ALGAROBA, BUNGA SA

[Gr., ke·raʹti·on].

Diha sa sambingay bahin sa anak nga mausikon, gihubit ni Jesus ang gigutom nga batan-ong lalaki ingong nangandoy sa pagkaon sa mga bunga sa algaroba nga gilawog sa mga baboy. (Luc 15:16) Kini nga mga bunga naggikan sa kahoyng algaroba (Ceratonia siliqua), usa ka maanindot nga evergreen o kanunayng may mga dahon nga tanom nga mabuhi sa tibuok Palestina maingon man sa ubang dapit sa Mediteranyo. Ang kahoy moabot sa gitas-ong 9 m (30 p), nga may gagmayng sinawon nga mga dahon nga susama sa mga dahon sa fresno. Ang mga bunga niini may sinawon, samag-panit nga bayanan nga tapol-kapehon ug kolor ug, nahiuyon sa ngalan niini sa Grego (ke·raʹti·on, “gamayng sungay”), kurbadong sungay ang porma niini. Kini may gitas-ong gikan sa 15 hangtod sa 25 sm (6 hangtod sa 10 pul.) ug mga 2.5 sm (1 pul.) ang gilapdon. Sa sulod niini adunay daghang samag gisantes nga mga liso nga nabulag sa usag usa pinaagi sa tam-is, hagkot, makaon nga unod. Ang mga bunga sa algaroba kasagarang gigamit bisan hangtod karong adlawa ingong pagkaon sa mga kabayo, baka, ug mga baboy. Ang pagsumpay (grafting) sa laing matang niini nga mga kahoy gigamit aron sa pagpatunghag maayong klase sa algaroba nga makaon usab sa mga tawo.