FEBE

[Putli; Hayag; Dan-ag].

Usa ka Kristohanon nga igsoong babaye sa unang-siglong kongregasyon sa Cencrea. Sa sulat ni Pablo ngadto sa mga Kristohanon sa Roma, iyang “girekomendar” kini nga igsoong babaye ngadto kanila ug giawhag sila sa paghatag kaniya ug gikinahanglang tabang ingong “maoy usa ka tigpanalipod sa daghan, oo, kanako mismo.” (Rom 16:​1, 2) Tingali si Febe mao ang naghatod sa sulat ni Pablo sa Roma o kaha miuban sa usa nga naghatod niini.

Gitawag ni Pablo si Febe ingong “usa ka ministro sa kongregasyon sa Cencrea.” Kini nagbangon ug pangutana maylabot sa diwa sa terminong di·aʹko·nos (ministro) nga gigamit dinhi. Giisip sa pipila ka maghuhubad ang termino diha sa opisyal nga diwa ug busa gihubad kini nga “diakonisa.” (RS, JB). Apan walay gihimong probisyon sa Kasulatan nga ang mga babaye mahimong ministeryal nga mga alagad. Ang hubad ni Goodspeed nag-isip sa termino sa linangkob nga diwa ug naghubad niini ingong “katabang.” Apan, dayag nga ang gitumong ni Pablo maoy may kalabotan sa pagpakaylap sa maayong balita, ang Kristohanong ministeryo, ug iyang gihisgotan si Febe ingong usa ka babayeng ministro nga nakig-uban sa kongregasyon sa Cencrea.​—Itandi ang Buh 2:​17, 18.

Si Febe nag-alagad ingong “usa ka tigpanalipod sa daghan.” Ang terminong gihubad nga “tigpanalipod” (pro·staʹtis) adunay paninugdang diwa nga “babayeng tigpanalipod” o “tig-abag,” busa kini nagpasabot dili lamang sa usa ka malulotong pagtagad kondili sa pagtabang sa uban nga nanginahanglan. Mahimo usab nga hubaron kini ingong “babayeng tigpaluyo.” Ang pagkagawasnon ni Febe sa pagpanaw ug sa paghatag ug talagsaong pag-alagad sa kongregasyon tingali nagpakita nga siya maoy usa ka babayeng balo ug lagmit nga siya arangan. Busa, hayan anaa siya sa kahimtang sa paggamit sa iyang impluwensiya diha sa komunidad alang sa mga Kristohanon nga giakusar sa sayop nga paagi, nga nanalipod kanila niini nga paagi; o tingali siya nagtagana ug kadangpan alang kanila sa panahon sa kapeligrohan, nga nagsilbing usa ka babayeng tigpanalipod. Ang rekord wala maghatag ug mga detalye.