi sa pagsimba. Sa dili pa mag-alagad ingong mga saserdote uban ni Jesus sa langit, ang nahibilin nga mga dinihogan matinumanong nag-alagad dinhi sa yuta sa sulod nga hawanan sa espirituwal nga templo. Ang dakong kawakawa sa tubig maoy importanteng pahinumdom para nila ug sa tanang Kristohanon nga angay silang magpabiling hinlo sa moral ug espirituwal. Pero asa nag-alagad ang “dakong panon,” nga maunongong nagsuportar sa dinihogang mga igsoon sa Kristo? Nakita sila ni apostol Juan nga “nagbarog atubangan sa trono,” buot pasabot nagbarog sila sa yuta sa gawas nga hawanan, diin “sila naghatag [sa Diyos ug] sagradong pag-alagad adlaw ug gabii diha sa iyang templo.” (Pin. 7:9, 13-15) Mapasalamaton gyod ta nga apil ta sa kahikayan ni Jehova sa putling pagsimba!

ANG ATONG PRIBILEHIYO NGA SIMBAHON SI JEHOVA

17. Unsay puwede natong itanyag kang Jehova?

¹⁷ Pribilehiyo sa tanang Kristohanon karon nga magtanyag ug mga halad kang Jehova pinaagi sa paggamit sa ilang panahon, kusog, ug materyal nga mga butang para sa Gingharian sa Diyos. Sama sa giingon ni apostol Pablo sa Hebreohanong mga Kristohanon, “magtanyag ta kanunay sa Diyos ug halad sa pagdayeg, ang bunga sa atong mga ngabil nga nagpahayag sa iyang ngalan.” (Heb. 13:15) Mapakita nato nga atong gipabilhan ang atong pribilehiyo sa pagsimba kang Jehova pinaagi sa paghatag kaniya sa atong kinamaayohan.

18. Sumala sa Hebreohanon 10:22-25, unsay dili nato angayng balewalaon, ug unsay dili nato angayng kalimtan?

¹⁸ Basaha ang Hebreohanon 10:22-25. Sa hinapos sa sulat ni Pablo sa mga Hebreohanon, iyang gihisgotan ang lainlaing bahin sa atong pagsimba nga dili nato angayng balewalaon. Apil niini ang pag-ampo kang Jehova, pagsangyaw bahin sa atong paglaom, pagtigom ingong kongregasyon, ug pagdinasigay sa usag usa “ilabina gyod samtang makita [nato] nga ang adlaw [ni Jehova] nagkaduol na.” Sa ulahing mga kapitulo sa Pinadayag, ang anghel ni Jehova kaduha miingon agig pagpasiugda: “Ang Diyos maoy simbaha!” (Pin. 19:10; 22:9) Hinaot nga dili nato kalimtan kining lawom nga espirituwal nga kamatuoran bahin sa dakong espirituwal nga templo ni Jehova ug ang atong talagsaong pribilehiyo nga simbahon ang atong Labing Gamhanang Diyos!