Pangutana
◼ Sa unsang paagi kita makatabang sa mga payunir?
Sa tibuok kalibotan sa 2009 nga tuig sa pag-alagad, duolag 800,000 ang nag-alagad ingong mga regular ug espesyal payunir. Ilang gisakripisyo ang ilang panahon, kusog, ug materyal nga kahinguhaan alang sa pagsangyaw sa maayong balita sa Gingharian. (Prov. 3:9) Nalipay gayod si Jehova sa ilang mga paningkamot! Sa unsang mga paagi atong masundog ang panghunahuna ni Jehova ug makatabang kanila nga magmalipayon ug magmalahutayon sa pag-alagad?
Ang makapadasig natong mga pulong lagmit makatabang kanila nga magpadayon sa pagpayunir. (Prov. 25:11) Makagahin ba kitag panahon matag semana aron ato silang ikauban sa pagsangyaw? Kon kauban sila, makasugyot kita sa paggamit sa atong sakyanan inay ang ilaha. Ug kon ang ilang sakyanan maoy gamiton, mas maayong mohatag kitag panggasolina. (1 Cor. 13:5; Filip. 2:4) Ikapakita usab nato ang atong mahigugmaong pagsuporta pinaagi sa atong pagkamaabiabihon ug dapiton sila panagsa sa atong mga balay alang sa pagpangaon.—1 Ped. 4:8, 9.
Ang Bibliya nagpasalig nga si Jehova motagana sa mga panginahanglan niadtong nag-una sa iyang Gingharian. (Sal. 37:25; Mat. 6:33) Ang atong mahigugmaong panag-igsoonay maoy usa ka paagi nga iya kining itagana. (1 Juan 3:16-18) Hinuon, dili maglaom ang mga payunir nga tagan-an sa mga igsoon ang ilang pinansiyal nga mga panginahanglan. Ug dili usab sila moyamar sa mga igsoon kon sila may panginahanglan. Apan daghan kitag ikatabang sa matinumanong mga payunir ug ‘makahulip kita sa ilang kakulangan’ pinaagi sa pagkahimong alisto ug mahunahunaon.—2 Cor. 8:14, 15.
Sa dihang ang masibotong magwawali nga si Febe sa Kongregasyon sa Cencrea sa unang siglo mipanaw sa Roma, gidasig ni Pablo ang mga igsoon didto: ‘Dawata siya diha sa Ginoo sa paaging takos sa mga balaan, ug abagi siya sa bisan unsang butang nga siya manginahanglan kaninyo.’ (Roma 16:1, 2) Makapakita usab kita sa samang mahigugmaong suporta sa atong mga kakongregasyon nga makugihong nagmantala sa maayong balita ingong mga regular ug espesyal payunir.—Buh. 5:42.
◼ Husto bang magdispley ug dakong hulagway ni Jesus panahon sa Memoryal?
Para sa matuod nga mga Kristohanon, ang bisan unsang hulagway sa mga esena ug mga karakter sa Bibliya maoy para lang sa ilustrasyon ug pagtudlo. Wala kini gamita sa atong pagsimba kang Jehova. (2 Cor. 5:7; tan-awa ang The Watchtower, Mayo 15, 1972, panid 295-296.) Sa ubang mga Kingdom Hall dunay maanindot nga mga esena sa Bibliya nga gidispley, ug tingali wala ray kaso niini.
Apan kon bahin sa Panihapon sa Ginoo, daw dili nahiangay ang pagdispley ug hulagway ni Jesus. Ang atong pagtagad kinahanglang isentro sa mga emblema diha sa lamesa ug sa pakigpulong. Angay usab natong tagdon ang mga bag-ohan nga nanambong nga tungod sa ilang relihiyon kaniadto sila maghatag ug dakong pagtagad sa mga hulagway ni Jesus. Sa Roma kapitulo 14 ug 1 Corinto kapitulo 10, gipasiugda ni apostol Pablo nga kinahanglan natong tahoron ang konsensiya sa uban, ilabina kadtong sensitibo sa pipila ka butang tungod sa ilang mga kaagi sa kinabuhi.